12
1 Ŋoŋe socɋâri jaha juhuc bâbâfua‐ŋeŋicte manasuhuc junʒepieŋ: juku ʒâhec ine ʒârâ ʒâpâ dameŋ maic‐ŋopame ʒiŋuc muniŋmu: “Nâŋe jujure mocwâc mi aŋac‐nâpoekac.”
2 Dameŋ ira hâcne mosa ʒoaŋ â bâpiŋ jaŋere tatamaczi gâpâreocmu â karoraczi mocwâc mi tâtieocmu.
3 Ehame meŋeŋic bafic‐ŋopahuc juwec i betaŋkeocmu, â kike‐ŋeŋic sanaŋkerâ domaekac i jâjâwâckeocmu, â micsiec‐ŋeŋic gâcne mârâŋkeme nânâ wiac‐ŋeŋic kidockezo eipieniŋmu, erâ wâc ʒâŋ‐ŋeŋiczi dapâc eme wiac honepie sisifucne eocmu.
4 Hae ʒoŋao fânâŋ wiac fuame sâcne mi mananiŋmu, ehuc padi toŋtoŋko âeckepie irec fânâŋ wâc mi mananiŋmu, â gae wohuc woŋgâŋ qapie irec fânâŋ i wâc iŋuc jaha mocwâc mi mananiŋmu, mâc wipe jaŋe dâŋepie ine guŋkonec mana ɋâɋâreniŋmu.
5 Ŋoŋe dameŋ ira tiki mâreŋko juhuc hâwic‐ŋopaocmu, â hata raniŋte boc eipieniŋmu. Ehame jaŋɋâŋzi âkec‐ŋopaocmu â sasecte tâpiri‐ŋeŋic wâc omaeocmu.
Nâŋâc jujumana hae‐nâŋecko rahapene hae ʒoŋao ki mamakuc fuarâ foocmu.
6 Juju‐nâŋecte niŋgiŋzi tâcneocmu, â lambe‐nâŋec golzi bakicne i waha qanʒaŋneocmu, erâ opâ pakere muc i tâcneha pake e jahacne wâc qanʒaŋneocmu.
7 Sahac‐nâŋec mâreŋzi bakicnere mocwâc mâreŋ jaha eocmu, â qâqâtâc‐nâŋec Anutuzi nârewec e ine mocwâc e jahacnao risieocmu.
8 Erâ wiac i sasawa fâri tâmiriczi fâri tâmiric ekac, Miti Mumu Ŋiczi iŋuc mukac.
Qâqâhâc dâŋ
9 Erâ ine Miti Mumu Ŋic e maŋɋârâŋhec juwecte wiac manawec sâc i sifu ʒuhuckerâ ŋic ŋokac jaza qazuc ewec. Ehuc muqâqiŋ dâŋ gâcne gâcne i jâmbomac me burec irec fuŋne bataniŋkeocte mamana gie sâko bawec.
10 Erâ bâbâmiriŋ dâŋ mu qâreŋ ewec sâc i dâŋ fârine sasawa efârewec.
11 Ŋic maŋɋârâŋhec jaŋe dâŋ mueŋgopieŋ i lama soŋaŋ jaŋere gunu tetecne iŋucne. Erâ i soŋaŋ sâko‐nâŋec, Anutu hâcne, eki tahac‐jopawec.
12 Ŋokâ‐mae, no dâŋ moc gazape manac: Ŋic jaŋe papia qizec bocjaha qâreŋkeeŋgopieŋ, eme go papia i sasawa irec mamana gie ʒoɋachec bahuc betaŋkezicte rucjarige bahuc juzemec.
13 Erâ dâŋ muwarekicne irec fârine mocjaha fokac i wâc gazape manac: Go Anutu araŋ bacnehuc sâcmutâc dâŋticne reŋkezemec. Ŋic nâŋâc wiac i hâcne enaŋte bâfuac‐nâpokicne.
14 Anutu e wiac sasawa, biaŋne me sâqocne, erâ wâc soŋsoŋko ebac ekicne irec sâcko dâŋnâŋec mutaraocmu.