11
Anutu e ŋicfâc‐ticne qâsoriekicne jaŋere ecneekac
1 Israe e socɋâri juha maŋnane erao fowec,
ehame ŋokâ‐nane e Aigita mâreŋkonec wiracnepe wefuwec.
2 Eme no wira‐jarepe sâc behecnurâ wisembiŋ,
jaŋe Baali nemu taha bâzi rike‐jarehuc
ɋâŋ qâqâtâc hosâc âsu rike‐jare jumbieŋ wâc.
3 No nahac Eferaim ŋic jaŋe hata rarare fuŋne qazu‐jarepo,
noni hâcne hâpoc‐jopapo;
jaŋe ine noni bâpiaŋ‐jopapo i kâuc bambiŋ.
4 No buuructe muczi â maŋjauŋte repazi fârec‐jopapo,
erâ hâpo mickukuc ejarehuc daperâ
nânâ jare gumec epo.
5 Ʒi ine norao wareniŋte takic‐jopaekac,
irec Aigita mâreŋko risie‐bipiehapie
Asiria runezi ŋicwofuŋ ejarezejec.
6 Ʒikazi hae‐jeŋic sâc gie bahuc
burecŋicfâc‐jeŋic nâcjopazejec,
ehuc docbapa dâŋjeŋicte ɋâcjopazejec.
7 Ŋicfâc‐nane jaŋe behecnuniŋte maŋjeŋic domaekac,
irec hâcne tagi de âsic eniŋte mukicne
i moczi moc mi qâsua‐jarezejec.
8 O Eferaim, no wemocko behecguzapo!
O Israe, no wemocko râpecguzapo!
No wemocko Adama hae iŋucne hone suŋgiŋ egarezapo!
No wemocko Ʒeboim hae ecnepo sâc ijaha egarezapo!
No buroro enarekac â bunane bâruŋkekac hâcne.
9 No kimbeŋ sâqocne mi qaŋarepemu,
â Eferaim go mocwâc mi sipiricgupemu,
no ŋic aricne, no Anutu hâcne,
no Tiri runezi ŋondeŋ‐ŋeŋicko jukopac,
no sipiric‐ŋopapemurâ mi fâ fisikopac.
10 Jaŋe Wofuŋ bâjâpeniŋmu,
eme eki laioŋ iŋucne owackeocmu;
jâmbomac, e owackeme ŋicfâc‐ticne jaŋe
hâwec mâreŋkonec ɋarac ɋarac qahuc fisiniŋmu.
11 Jaŋe Aigita mâreŋkonec wipe iŋucne,
â Asiria mâreŋkonec hapâ iŋucne
fâfârehuc fisiniŋmu,
eme no fic hae‐jeŋicko bârisiec‐jopapemu,
Wofuŋte dâŋ iŋuc.
Eferaim e eeatuc fuŋne fuŋne bâfuaekac
12 Eferaim ŋic jaŋe burec boc enarehuc jumbiŋ,
â Israe kikefuŋ jaŋe eatucnuhuc râpecnumbiŋ,
erâ Juda e Anutu erâ‐eesanaŋ Tiri rune
erao wâc mi qohota sanaŋkeekac.