31
Farao â ŋicfâcne jaŋe qurutuambiŋ
1 Jara namba 11 irec mosa 3 â irec ʒoaŋ gie bapa wâŋ eha Wofuŋte dâŋ norao kecʒiŋuc fuawec:
2 “Ŋicte ɋâric, go Aigita ŋicwofuŋ Farao â ŋic gurufâc‐ticne jaŋe ʒiŋuc jazazemec:
“Mozi ŋicwofuŋ jujugere sâc bâfuakac?
3 Manakic, no Lebanoŋte jâmâzâc jâcko sâc hecgupe;
jâc e tieŋ taeŋ sâkoneheczi nâkumucnehec,
e ʒoric kikiŋne jâmbâŋ,
â botâŋnezi karorac heuakac.
4 Opâzi bâgunuckeha jâc i
mâreŋ opânehec fowecte boc ʒorawec,
opâzi jâc domawec mâreŋ i sâcke‐fârewec,
ehame jâc gâcne doma rambiŋ jaŋerao opâ afecne sawa rawec.
5 Iŋuc ecnekicnere jâc sasawa siric‐jopa‐fârerâ fewec;
opâ bocjaha fowecko domawecte
tieŋ taeŋne ʒorahuc ŋedâmârewec.
6 Ehame sawa wipe sasawa jaŋe
tieŋ taeŋnao sareŋ‐jeŋic râe‐fârembiŋ;
â kâte qowi jaŋe rurumaŋnao fua sawec embiŋ;
ehame ŋic gurune gurune jaŋe
mumucnao ŋec juc embiŋ.
7 Gâtâne opâmaŋko fowecte
tieŋ taeŋne soka biaŋ eha
jâcsâko erâ domawec.
8 Anuture jufu Edeŋko jâmâzâc gâcne doma rambiŋ
jaŋe ere sâc sâcne mi bâfuambiŋ,
â wetejâc tieŋ taeŋne jaŋe ere sâc wâc aricne;
marojâc gâcne jaŋe tieŋ taeŋ‐ticnere sâc mi bâfuambiŋ
â Anuture jufuo jâc izi me izi
hawari biaŋ iŋucne wâc mi embiŋ.
9 No tieŋ taeŋ bocjaha bâfuacnepe
hawari biaŋ ewec,
ehame Anuture jufuo jâc doma rambiŋ
jaŋe liŋguuŋ ecnembiŋ.”
10 Irec Wofuŋ Anutuzi dâŋ kecʒiŋuc mukac: “Jâc e boc ʒorawecte botâŋnezi karorac heuawec, erâ e boc ʒora‐jâmbâŋkewecte maŋfefe bâfuawec.
11 Eme no irec hâcne mâreŋ sâc ŋic jaŋere ŋic fekicne moc ere meo râepe feocmu, eme eki sindaŋ‐ticnere sâcko wiac ecneocmu. No biac tuŋkepo hâcne.
12 Ŋicguru furune â repic qapicne jaŋe jâc i hetâc qâtâcnerâ behepie foocmu. Tikio mecne â wâneŋko mecne tieŋ taeŋne waha‐fârerâ hericke ʒaŋ ehuc mâreŋ opânehecko foraocmu; ehame mâreŋ sâc irecnec ŋic jaŋe nâkumuc‐ticne beherâ wise‐fâreniŋmu.
13 Eme sawa wipe jaŋe qâŋɋâŋnao waha herâ ŋeniŋmu, â kâte qowi jaŋe tieŋ taeŋnere maŋnao ŋec foc eniŋmu.
14 Mâsi i jâc izi me izi opâ heririŋko domahuc soka ʒora enʒipiŋte me botâŋ‐jeŋiczi karorac heuanʒipiŋte fuawec, erâ jâc gâcne jaŋe opâzi bâgunuc‐jopame jaŋere sâc jaha enʒipiŋte mâsi i fuawec. Jaŋe hâmocte biŋe efâreniŋte mukicne hâcne, eme ŋic hâmorâ nombâŋko humbiŋ jaŋerao ʒuhuckerâ huniŋmu.”
15 Wofuŋ Anutuzi kecʒiŋuc mukac: “Hâmoc haeo huocmu dameŋ ira mâreŋmaŋko opâ fokac i ecnepe ʒicke kereŋ ezejec, erâ opâ sâko aka hejarepe kereŋke‐fârenʒepieŋ. Eme Lebanoŋ tiki mâreŋ i hahaŋke‐fâreha jâc wiac‐ticne hâmo ururuc efâreocmu.
16 Eme jâc i gâcne jaŋe hâmorâ hâmoc haeo humbiŋ jaŋerao tuŋkepe hume ŋicne ŋicne jaŋe fânâŋ‐ticnere fâfâreniŋmu. Iŋuc fuame jâc wiac biaŋne gâcne Edeŋ jufuo opâ heririŋko domaku gârecke ʒaŋ embiŋ jaŋe honerâ âke mâteŋ‐jopaocmu.
17 Jei, nâkumuc‐ticnao ŋec juc embiŋ jaŋe hâmo sipiric ehuc ehec mâmâc ʒikazi jopakicne jaŋerao hâmoc haeo huniŋmu.
18 O Farao, go tâpiri â ʒâŋe biŋegehec, go Edeŋ jufuo jâc doma rambiŋ jaŋeraonec jâc wenimoihec sâc hecgupe? Go Edeŋ jufuonec jâc jaŋehec hâmoc haeo huzemec: Go sahac‐jeŋicko ma mi bakicne, erâ ʒikazi jopakicne jaŋere ŋondeŋko hurâ fozemec.
“Farao â ŋic gurufâc‐ticne jaŋe wiac iŋuc hâcne fua‐jarezejec. Wofuŋ Anutu nore dâŋ iŋuc.”