25
Abrahamte ɋâricfâc gâcne
(Bin I 1:32–33)
1 Abraham e juku mocwâc ŋokac moc bawec, ʒâŋene Ketura.
2 Eme eki ŋokâ ʒiŋuc rocjopawec: Ʒimiraŋ, Jokisaŋ, Medaŋ, Midiaŋ, Isibake â Sua.
3 Jokisaŋ ere bifuŋko ine Seba â Dedaŋ jahe fuapic, eme Dedaŋ ere ŋokâfâc ine ʒiŋuc fuambiŋ: Asurim, Letusim â Leumim.
4 Midiaŋ ŋokâfâcne ine ʒiŋuc: Efa, Efere, Hanoki, Abida â Elda, ŋic i jaŋe sasawa Ketura ere ɋâricfâc hâcne.
5 Abraham eki ine moneŋ mafa wiac‐ticne Isaka râcne‐fârewec.
6 Ŋonâŋocfâc‐ticne jaŋere ŋokâfâc ine mâc taha wiac gâcne jarerâ Isakahec mi junʒepieŋ muhuc ʒoaŋ wewefunaopec mâreŋ fokac ira sorec‐jopame rafârembiŋ.
Abraham hâmowec
7 Abraham e jufeku jara‐ticne 175 bazuwec.
8 E jujâmbâŋkeku ŋicqizec erâ hâmowec. Ehuc mimiŋnefâc‐ticne hâmombiŋ jaŋerao ʒuhuckewec.
9 Eme ŋokâ jahec‐ticne Isaka â Isimae jahe Makepela hawecko duckepic. Hawec i Hitiŋic Zoari ŋokâ‐ticne Eferoŋte gieo fowec. Gie i hâcne Mamere ocniŋucnao fowec.
10 Gie i Abrahamzi Hitiŋic jaŋeraonec furine bawec. Ira hâcne Abraham â ŋonâŋ‐ticne Sara ducjofakicne.
11 Eme Abrahamzi hâmome Anutu e ŋokâ‐ticne Isaka jambuŋkewec. Isaka eki ine opâ moc ʒâŋene “Juju runezi honecnuekac ere opâ ʒâŋe”, ira ŋec juc ewec.
Isimaere ɋâricfâc
(Bin I 1:28–31)
12 Abraham ŋokâ‐ticne ʒâŋene Isimae, Sara kiŋaŋ naru‐ticne Aigita ŋokac Hagazi rowec eraonec ŋic fuambiŋ jaŋere binaŋ ʒine hâcne:
13 Isimae ŋokâfâcne jaŋere ʒâŋe ʒi, fua rambiŋ sâc râekicne hâcne: Mârâc ŋokâ‐ticne Nebajoti izi Kedara, Adibele â Mibesam,
14 erâ Misima, Duma â Masa,
15 Hadadi â Tema, Jeturu, Nafisi erâ Kedema.
16 Ŋic i jaŋe hâcne Isimaere ŋokâfâc, ʒâŋe‐jeŋic i hae‐jeŋic â qoruc boze‐jeŋic ŋerakac sâc mukicne. Jaŋe guru‐jeŋicte sâc ŋicwofuŋ 12 jumbiŋ.
17 Â Isimae dameŋ‐ticnere fuŋne ine ʒiŋuc: E jufeku jara 137 bazurâ hâmohuc mame sâkofâc‐ticne jaŋerao ʒuhuckewec.
18 Jaŋe Hawila â Suru, Aigita mâreŋ ʒoaŋ wewefunaopec mâreŋ ŋondeŋ moc ira jumbiŋ. Soctofafâc‐ticne jaŋere mâreŋ heririŋko juwec hâcne.
Esau â Jakobo
19 Ʒi Abrahamte ŋokâ Isakare binaŋ.
20 Isaka e jara‐ticne 40 bazurâ Rebeka ŋonâŋ‐ticne rowec. E ine Mesopotamia mâreŋkonec Aramea ŋic Betuele ere otâ Labaŋte seŋ.
21 Eme Isaka e ŋonâŋ‐ticnezi hufiŋ juwecte ere erâ Wofuŋ numucnewec. Eme Wofuŋ e manacneme Rebekazi motec kiweckewec.
22 Ehame kogoc jajahec jahe neŋgocte bumaŋko hehec epire ʒiŋuc muwec: “Iŋuc fuame wemocko jupemu?” Erâ ra Wofuŋ mu wioc ecnewec.
23 Eme Wofuŋzi ʒiŋuc âzâcnewec:
“Bumaŋgao ŋicguru jajahec fokopirec,
ŋicguru jajahec goraonec fuarâ râwiŋnenicmu hâcne.
Ŋicguru moczi mocte femicne erâ juocmu,
bâbânizi ʒâhec ere kiŋaŋ qaocmu.”
24 Eme motec roro dameŋ‐ticne maickeme bunaonec mi funʒuŋ fâri fuazepirec i!
25 Bâbâni fuawec ere sahac i bâbâroŋ â ŋaqi kanʒaŋnehec iŋucne, irec ʒâŋe‐ticne Esau mukicne.
26 Izi ɋaticne fuawec, e meticnezi Esau kike kiririŋnao bahuc fuawecte ʒâŋene Jakobo mumbiŋ. Isaka e jara‐ticne 60 eha ŋokâ jahec‐ticne fuapic.
27 Eme motec jahe juku sokarâ Esauzi wosaŋeŋ gie bahuc irec fuŋne manawec, ehuc kâteo kosa jujujec, Jakobo eki ine ŋic pectâcnezi haeo juhuc gie bawec.
28 Isaka e kâte qowire boc aŋackewecte maŋticne Esaure kâcɋene domawec, Rebeka e ine Jakobore maname joroc biaŋ‐ticne ewec.
29 Eme Jakobo e juku nânâ wiac rikewec. Ehame Esauzi kâteonec fisirâ nânâre betaŋkehuc
30 Jakobo ʒiŋuc âzâcnewec: “Wiac bâbâroŋ keci moc biac naretec nâpe, no nânâre hâmo sâqorekopac i!” Irec hâcne ʒâŋe‐ticne Edom mukicne.
31 Jakobozi ine muwec: “Mârâc fufuare wiac biŋege qikiŋne‐narec.”
32 Mume Esauzi dâŋ ʒiŋuc bâtikiecnewec: “Manakic, no hâmopemu irec bucne, irec mârâc fufuare wiac biŋe qanarekicne izi wemocko moc baficnuocmu.”
33 Jakobozi muwec: “Qanaŋ mupaŋke‐narec.” Eme mupaŋkecnehuc mârâc fufuare wiac biŋe‐ticne Jakobo qikiŋnecnewec.
34 Eme Jakobozi Esau poroŋ â basac bâbâroŋ rikekicne râcnewec. Eki ine nânâ opâ nârâ faharerâ rawec. Esau e iŋuc ehuc mârâc fufua‐ticnere wiac biŋe qaisockewec.