41
Taha ufuŋte dâŋ
1 Eme ʒuhuckerâ jowacnurâ furuficko fisihuc wâtuŋ wiac sâc bawec. Wâtuŋ otecne ŋifec â ŋifec irec sâc kubi 6.
2 Motâc raraʒi irec sâc i kubi 10, erâ motâc raraʒi sâpe ŋifec â ŋifec doma rawec irec sâc kubi 5 jaha. Eme furufic ʒoricne‐ticnere sâc bame kubi 40 ewec â bembeŋne‐ticnere sâc bame kubi 20 ewec.
3 Izi ine maŋne mocko raʒirâ motâcte wâtuŋ sâc bame kubi 2 ewec. Raraʒire sâc ine kubi 6 â ŋifec â ŋifec sâpe doma rawec ine kubi 7.
4 Eme fic maŋne irec sâc bame hâŋne‐ticne kubi 20 â otecne‐ticnere kubi 20 jaha ewec. Ehame dâŋ ʒiŋuc nazawec: Ficmaŋ ʒi furu dindiŋ hâcne.
5 Erâ taha ufuŋte sâpe irec sâc bame kubi 6 ewec, erâ fic maŋne gâcne taha ufuŋ râreckehuc forawec irec sâpene sâc bame kubi 4 ewec.
6 Fic maŋne ŋifec â ŋifec forawec i feŋgaŋne feŋgaŋne bafekicne. Feŋgaŋne jahec â moc bakicne, erâ feŋgaŋne sâc fic maŋne 30 forawec. Ehame fic ʒuhucne dopeckeocte taha ufuŋ sahacnao dope râe rakicne.
7 Fic ʒuhucne maŋne maŋne i feŋgaŋne sâc bâsokahuc bafekicne. Erâ i taha ufuŋ rârec rârec feŋgaŋne feŋgaŋne dope wiac râe fembiŋ sâc bâsokahuc bakicne. Taha ufuŋ heririŋnao riri moc domawec; eme faic fezo manasuhuc riri ira hâcne fuŋkerâ fic feŋgaŋne feŋgaŋne fe fisizo.
8 Eme no taha ufuŋ rârec rârec qânâ herakupie hata toŋne eme honepo, ehame fic maŋne maŋne irec ɋâriŋte sâc bame kubi 6 ewec.
9 Fic ʒuhucnere sâpe irec sâc kubi 5 â ʒaenere sâc i kubi 5 jaha.
10 Taha ufuŋ ʒaene â hae ʒoŋare fic maŋne irec sawane ŋifec â ŋifec forawec irec sâc i kubi 20.
11 Eme fic maŋne maŋne ŋifec â ŋifec forawec irec motâc ʒaeopec aŋke‐fârewec; motâc moc i faic mâreŋkopec aŋkewec â motâc moc i juwic mâreŋkopec aŋkewec, erâ taha ufuŋ râreckehuc ʒae moc fowec irec otecnere sâc i kubi 5 ewec.
12 Eme fic moc ʒoaŋ huhunaopec taha ufuŋ maickerâ ŋewec irec bembeŋnere sâc kubi 70; ehame sâpe‐ticne rârec rârec forawec irec sâc i kubi 5, â fic ʒoricne‐ticnere sâc i kubi 90.
13 Erâ taha ufuŋte sâc bame kubi 100 ewec, ehame hae ʒoŋa â fic erâ sâpe irec sâc rome kubi 100 ewec.
14 Erâ izi ʒoaŋ wewefunaopec sâpe â hae ʒoŋa‐ticnere sâc rome kubi 100 jaha ewec.
15 I tarame fic moc ʒoaŋ huhunaopec sac heririŋko ŋewec i â sâpe‐ticne ŋifec â ŋifec irec sâc bame kubi 100 efârewec.
Eme furufic â furu dindiŋ â hae gâŋgâŋ irec sâpe fic maŋnao forawec i sasawa katapazi foŋke‐fârekicne,
16 erâ fic maŋne jahec â moc i jaŋe qâqâtâc kataŋ‐jeŋichec sasawa; sâpe rârec rârec forawec i juwic mâreŋkopec fuŋkerâ katapa qa wefukupie qâqâtâc kataŋko tarawec. (Qâqâtâc kataŋko ine sâsâoc fowec.)
17 Eme motâc faicnao â furu dindiŋ maŋnao â râpenao ira sâpeo metâ bahuc hawari wiac râekicne.
18 Hawari wiac kecʒiŋuc: Kerubim â hâmujâc. Kerubim jajahec jahere ŋondeŋko hâmujâc hawari moc, â kerubim jajahec jahere ŋondeŋko hâmujâc hawari moc, iŋuczi iŋuc râe rakicne. Kerubim jaŋe ine ʒâŋe mai‐jeŋic jajahec jajahec sasawa.
19 Ʒâŋe mai‐jeŋic ŋic hawari tinac; ŋifec izi hâmujâc hawari moc maickewec â ʒâŋe mai‐jeŋic laioŋ hawari tinac izi ine hâmujâc hawari ŋifec maickewec. Metâ hawari i jaŋe ufuŋ maickerâ doma rambiŋ.
20 Kerubim â hâmujâc i jaŋe mâreŋkonec fuŋkerâ râe feku sâpeo râe tarakicne.
21 Furufic motâcte wâtuŋ i titikine 4, 4 sasawa; ehame furu dindiŋ maickehuc wiac moc alata tinac ŋewec.
22 Wiac i jâczi bakicne, erâ kâcɋene‐ticnere sâc i kubi 3 â ʒoricne‐ticnere sâc i kubi 2 erâ otecne‐ticnere sâc i kubi 2 jaha. Tuturuŋne me fâhâŋnere sâpene i jâczi jaha bakicne. Eme sâc bapa ŋic eki ʒiŋuc nazawec: “Tebo ʒizi hâcne Wofuŋte maio ŋeekac.”
23 Furufic mecne, furu dindiŋ mecne jahere motâc i ɋâɋâdoc.
24 Motâc sâko jahe kataŋ‐jekichec, ehame kataŋ moc ŋifec â moc ŋifec aŋkepic.
25 Furufic motâcko ine kerubim â hâmujâc hawari domambiŋ, jaŋe sâpeo doma rambiŋ jaŋere sâc jaha. Hae gâŋgâŋnao ira ine jâczi bupu uuŋnehec bakicne.
26 Erâ hae gâŋgâŋnere sâpe ŋifec â ŋifec ine qâqâtâc kataŋ â hâmujâc hawari doma rambiŋ.