50
Jakobo duckembiŋ
1 Eme Josefezi mamac‐ticne hâporâ kiohuc muduckewec.
2 Erâ kiŋaŋ qaqafâcne â dotafâcne jaŋe mamac‐ticnere sahac babasanaŋ wokemaŋ ruacneniŋte mujarewec; eme jaŋe Israe wokemaŋ ruacnembiŋ.
3 Gie i bahuc juhapie ŋafe ʒoaŋ 40 tarawec, dameŋ ʒora iŋuc hâcne gie i bajumbieŋ. Eme Aigita ŋic jaŋe ere ki mamakuc ehapie ʒoaŋ 70 tarawec.
4 Eme ki mamakuc dameŋ tarame Josefezi Farao wiacfâcne ʒiŋuc jazawec: “Ŋoŋe bubiaŋ moc qanarezo murâ ine nore âkehoc Farao ʒiŋuc âzâcneniŋ:
5 Mamac‐nane e ʒiŋuc mupaŋkecnepemurâ muwec: No hâmope Kanaaŋ mâreŋko qânâ hawec‐nane moc gufupo, ira ducnuzemec. No irec hâcne rarâ mamac‐nane duckerâ mocwâc risiezo mukopac.”
6 Eme Faraozi muwec: “Murâ iŋuc ec, erâ mumupaŋ dâŋ mumeŋ irec sâcko mamacge duckezemec.”
7 Eme Josefe e mamac‐ticne duckeocte rawec, ehame Farao kiŋaŋŋicfâcne â ficticnere micnefâc â Aigita mâreŋkonec ŋic fekicne jaŋe mecne,
8 erâ Josefe â Israe wiacfâc‐jekic mecne, jaŋe sasawa ehec mâmâc rafârembiŋ. Naru motec piic piic â qowi â bulimakao wiac jaŋe sawa ine Goseŋ mâreŋko behec‐jopapie jumbiŋ.
9 Keretac â becâsicko rarâ ŋic ine mâmâc rapie biri ʒora jâmbâŋ ewec.
10 Eme jaŋe raku Goreŋ Atadi Jordaŋ opâ ocniŋucnao fokac, ira fisirâ soŋgâŋ bahuc ki kâcɋene kiombiŋ. Ehame Josefezi mamac‐ticnere erâ ki mamakuc eha ʒoaŋ 7 tarawec.
11 Iŋuc epie mâreŋ rune, Kanaaŋ ŋic hâcne, jaŋe hone manac erâ mumbiŋ: “Aigita ŋic jaŋere ki mamakuc ine hâcne.” Eme irec hae mâreŋ irec ʒâŋe AbeMiziraim mueŋgopieŋ; mâreŋ i Jordaŋ opâ ocniŋucnao fokac.
12 Eme Jakobo ŋokâfâcne jaŋe wiac muwec sâc ecnembiŋ.
13 Jaŋe Kanaaŋ mâreŋko bararâ ine Mamere ʒoaŋ wewefunao Makepela mâreŋko hawec fowec, Abrahamzi Hitiŋic Eferoŋ eraonec furine bawec, ira duckembiŋ.
14 Eme Josefe e mamac‐ticne duckeme tarame e jahacne mecne â hahacfâcne mecne â gâcne sasawa ehec mamac‐ticne duckeniŋte mâmâc rambiŋzi Aigita mâreŋko risie‐fârembiŋ.
Josefezi hahacfâcne bâmiriŋ‐jopawec
15 Josefe hahacfâcne jaŋe mamac‐jeŋic hâmome honerâ mumbiŋ: “Josefe e wiac sâqocne ecnembeŋ sasawa irec juku qaisoc‐nâpohuc okacne wiac moc nâreme!”
16 Iŋuc muhuc erao dâŋ kecʒiŋuc râepie rawec: “Mamacgezi hâmozo ehuc mutâcne‐nârerâ muwec:
17 ‘Josefe âzâcnenʒepieŋ, hahacfâcge nâŋe wiac hehesicne egarembeŋ kiŋ bahac‐nâŋec i sifu behezemec.’ Irec numu‐gareŋgopeneŋ hâcne, mamacgere Anutu ere kiŋaŋ qaqafâc juŋgopeneŋte kiŋnâŋec behezemec.” Josefezi dâŋ i manarâ kiowec.
18 Ehame hahacfâcne jaŋe jaŋac wâc rarâ Josefere maio fodaperâ mumbiŋ: “Kiŋaŋ qaqafâcge nâŋe ʒi.”
19 Iŋuc epie Josefezi jazawec: “Mi hâwic‐ŋopaoc, no Anuture dodomao mi domakopac.
20 Ŋoŋe jâmbomac norao wiac sâqoreocte muhuc embiŋ, Anutuzi ine herisieme bibiaŋko rawec. Ŋic bocjaha juju‐jeŋicte hata wiŋkeocte iŋuc manaha fuawec i miŋecgac tâtâc honeŋgopeneŋ.
21 Irec mi hâwic‐ŋopaoc. No ŋaŋacne â ɋiefâc‐ŋeŋic hone maiŋ eŋarehuc jupemu.” Iŋuc mu baafec ejarehuc bâmiriŋ‐jopawec.
Josefe hâmowec
22 Eme Josefe e jahacne â mamac‐ticnere kikefuŋ Aigita mâreŋko jumbiŋ. Josefe ine jufeku jara 110 bazuwec.
23 Ehuc Eferaimtaonec apa ŋosafâcne fuapie honec‐jopawec. Erâ wâc Manasere ŋokâ Makiri ɋiefâcne qicjopawec.
24 Eme Josefezi hahacfâcne jaŋere ɋâricfâc ʒiŋuc jazawec: “No ʒi hâmozo ekopac. Anutu e ine iqic‐ŋopazokac. Ehuc mâreŋ ʒirecnec rocŋoparâ jowac‐ŋopa ra mâreŋ Abraham, Isaka â Jakobo mupaŋke‐jarewec ira râec‐ŋopazokac.”
25 Eme Josefe e Israe ŋokâfâcne jaŋe Anuture maio dâŋ mupaŋkecneniŋte ejarewec. Ʒiŋuc muwec: “Anutuzi iqic‐ŋopazokac dameŋ ira siec‐nane barâ ranʒepieŋ.”
26 Eme Josefe e jara 110 bazurâ hâmowec. Hâmome sahac babasanaŋ wokemaŋ ruacnerâ Aigita mâreŋko qâŋɋâŋ‐ticne katapa mocko râepie fowec.