18
Paulo e Korinti haeo miti gie bawec
Eme Paulo e Ateŋ hae beherâ Korinti haeo rawec. Ira Judaŋic moc bâfuawec, šâŋene Aqila, e Pontu mâreŋko fuawec. Erâ ŋonâŋ-ticne Prisila ehec Italia mâreŋko juhapire ŋicwofuŋ sâko Klaudiozi Judaŋic Roma hae sakare-jarehuc jâpec-jopawec. Eme jahe hae i beherâ ɋâricne Korinti haeo rapic. Eme Paulozi jahe iqic-jofawec. Paulo e selific bapa, â Aqila e gie ijaha bawecte ficticnao ŋeŋe juju ehuc bafickeme mâmâc bapic. Erâ Paulo e sabata hombaŋ sâc Judaŋic jaŋere mitificko ferâ Judaŋic â Grikŋic miti jazahuc mu bâŋgoroŋ ejarewec. Eme Sila â Timoteo jahe Makedonia mâreŋkonec warepire Paulozi miti gie paŋšâic bawec, ehuc Jesu e Kristo jâmbâŋ irec fuŋne Judaŋic ritu ɋaɋacke-jarewec. Iŋuc ejareme jaŋe dâŋticne bâsuehuc mu supaic ecnepie ŋaqi-ticne itiriŋkeme gâc wândoc wahame šiŋuc jazawec: “Sipirickeniŋmu irec kiŋ nore mâcne, ŋaŋacne eocmu. Irec ši râpec-ŋoparâ qâpuc jaŋerao sawa gie bapemu.” Iŋuc murâ ŋic moc šâŋene Titio Justo, e Grikŋiczi Judaŋic jaŋere qâjâpecne juwec, ere ficko ferâ ŋeŋe juju ewec. Ficticne Judaŋic jaŋere mitific heririŋ ŋewec. Eme mitificte soŋaŋ šâŋene Krispo e â wiacfâcne jaŋe miti manarâ Jesure kikefuŋ embiŋ. Eme Korinti ŋic jaŋeraonec wâc bocjahazi miti manambiŋ i mana šakierâ Miti Opâ ruambiŋ. Eme ŋafe mocko Wofuŋzi Paulo maŋko fuac ecnehuc šiŋuc âzâcnewec: “Go hâhâwic qamaserâ miti murâ mi behezemec, muhuc jaha juzemec. 10 No sabecguhape ŋic jaŋe wiac kosa mi egareniŋmu. Hae šira nore ŋicfâc guru sâko juŋgopieŋ.” 11 Iŋuc muhuc âzâcneme Paulo e hae irec ŋic Anuture dâŋ jaza qazuc ehuc juhame mosa 18 wahawec.
Paulo qorickepie kiazi dâŋjeŋic qikiŋnewec
12 Eme Galioŋ e Akaia mâreŋko kia sâko erâ juhame Judaŋic jaŋe šâšâfic erâ Paulo râsi ecnehuc kiarao barambiŋ. 13 Bararâ šiŋuc muhuc qorickembiŋ: “Ŋic kecši e sâcmutâc dâŋnâŋec qâsuarâ hata furune moc âtehuc Anutu sâseniŋte ŋic qafeŋ-jopaekac.” 14 Eme Paulo e dâŋ ŋifecne muzo ehame Galioŋzi Judaŋic šiŋuc jazawec: “O Judaŋic, ŋic e kiŋbahac wiac ŋemâcne bâfuame muzac dâŋŋeŋic manazapo. 15 Ŋoŋe ine ŋaŋacne mu qaqazuc dâŋ â ŋicšâŋe wiac â sâcmutâc dâŋ irec dâŋgie râcneŋgopieŋte ŋaŋac mutaranšepieŋ, i nore gie mâcne.” 16 Iŋuc murâ jâpec-jopame wahambiŋ. 17 Eme jaŋe šeŋgoma mitificte soŋaŋ Sostene hâporâ kiare maio qa imac ecnembiŋ. Eme kiazi hone qâoma ejarewec.
Paulo e risierâ Efeso hae fotâcnerâ Jerusalem haeo fewec
18 Paulo e Korinti haeo jufehuc juku opâ ruac mâzoc-joparâ Siria mâreŋko raocte wokeo fewec. Erâ Prisila â Aqila jahe ehec mâmâc rambiŋ. Wokeo fezo ehuc Keŋkereai haeo qizec-ticne rowec. I juwicnao Anuturao mumupaŋ-ticne râerâ qizec mi roro mâc juhame mumupaŋ dameŋ-ticne tarawecte iŋuc ewec. 19 Eme irecnec wokeo raku Efeso haeo fisirâ râwiŋnembiŋ. Eme Paulozi Judaŋic jaŋere mitificko ferâ jaŋehec mitire mu bâtikic embiŋ. 20 Erâ jaŋehec juocte Judaŋic jaŋe sakarezo mupie qatara-jarehuc šiŋuc jazawec: 21 “No Anutuzi maname ŋoŋerao mocwâc risiepemu.” Iŋuc murâ jaŋehec mâmâzoc erâ Efeso haeo wokeo mocwâc ferâ raku 22 Kaisarea haeo fisiwec. Ira fisirâ feraku opâ ruac kikefuŋ jaŋehec âgo sahac hâroŋ eec embiŋ. Erâ Antiokia haeo risiewec.
Paulo e miti kiŋaŋ rame jahec â moc ewec Apolo e Efeso â Korinti haeo miti gie bawec
23 Paulo e Antiokia haeo piticne jurâ miti kiŋaŋ mocwâc rawec. Ehuc Galatia â Frigia mâreŋ fotâc-jofahuc Jesure kikefuŋ sasawa mu âkesiŋ ejare rawec. 24 Ehame Efeso haeo Judaŋic moc fisiwec, šâŋene Apolo. E Alesandria haeo fuawec, ŋic e mamana sâkohec, miti papia woseku mana tara-fârewec. 25 Erâ Wofuŋte miti hata qazucnepie i mâmâc manawec. Miti Opâ i Johanere Miti Opâ sawa manaweczi sifu Jesure binaŋ šocmâsâc bâruŋhec ninic jaha ŋic jaza qazuc ewec. 26 E Judaŋic jaŋere mitificko fuŋkerâ miti acmeruŋ tâmiric munširiŋnehuc muwec. Ira miti mume Prisila â Aqila jahe manarâ âgo jauŋ ecnerâ Anuture miti gâcne âzâcne mutâc epic. 27 Eme Akaia mâreŋko razo mume mitiŋic jaŋe ocnirec opâ ruac jaŋere papia kecšiŋuc qâreŋkembiŋ: “Ŋic e ŋoŋerao fâme âgo ecnenšepieŋ.” Papia iŋuc qâreŋkerâ râcnepie rawec. Eme raku Korinti haeo fisirâ opâ ruac miti giere mâretec bafic-jopawec. 28 Ehuc miti papia irec dâŋqâreŋ hewirickerâ Jesu e Kristo jâmbâŋ irec fuŋne hofao mu rituc ehuc Judaŋic jaŋere dâŋ bawahawec.