44
Josefezi hahacfâcne esâic‐jopawec
1 Eme Josefezi ficsoŋaŋ‐ticne ʒiŋuc âzâcnewec: “Go ŋic tâpiri‐jeŋicte sâc manahuc padi târu‐jeŋicko fiatec huoc, erâ moneŋ‐jeŋic i ru sâc târu‐jeŋicko padi fainao ŋie‐jarezemec.
2 Râqâc‐nane, siliwazi bakicne, i ine ʒâhec motec ere târu micnao padire moneŋhec mâmâc ŋiezemec.” Eme Josefezi muwec sâc efârewec.
3 Hae fureme ŋic doŋgifâc‐jeŋic jaŋehec râec‐jopapie rambiŋ.
4 Eme hae beherâ rapie mi ʒoraha Josefezi ficsoŋaŋ‐ticne ʒiŋuc âzâcnewec: “Ajoc, go ŋic jâpec‐jopa rac, erâ bâfuac‐joparâ ʒiŋuc jazac: ‘Ŋoŋe wiac biaŋne eŋarekicnezi okacne wemocte sâqocne bazu‐narehuc râqâc‐nane siliwazi bakicne i fiuc rombieŋ?
5 Bomboŋ‐nanezi râqâc ira hâcne opâ nâekac, erâ i bajuhuc findaŋdâŋ muekac. Ŋoŋe iŋuc epie sâqorejec.’ ”
6 Eme e ra bâfuac‐joparâ dâŋ i hâcne jazawec.
7 Jaŋe ine dâŋ ʒiŋuc bâtikiecnembiŋ: “Bomboŋ‐nâŋeczi wemocte dâŋ iŋucne nâzâkac? Nâŋe wiac iŋucne moc mi eeŋgopeneŋ.
8 Nâŋe mârâc jaha târu‐nâŋec micnao moneŋ bâfuambeŋ i Kanaaŋ mâreŋkonec barâ risie warembeŋ, irec wemocko bomboŋgere fickonec siliwa me gol fiuc ronʒapeŋ?
9 Kiŋaŋ qaqafâcge e me e erao bâfuacmu e hâmocte biŋe ezejec, ehame gâcne nâŋe bomboŋ‐nâŋec gore kiŋaŋŋicfâc enʒepeneŋ.”
10 Eki muwec: “Muŋgopieŋ iŋuc hâcne fuaoc, moc erao bâfuanaŋmu e hâcne kiŋaŋŋic‐nane ezejec, gâcne ŋoŋe ine mâc ra junʒepieŋ.”
11 Eme jaŋe biac târu‐jeŋic rorâ mâreŋko hepie ŋeha firue‐fârembiŋ.
12 Eki ine mârâc motec erao fuŋkerâ târu sâc basa raku ʒâhec motec erao basa tarawec, râqâc ine Benjamiŋte târuo bâfuawec.
13 Iŋuc fuame jaŋe ŋaqi‐jeŋic bâsuckerâ târu wiac‐jeŋic doŋgi faio râepie feme haeo risie fembiŋ.
14 Eme Josefe e ficko jaha juhame Juda â hahac ɋafâcne jaŋe fisirâ maŋfuŋnao fodapembiŋ.
15 Eme Josefezi jazawec: “Ŋoŋe wemo mâsi mo embieŋ? Ŋic moc no iŋucnezi findaŋdâŋ muhuc fuŋne‐ŋeŋic bataniŋkeocmu, i ŋoŋe kâuc bambieŋ me?”
16 Eme Judazi muwec: “Nâŋe bomboŋ‐nâŋec go wemo dâŋ moc gazanaŋmu, me Anutuzi kiŋaŋŋicfâcge nâŋere kiŋ bataniŋkewecko ine wemo dâŋ moc mupene sâckeocmu? Manakic, ʒi bomboŋ‐nâŋec gore kiŋaŋŋic eŋgopeneŋ hâcne, nâŋe mecne â târu‐ticnao râqâc bâfuakicne ŋic e mâmâc.”
17 Eki ine muwec: “Iŋuc misac! Târu‐ticnao râqâc bâfuakicne e sawa kiŋaŋŋic‐nane juzejec, gâcne ŋoŋe ine wamao mamac‐ŋeŋictao sâcne ranʒepieŋ.”
18 Iŋuc mume Judazi mai ferâ muwec: “O bomboŋ‐nane, kiŋaŋŋicge no gore maio dâŋ micafec jaha mupe manarâ buge mi wefuzejec, go Faraore sâc jukic i!
19 Bomboŋ‐nâŋec go kiŋaŋŋicfâcge ʒiŋuc muhuc wio‐nâremeŋ: ‘Ŋoŋe mamac‐ŋeŋic me ɋaŋeŋic moc jukac me?’
20 Eme nâŋe bomboŋ‐nâŋec go ʒiŋuc gazambeŋ: ‘Nâŋe mamac‐nâŋec jukac, erâ ŋicqizec erâ juha ɋaʒâc‐nâŋec moc fuawec. E hahac fuŋfuŋ‐ticne hâmowec. Neŋgoc‐jekiczi motec jajahec sawa rocjofawecte e mocsâkoa hâcne jukac, eme irec mamacnezi ere boc ecneekac.’
21 Goki ine kiŋaŋŋicfâcge nâŋe ʒiŋuc nâzâmeŋ: ‘Ŋoŋe jowapie wareme honezepac.’
22 Nâŋe ine bomboŋ‐nâŋec go ʒiŋuc gazambeŋ: ‘Motec e mamac‐ticne sâcne mi beheocmu, beheme muzac mamac‐ticnezi hâmozac.’
23 Eme go ʒiŋuc nâzâmeŋ: ‘Ɋaʒâc‐ŋeŋic e mi wareocmuo ine nore maio mocwâc mi fua‐jâmbâŋkenʒepieŋ.’
24 Eme nâŋe kiŋaŋŋicge, mamac‐nâŋec hâcne, erao risierâ gore dâŋ hâcne mufuacnembeŋ.
25 Eme juku mamac‐nâŋeczi ʒiŋuc nâzâwec: ‘Ŋoŋe nânâ‐nâŋec furine baniŋte mocwâc ranʒepieŋ.’
26 Iŋuc mume ʒiŋuc âzâcnembeŋ: ‘Nâŋe mâc mi ranaŋmu. Ɋaʒâc‐nâŋec e nâŋehec mâmâc ranaŋte mana‐nâretec sâcne ranaŋmu. E tâmiric ine ŋic ere maio sâcne mocwâc mi fuanaŋmu.’
27 Iŋuc mupene mamac‐nâŋeczi ʒiŋuc nâzâwec: ‘Ŋonâŋ‐nanezi ŋokâ jajahec sawa rocjofawec i ŋoŋe manaŋgopieŋ.
28 Eme moc e behecnurâ sifuckeme ʒiŋuc mupo: E qowi mimicnezi kisuc qâsuckewec irec e mocwâc mi honehuc jupozi jukopac.
29 Eme ʒi jukac e wâc nowac ropie wiac moc fuacneme no jaŋɋâŋheczi busâqocko hâmope kiŋnane ŋoŋere faio feocmu.’
30 Irec no motec e tâmiric kiŋaŋŋicge, mamac‐nâŋec hâcne, erao risiepemuo ine maŋticnezi motecte boc domaekacte
31 motec hâcne basarâ izia hâmoocmu.
32 Kiŋaŋŋicge no, motec ere riŋ ropemurâ mamac‐nanerao ʒiŋuc mupaŋkepo: ‘No mi bârisie‐garepemuo ine gore maio kiŋhec jaha juhape hâmoc dameŋ‐nane maickezejec.’
33 Irec ʒi kiŋaŋŋicge no motecte âkehoc bomboŋ‐nane gore kiŋaŋ qahuc jupemurâ mana‐naretec moteczi hahacfâcne jaŋehec risiezejec.
34 No motec e tâmiric wemocko mamac‐nanerao risie rapemu. No mamac‐nane wiac iŋucne fuacneme honezore hâwicnu sâqorekac.”