32
Jakobozi risiewec
1 Eme Jakobo e iŋuc jaha hata‐ticnao rawec. Rahame Anuture aŋelofâc jaŋe hatao bâfuambiŋ.
2 Eme Jakobozi honec‐joparâ muwec: “I Anutu momorifâc‐ticne jaŋere toma i!” Irec hae mâreŋ irec ʒâŋe Mahanaim muwec.
3 Erâ Jakobore hahac Esau e Seiri mâreŋko Edom hae mâreŋko hâcne juwec. Eme Jakobozi kiŋaŋŋic erao sorec‐jopame bânierâ rambiŋ.
4 Ehame ʒiŋuc jazawec: “Ŋoŋe bomboŋ‐nane Esau ʒiŋuc âzâcnenʒepieŋ: Kiŋaŋŋicge Jakobo e ʒiŋuc mukac: ‘No mâreŋ ʒoricko Labaŋhec juwarehuc jupo.
5 No lama, bulimakao, doŋgi â kiŋaŋŋic ŋokac rauc‐jopapo. Eme bomboŋ‐nane go âgo enarecmurâ biŋedâŋ i hâcne râepe fakac.’ ”
6 Eme kiŋaŋŋic jaŋe Jakoborao risierâ ʒiŋuc âzâcnembiŋ: “Nâŋe hahacge Esau bâfuambeŋ, e biac bâfuacguocte ŋicfâc‐ticne 400 jaŋehec warehuc jukac.”
7 Eme Jakobo e hâwicke sâqoreme maŋticne gâckewec. Irec ŋicfâc‐ticne mecne, lama bulimakao â kamelefâc‐ticne mecne bâfâuc‐jopame guru jajahec embiŋ.
8 I ʒiŋuc muhuc ewec: “Esau e guru moc jopaocmuo ine guru moc jaŋe sâcne wiserâ raniŋmu.”
9 Erâ Jakobozi ʒiŋuc muhuc numuwec: “O Wofuŋ, mamac ŋosa jahec‐nane Abraham â Isaka jahere Anutu, goki hâcne ʒiŋuc nazameŋ: ‘Go mâreŋ qizecgao â soctofafâcge jaŋerao risietec ehâmo‐garepemu.’
10 Go kiŋaŋŋicge waha qaqane no buuruc â bubiaŋ sâc mo iŋucne qanaremeŋ. No gunu‐nane sawa bajuhuc Jordaŋ opâ ʒi fotâcnerâ rapo, ʒi ine sawe mâririackerâ warehuc guru jajahec ekopac.
11 Irec go ŋezicnurâ hahac‐nanere meonec bataracnuzemec, e ware no mecne, naru motecfâc‐nane mecne, â neŋgocfâc‐jeŋic mâmâc qâhâmoc‐nâpozacte hâwicnukac.
12 Go gahac ʒiŋuc hâcne mumeŋ: ‘No bubiaŋ qagarehuc ɋâricfâcge basawec‐jopape hâwecko moŋgeŋ fokac irec sâc enʒepieŋ, i guru sâkore wowosene tâmiric ekac.’ ”
13 Eme Jakobo e ŋafeo ira guŋ fowec. Hae fureme ine wiac hurewec irecnec gâcne hahac‐ticne Esau bubiaŋ qacneocte ʒiŋuc bâwosâewec:
14 Noniŋ ŋokacne 200 â ŋicne 20, erâ lama ŋokacne 200 â ŋicne 20,
15 kamele susu bapazi motecnehec 30 a bulimakao ŋokacne 40 â ŋicne 10, erâ doŋgi ŋokacne 20 â ŋicne 10.
16 Wiac i hâcne gurune gurune buc buc kiŋaŋŋicfâcne jaŋe jarehuc muwec: “Ŋoŋe bânie‐narepie qowi gurune gurune jaŋere ŋondeŋko sawane fozejec.”
17 Â micne bawec e ine ʒiŋuc âzâcnewec: “Hahac‐nane Esauzi bâfuacgurâ, ‘Go more kiŋaŋŋic â wena razo ekomec â wiac keci bânie‐garekac i more,’
18 iŋuc wio‐gareme ʒiŋuc muzemec: ‘I kiŋaŋŋicge Jakobozi bomboŋ‐nane Esau go tahacguocte râeme warekac, erâ manakic, e jahacne ʒâhec bâjâpec‐nâporâ warekac.’ ”
19 Erâ soŋaŋ namba 2 â namba 3 erâ qowi guru gâcne soŋaŋ‐jopahuc rambiŋ jaŋe sasawa dâŋ ijaha jaza‐fârehuc muwec: “Ŋoŋe Esau bâfuarâ iŋuc hâcne âzâcnenʒepieŋ.
20 Erâ ʒiŋuc ʒuhuckerâ munʒepieŋ: ‘Manakic, kiŋaŋŋicge Jakobo e ʒâhec warehuc jukac.’ ” Jakobo e kecʒiŋuc manasuhuc wiac i efârewec: “Bubiaŋ wiac râepe rame Esauzi honerâ bune mâteŋkeha raku bâfuape âgo enarezejec.”
21 Iŋuc manasuhuc bubiaŋte wiac râeme bâniewec, e jahacne ine ŋafe ira tomao jaha fowec.
Jakobozi ŋic mochec juju gie bawec
22 Eme Jakobo e hae mi fure taniŋkeha ŋafeoa faharerâ ŋonâŋ jahec‐ticne â kiŋaŋ ŋokac jahec‐ticne â ŋokâfâcne 11 jaŋe rocjopame Jaboko opâ rendacnao fotâcnembiŋ.
23 E wiacfâcne jaŋe rocjopame fotâcne‐fârepie mafa wiac‐ticne sasawa i mâmâc râeme raʒi‐fârewec.
24 Jakobo e jahacne ine opâ ʒiŋucnao risierâ ŋewec. Ehame ŋic moc fuame ehec juju gie bahapire furic râewec.
25 Eme ŋic eki Jakobore tâpiri bawahaocte eipierâ gâjoŋnao qawec. Eme Jakobo e ŋic ehec juju gie bahapire hoqaŋeŋ‐ticne ŋetarawec.
26 Eme ŋic e ʒiŋuc âzâcnewec: “Furic biac râekacte behecnuzemec.” Jakobozi ine dâŋ ʒiŋuc bâtikiecnewec: “Mâc mi behecgupemu, jambuŋnutec behecgupemu.”
27 Eme ŋiczi wiocnewec: “Go ʒâŋege mo?” Mume muwec: “Jakobo.”
28 Eme muwec: “Gore ʒâŋe Jakobo mocwâc mi muhuc Israe muzo. Go Anutuhec â ŋichec mâmâc juju gie barâ sanaŋkemec hâcne.”
29 Eme Jakobozi wiocnerâ muwec: “Go muc, gore ʒâŋe ine mo?” Eki ine muwec: “Go wemocte ʒâŋe‐nanere wiokomec?” Iŋuc murâ ijaha jambuŋkewec.
30 Eme Jakobo e hae mâreŋ irec ʒâŋe Peniele muwec, i ʒiŋuc muhuc: “No Anutu ʒâŋe mai jâmbâŋ‐ticne honerâ sifu mac mi hâmopac.”
31 Eme Peniele mâreŋ beherâ rahame ʒoaŋ wefuwec, e hoqaŋeŋ‐ticne ŋetarawecte âte ŋetarac rawec.
32 Eme ŋic e Jakobo gâjoŋnao qawecte Israe ŋic jaŋe qowi gâjoŋnere rua mi nânâ qikiŋnembiŋzi qikiŋnehuc jueŋgopieŋ jaha.