35
Seiri tiki mâreŋte okacdâŋ
1 Wofuŋte dâŋ norao ʒiŋuc fuawec:
2 “Ŋicte ɋâric, go Seiri tiki maickehuc okacdâŋ‐ticne muzemec.
3 Ehuc ʒiŋuc âzâcnezemec: Wofuŋ Anutuzi ʒiŋuc mukac: O Seiri tiki mâreŋ, manakic, no râsi egarehuc ima bacgupe niniŋ siarereŋ fuarâ fozemec.
4 No haefâcge ŋeraŋgopieŋ jaŋe sipiric‐jopape sesuctac fuarâ fohapie, no hâcne Wofuŋ jukopac i mana tarazemec.
5 Go rârâsi sanaŋ erâ juhuc Israe ŋic jaŋe ʒârâ hâriŋ â bâbâtiŋ dameŋ sâko‐jeŋicko ʒikare meo râec‐jopameŋ.
6 Irec Wofuŋ Anutu no jujâmbâŋkekopacte ʒiŋuc mukopac: Go soc hoŋkehuc kiŋ bâfuameŋte gore soc iŋuc jaha hoŋkeniŋte mukopac. Go ira me ira jucmu sâc socge hoŋkeniŋmu hâcne.
7 No Seiri tiki mâreŋ imackepe niniŋ siarereŋ fuarâ foha ira sicne fotâc eeŋgopieŋ jaŋe bâsirowec‐jopapemu.
8 Ehuc tiki mâreŋge i ʒikao hâmombiŋ jaŋere qâŋɋâŋzi hefusepe tikine tikine â wâcne wâcne erâ opâne opâne sâcke‐fârerâ foraniŋmu.
9 No imacgupe tuhutac sanaŋ fuarâ fohaŋ hae sasawage ira ŋiczi ŋec juc mocwâc mi enʒepieŋ. Iŋuc fua‐gareme, no hâcne Wofuŋ jukopac i mana tarazemec.
10 “Wofuŋ no Juda â Israe mâreŋko juhape jaha go sifu pepecne ehuc dâŋ ʒiŋuc mumeŋ: ‘No ŋicguru i jahe â mâreŋ‐jekic ro rauc ejarepe nore biŋe enʒepieŋ.’
11 Irec hâcne no Wofuŋ Anutu jujâmbâŋkekopacte ʒiŋuc mukopac: Go kimbeŋ aaricko qaisoc‐jopahuc jumeŋ irec sâc jaha go egarepemu, ehuc dâŋge mutarape fuŋne‐nane mana tarazemec.
12 Erâ ʒiŋuc mananʒepieŋ wâc: Israe tiki mâreŋte dâŋ ʒiŋuc musâqorembiŋ i Wofuŋ no mana‐fârepo: ‘Tiki mâreŋ i ima bakicnere nâŋere biŋe eocte mana‐nârekicne.’
13 Ŋoŋe iŋuc muhuc pepecne enarerâ râsi enarehuc fenarepie manapo.
14 Irec Wofuŋ Anutu no ʒiŋuc mukopac: No ima bacgupe niniŋ siarereŋ fuarâ fohaŋ mâreŋ sâc ŋic jaŋe hone gâgâwi egarenʒepieŋ.
15 Israe kikefuŋ jaŋere mâreŋ tuhutac fuarâ foha honerâ bubiaŋ manameŋte no Seiri tiki â Edom mâreŋ sasawa ŋoŋe iŋuc jaha eŋarepe tuhutac fuarâ fonʒepieŋ. Ehuc no hâcne Wofuŋ jukopac i mana taranʒepieŋ.”