48
Jakobozi Josefere ŋokâ jahec jambuŋ‐jofawec
1 Juku Josefe biŋedâŋ ʒiŋuc muhuc âzâcnembiŋ: “Manakic, mamacge huc bakac.” Eme ŋokâ jahec‐ticne Manase â Eferaim rocjofame rambiŋ.
2 Eme Jakobo âzâcnembiŋ: “Manakic, ŋokâge Josefe ware fisijec.” Eme Jakobo e sanaŋkehuc fofo‐ticnao fahare ŋewec.
3 Erâ Josefe ʒiŋuc âzâcnewec: “Anutu bapafâre e Lusi haeo fua‐narerâ jambuŋnuhuc
4 ʒiŋuc nazawec: ‘Manakic, no basawecgupe sawe mâririackezemec, erâ go ŋicguru sâko ehaŋtec ɋâricfâcge jaŋe mâreŋ ʒi jarepe jaŋere biŋe esanaŋkezejec.’
5 Irec no Aigita mâreŋko mi warehape ŋokâ jahecge Aigita mâreŋko fuapic jahe nore biŋe ezepirec. Eferaim â Manase jahe, Rubeŋ â Simeoŋ junarekopirec jahere sâc jaha junarezepirec.
6 Eme ʒâhec naru motec gâcne fua‐garembiŋ jaŋe ine gore biŋe junʒepieŋ, jaŋe mâreŋ biŋe qajarekicne ira juhapie jaŋe jaŋacne ʒâŋe mâcne, hahac jahec‐jeŋic jahere ʒâŋe sawa fuazejec.
7 No ine Mesopotamia mâreŋkonec wareku Efarata hae bâqiŋkehape Rahezi Kanaaŋ mâreŋko hâmome, Efarata hatao, Betelehem hâcne, ira duckepo.”
8 Eme Israe e Josefe ŋokâ jahec‐ticne honec‐jofarâ wiowec: “Keci weni jahe?”
9 Eme Josefezi mamac‐ticne ʒiŋuc âzâcnewec: “Ŋokâ jahec‐nane, mâreŋ ʒira juhape Anutuzi narec‐jofawec, jahe hâcne.” Eki muwec: “Ejactetec warenic, eme jambuŋ‐jofape.”
10 Israe e biac ŋicqizec ewecte ʒâŋe‐ticne mâteŋkewec, irec wiac sâcne mi ʒâŋitawec. Eme ejacteme maŋfuŋnao ra domahapire hâpo mumuduc ejactewec.
11 Erâ Josefe ʒiŋuc âzâcnewec: “No ʒâŋe maige mocwâc honepemu i mi manasupo, eme ʒi Anutuzi mana‐nareme ɋâric jahecge honec‐jofakopac wâc.”
12 Eme Josefezi qicticnaonec rocjofarâ mâreŋko fodapewec.
13 Erâ Josefe e mefâre‐ticnezi Eferaim rorâ Israere meqanaopec râewec, erâ meqana‐ticnezi Manase rorâ Israere mefâreopec râewec.
14 Eme Israezi meticne nowac gowac ehuc mefâre‐ticne sicnerâ ʒâhec motec Eferaimte qizecko râewec â meqana‐ticne Manasere qizecko râewec.
15 Erâ jambuŋ‐jofahuc kecʒiŋuc muwec:
“Mamac ŋosa jahec‐nane
Abraham â Isaka jahe Anuture maio jupic,
Anutu eki hâcne jambuŋ‐jofazejec,
Anutu, nore soŋaŋ juweczi jukac,
eki jambuŋ‐jofazejec.
16 Ʒârâ hâriŋ fuŋne fuŋne irecnec bataracnuwec,
aŋelo eki motec jahec ʒi jambuŋ‐jofame
nore ʒâŋezi jaherao fohuc juzejec.
Erâ mamac ŋosa jahec‐nane,
Abraham â Isaka jahere ʒâŋe mâmâc.
Eme motec jahe mâreŋko sawe mâririackezepirec.”
17 Eme Josefe e, mamacnezi mefâre‐ticne Eferaimte qizecko râewec, i honeme mi sâckeme mamac‐ticnere me Eferaimte qizeckonec Manasere qizecko râeocte rowec.
18 Ehuc muwec: “Mamac, iŋuc mâcne! Ʒizi mârâc motec, irec mefârege ere qizecko râec.”
19 Mamacnezi ine qatararâ muwec: “Ŋokâ‐nane, no manakopac, no mana‐jâmbâŋkekopac. Manase e iŋuc jaha ŋic fekicne juocmu â ɋâricfâc‐ticne jaŋe ŋicguru sâko eniŋmu, mâc ɋanezi sirickeocmu â ere ɋâricfâc jaŋe ŋic gurune gurune erâ juniŋmu.”
20 Iŋuc murâ ʒoaŋ ijaha jambuŋ‐jofahuc muwec:
“Ŋohere ʒâŋeo ɋetickehuc
Israe ŋic jaŋe jambuŋdâŋ muniŋte ʒiŋuc muniŋmu:
‘Anutu e Eferaim â Manase ehâmo‐jactewec
irec sâc jaha egarezejec.’ ”
E iŋuc muhuc Eferaim e Manasere fekicne râewec hâcne.
21 Israe e iŋuc erâ Josefe ʒiŋuc âzâcnewec: “Manakic, no ʒi hâmozo ekopac, Anutuzi ine ŋoŋehec juhuc juku jowac‐ŋopame apafâc‐ŋeŋic jaŋere mâreŋko mocwâc risieniŋmu.
22 Eme no tiki moc, Amori ŋic tepe ʒikazi jopa jâpec ejarehuc jowac ropo i hahacfâcge jaŋe mâcne, go hâcne qikiŋne‐garekopac.”