5
Taha ufuŋ heɋârerâ bambiŋ
1 Eme porofete jajahec Hagai â Ido ŋokâ‐ticne Ʒekaria jahe Judaŋic Juda mâreŋko â Jerusalem haeo jumbiŋ jaŋe qâhuc‐joparâ juwec, Anutu hâcne, ere ʒâŋeo findaŋdâŋ jazapic.
2 Ehame Sealitiere ŋokâ Serubabe â Jozadacte ŋokâ Jesua jahe fuŋkerâ Anuture ufuŋ Jerusalem haeo ŋewec i heɋârerâ bapic. Ehame porofete gâcne jaŋe bafic‐jofarâ bambiŋ.
3 Eme dameŋ ijaha Eufrata opâ ocniŋucnao mâreŋ fowec irec soŋaŋ Tatenai â Seta‐Boʒinai erâ âgofâc‐jekic jaŋe fisirâ kecʒiŋuc muhuc jazambiŋ: “Mozi ufuŋ ʒi baku bataraniŋte mana‐ŋarewec?”
4 Erâ wâc ʒiŋuc wio‐jarembiŋ: “Ufuŋ ʒi baŋgopieŋ ŋic i jaŋere ʒâŋe mo?”
5 Mâc Anutuzi ine Juda micne hone soŋaŋ ejarewecte mi bâniniŋ‐jopahuc irec biŋedâŋ moc Dariusirao rame bâfuarâ irec okacne papiao bârisie‐jareocte manasumbiŋ.
6 Eme Eufrata opâ ocniŋucnao mâreŋ fowec irec soŋaŋ Tatenai â Seta‐Boʒinai erâ mâreŋ soŋaŋ âgofâc‐jekic Eufrata opâ ocniŋucnao jumbiŋ jaŋe papia râepie ŋicwofuŋ Dariusirao rawec.
7 Jaŋe ŋicwofuŋ dâŋ binaŋ ecnehuc ʒiŋuc qâreŋkembiŋ: “Ŋicwofuŋ Dariusi, wama gorao fozejec.
8 Ŋicwofuŋ go ʒiŋuc manac: Nâŋe Juda mâreŋko Anutu fekicne sâko ere ufuŋ ŋekac ira rambeŋ. Ufuŋ i qânâ kâcɋene sâkozi bambiŋ â haesac i katapazi basanaŋkembiŋ. Erâ gie i aijakic jaha bapie fua‐hâmokac.
9 Eme nâŋe soŋaŋ micne ʒiŋuc muhuc wio‐jarembeŋ: ‘Mozi ufuŋ ʒi baku bataraniŋte mana‐ŋarewec?’
10 Erâ ŋic micne bajarepie gie i baŋgopieŋ jaŋere ʒâŋe qâreŋkerâ râepene fâme honecmurâ ʒâŋe‐jeŋicte wâc wio‐jarembeŋ.
11 Eme jaŋe okacne ʒiŋuc bâtikie‐nârembiŋ: ‘Nâŋe sambâŋ â mâreŋte Anutu ere kiŋaŋ qaqafâc. Nâŋe Israe ŋicwofuŋ fekicnezi mârâc jaha ufuŋ baku batarawec i mocwâc heɋâreŋgopeneŋ.
12 Apa ŋosafâc‐nâŋec jaŋe sambâŋte Anutu aaric bâfuacnepie Kaldea ŋic Babe ŋicwofuŋ Nebukanezare meo râec‐jopame eki ufuŋ ʒi bâsirowehuc ŋic ŋokac rocjoparâ Babe mâreŋko bacjopa rawec.
13 Ehame juku Babe ŋicwofuŋ Kiruzi fuŋkerâ ŋicwofuŋ ewec jara ira ŋicwofuŋ eki ufuŋ ʒi heɋârerâ banaŋte mana‐nârewec.
14 Ehuc Anuture ufuŋte kuʒi râqâc wiac gol â siliwazi bakicne i Nebukanezazi Jerusalem haeo taha ufuŋ ŋewec irecnec ro bararâ Babe taha ufuŋko râewec. Eme wiac i ŋicwofuŋ Kiruzi Babe taha ufuŋkonec bawaharâ e jahac ŋic moc ʒâŋene Sesibaza mâreŋ soŋaŋ âkendâŋnewec ere meo râewec.
15 Ehuc ʒiŋuc âzâcnewec: “Go kuʒi râqâc wiac ʒi rorâ bara Jerusalem haeo taha ufuŋ ŋekac ira râezemec. Erâ Anuture ufuŋ i mutec ŋeŋetac‐ticnaoa banʒepieŋ.”
16 Eme Sesibaza e warerâ Jerusalem haeo Anuture ufuŋ ŋekac irec hobeteŋ râewec. Eme dameŋ irecnecteaŋ bawefuhuc jaha juŋgopeneŋ, erâ mi tarakac.’
17 Irec ŋicwofuŋ go manatec sâckeme Babe mâreŋko ira ŋicwofuŋte papia raŋɋane qâzuckekicne fokac ira wose gufuc ezemec. Ehuc ŋicwofuŋ Kiruzi Jerusalem haeo Anuture ufuŋ mocwâc heɋârerâ baniŋte moc mana‐jarewec me mâcne i honezemec. Ehuc ŋicwofuŋ go dâŋ weniŋuc manasukic i râe‐nâretec honenʒepeneŋ.”