3
Anutu numu hefârec eecne i mocwâc heɋârembiŋ
1 Israe ŋic jaŋe hae‐jeŋic sâc juhapie mosa 7 wahame maŋ mocjaha ehuc Jerusalem haeo tumaŋne‐fârembiŋ.
2 Ehame Jozadacte ŋokâ Jesua â taha bapa âgofâc‐ticne erâ Sealitire ŋokâ Serubabe â soctofafâc‐ticne jaŋe faharerâ Anuture ŋic Mosere sâcmutâc dâŋko qâreŋkekicne irec sâcko qowi bâzi rikeniŋte Israere Anutu ere alata bambiŋ.
3 Jaŋe mâreŋ sâc irec ŋicne ŋicne jaŋere hâwic‐jopawecte alata i fuŋkerâ ŋeŋe‐ticnao bapie ŋewec. Eme jaŋe ira Wofuŋte qowi bâzi i furic owâc rikembiŋ.
4 Erâ mujarekicne irec sâcko tiri bozere hombaŋ ŋembiŋ. Ehuc mumutâc dâŋko ʒare mutâcne‐jarekicne irec sâc ʒoaŋne ʒoaŋne qowi bâzi rike jumbieŋ.
5 Eme ira ʒuhuckerâ dameŋ sâc wiac kecʒiŋuc wâc rike râec ejumbieŋ: Qowi bâzi, mosa furunere taha bâzi, dameŋ mukicnao Wofuŋte tiwâ bâzi erâ buafecko Wofuŋ taha babacne.
6 Jaŋe mosa 7 irec ʒoaŋ gie bapa fufuŋkenao fuŋkerâ Wofuŋ qowi bâzi rikecnembiŋ. Erâ ine Wofuŋte taha ufuŋ irec hobeteŋne i biac mi râembiŋ.
7 Eme irec jaŋe moneŋ i qânâzi fic bapa ŋic â kamunda jarembiŋ. Ehuc nânâ opâ â wokemaŋ ine Sidoŋ â Tiro ŋic jaŋe Lebanoŋ mâreŋkonec jâmâzâc jâc i Perisia ŋicwofuŋ Kiruzi mana‐jarewec irec sâc hâwecko Jope haeo bafisiniŋte jarembiŋ.
Taha ufuŋ mocwâc heɋârerâ bambiŋ
8 Eme jaŋe Jerusalem haeo Anuture ufuŋko fisirâ juwefukupie jara namba 2 irec mosa jajahec eha Sealitiere ŋokâ Serubabe â Jozadacte ŋokâ Jesua jahe gie fuŋkehapire qomâfâc‐jekic gâcne taha bapa â Lewiŋic erâ kâpâcwâru bacjopa rakicne jaŋe Jerusalem haeo risierâ bafic‐jopambiŋ. Erâ Lewiŋic jara‐jeŋic 20‐o domarâ faic fekac jaŋe Wofuŋte ufuŋ irec gie qizeckeniŋte âkendâŋ‐jopambiŋ.
9 Eme Jesua â ŋokâfâcne erâ soctofafâc‐ticne, erâ Judare ɋâricfâc Kadimiele â ŋokâfâcne jaŋe Henadadire ŋokâfâc â Lewiŋic â ŋokâfac‐jeŋic erâ soctofafâc‐jeŋic jaŋehec Anuture ufuŋ bambiŋ gieŋic i jaŋe hone soŋaŋ ejarembiŋ.
10 Eme ufuŋ bambiŋ jaŋe Wofuŋte taha ufuŋte hobeteŋne râepie tarame Israe ŋicwofuŋ Dawidizi mutâcnewec irec sâcko taha bapa jaŋe Wofuŋ ʒeri mumuteŋ ecneniŋte ŋaqi‐jeŋichec qeŋ barâ fisimbiŋ, â Asafare ɋâricfâc Lewi guru jaŋe woŋgâŋ‐jeŋichec fisimbiŋ.
11 Ehuc nareŋ gareŋko Wofuŋ daŋge â ʒeri mumuteŋ ecnehuc gae ʒiŋuc hembiŋ:
“Wofuŋ e uruc jauŋ‐ticnehec,
â aki anonoc‐ticne i Israe ŋic nâŋâcnao
fofo sanaŋ foekac.”
Ehame ŋic ŋokac jaŋe Wofuŋ ufuŋ‐ticnere hobeteŋ râepie tarawec irec Wofuŋ ʒeri mumuteŋ ecnehuc kâcɋene owackembiŋ.
12 Ehame bocjaha jaŋe ʒeri sâko ehuc owackembiŋ, erâ taha bapa â Lewiŋic bocjaha erâ garikiŋ sâc irec micne ŋicqizec jaŋe ine ufuŋ hobeteŋne râepie tarawec i honerâ ufuŋ raŋɋane ŋeme honembiŋzi owa ruruckerâ kiombiŋ.
13 Eme mâretec owa ruruckembiŋte ŋic ŋokac taicko juhuc fânâŋ manambiŋ jaŋe ʒerire owa â kifânâŋ i sâcne mi mana râwiŋ‐jofambiŋ.