4
1 Eme no mâreŋko wiac hehesicne fua rakac i mocwâc hone‐fârehuc ʒiŋuc hone tarapo: Bâʒâic‐jopakicne jaŋe kiohuc juhapie moczi moc mi bâmiriŋ‐jopawec. Râsifâc‐jeŋic jaŋe tâpirihec jumbiŋte moczi moc mi bâmiriŋ‐jopawec hâcne.
2 Irec no hâmokicne jaŋere manape ʒerine eha ɋâricne juŋgopieŋ jaŋere manape busâqocnehec ekac.
3 Erâ wâc biac mi fuarâ jumbiŋ, ehuc mâreŋko wiac hehesicne fua rakac i mi honembiŋ jaŋere manape ʒerine ekac i fuŋmoc. Wemocte, i hâmokicne me ɋâricne juŋgopieŋ jaŋere manaekopac irec sâc jâurukac.
4 No ŋic jaŋe gie ʒocne fârone bahuc jueŋgopieŋ irec fuŋne kecʒiŋuc hone mana tarac epo: Jaŋe ŋic âgofâc‐jeŋic jaŋe wiac bajueŋgopieŋ irec sâc sirickehuc fua‐jareocte iŋuc hâcne eeŋgopieŋ. Erâ izi wiac fârine mâcne, i mezi mâŋâŋ rorâ basanaŋkezo eipieeŋgopeneŋ irec sâc jaha ekac.
5 Ŋic mutuc matacnezi ojoŋ juhuc nânâre hâmo sipiric eekac i jâmbomac.
6 Erâ ine wiac sisirowenao qohotahuc irec gie ʒocnehec bahuc mâcne, wiac afecne sawa hurehuc maŋwama bâfuapene sâcke‐hâmoocmu.
7 Erâ no mâreŋko wiac moc kecʒiŋuc fuame honeekopac:
8 Ŋic moc e naru motec me hahac ɋafâc‐ticne tâmiric buc juhuc gie ʒocne fârone baekac, ehuc moneŋ mafa hure hemârec eekac irec maname mi sâckeekac. Ehame ʒiŋuc mi wioekac: “No ʒâic gie sâko i more erâ bahuc ʒeri bubiaŋ mi bâfuaekopac?” No mâsi iŋucnere wâc manape wiac racne â busâqocnehec eekac.
9 Ŋic jajahec jahe babafic ehuc gie bapire fârine biaŋne fuaocmu, irec ŋic moc e bucticne mâcne, âgonehec mâmâc jupire sâckeocmu.
10 Ehame jaheraonec moczi waha qame âgonezi sâcne bafahareocmu, â bucticne juhuc waha qame ine mo âgo‐ticnezi bafahareocmu, i aricne i!
11 Me mâmâteŋ dameŋko ŋic jajahec jahe mâmâc jaha fohuc heheâroŋ sâcne enicmu, â ŋic moc e buc fohuc ine fâfâreocmu.
12 Me ŋic moc e buc juhame râsizi fisirâ bawahaocmu, ŋic jajaheczi babafic ehuc ine râsi sâcne jâpenicmu. Repa moc muc jahec â moczi bapene mi tâcneocmu.
13-14 Ŋic waha qaqane moc e mâreŋ‐ticnere ŋicwofuŋ âkendâŋnezo murâ sâcne âkendâŋneniŋmu, â moc e kâpâcwâru ficko ŋekicnezi ŋicwofuŋ ŋeŋeo râepie ŋezo murâ sâcne ŋeocmu; izi juku ŋicqizec erâ mutuc ehuc uŋsawaŋ dâŋ qikiŋneme manacnepie wawahane eocmu, â ŋicmotec hapetaczi maŋɋârâŋhec jume ere ine manapie fefene eocmu.
15 No ŋic sasawa mâreŋko jueŋgopieŋ jaŋere manasuhuc ʒiŋuc mana tarapo: Jaŋere ŋondeŋkonec hâcne ŋicmotec moczi ŋicwofuŋ âkehockeocmu.
16 Ŋicwofuŋ moc e ŋic guru dindiŋ sâko guriŋ bajareocmu mecne, erâ ine wiac ebac ehuc juku hâmohame sifu ŋic moczi irec mocwâc manasuhuc ʒeri bari mi eocmu. Erâ i wiac racne jaha, mezi mâŋâŋ rorâ basanaŋkezo eipieeŋgopeneŋ irec sâc ekac.