9
Ŋic hehesicne jopakicne
1 Eme Mârozi owackerâ kecʒiŋuc mume manapo: “Jerusalem haere okac babazu gie baniŋte muŋarekicne ŋoŋe momori wiac‐ŋeŋic barâ bembeŋko warenʒepieŋ.”
2 Iŋuc mume ŋic 6 jaŋe momori wiac‐jeŋic barâ motâc faicpec irecnec wahambiŋ. Ŋic moczi ine qoruc qarâ tinde â feda kikene becsahac‐ticnao râerâ jaŋehec mâmâc wahawec. Eme jaŋe raʒirâ alata aeŋ bâbâroŋzi bakicne irec maŋfuŋko domambiŋ.
3 Israere Anutu ere huriri qâreŋzi kerubimte faio foweckonec waharâ ficmotâcko fowec. Ehame Wofuŋzi ŋic qoruc qarâ tinde â feda kikene bajuwec e wiracnewec.
4 Ehuc ʒiŋuc âzâcnewec: “Jerusalem haeo wiac mamakâcne fuarâ fokac, irec go hae i fotâcnehuc haere ki busâqoc eeŋgopieŋ ŋic i jaŋere ʒâŋe maio ma bazemec.”
5 Erâ ŋic gâcne jaŋe dâŋ ʒiŋuc jazame manapo: “Ŋoŋe e bâjâperâ hae fotâcnehuc ʒika gie banʒepieŋ, ehuc ŋic busâqoc mana‐jarehuc moc mi akic‐jopanʒepieŋ.
6 Ŋoŋe ŋic raŋɋa mecne, socɋâri mecne, naru mecne, ɋiene mecne â ŋokac mâmâc qâhâmoc‐jopanʒepieŋ; mâc ʒâŋe mai‐jeŋicko ma bakicne jaŋe ine ba bâuwac moc mi ejarenʒepieŋ. Gie i ine tiri ufuŋ‐naneo domarâ fuŋkenʒepieŋ.” Iŋuc mume jaŋe soŋaŋ micne tiri ufuŋko jumbiŋ jaŋerao fuŋkembiŋ.
7 Eme dâŋ ʒiŋuc ʒuhuckerâ jazawec: “Tiri ufuŋ wâwânâŋ ecnehuc qâhâmoc‐jopakicne jaŋe ufuŋte hae ʒoŋao behec‐jopapie fusucmarâ foranʒepieŋ. Ajoc, faharerâ fuŋkeniŋ!” Eme jaŋe fahare haeo rarâ ʒika gie fuŋkembiŋ.
8 Eme jaŋe ʒika qahuc juhapie no nahackoaŋ buc juhuc mâreŋko hetutuckerâ ʒiŋuc muhuc wirapo: “O Wofuŋ Anutu, go Jerusalem haere boc aaricguhame Israe ŋic nâfocne sipiric‐jopa‐fârezo mukomec me?”
9 Iŋuc mupe ʒiŋuc nazawec: “Israe â Juda kikefuŋ jaŋere kiŋ i boc ferâ fokac, soczi hae mâreŋ sâckerâ fokac â hehesiczi hae fusucma‐fârekac. Jaŋe ʒiŋuc mueŋgopieŋ hâcne: ‘Wofuŋzi mâreŋ‐nâŋec qâmâtâ ecnewec, Wofuŋ e mi honec‐nâpoekac.’
10 No ine busâqoc mana‐jarehuc moc mi akic‐jopapemu, aricne, no eebapa‐jeŋicte okacne fai‐jeŋicko râepe feocmu.”
11 Iŋuc mume ŋic qoruc qarâ tinde â feda kikene bajuwec eki risierâ ʒiŋuc muhuc âzâcnewec: “No wiac mutâcne‐naremeŋ irec sâc efârepo.”