53
1 Biŋedâŋ hazec‐nâŋecko huwec i mozi mana ʒakiewec?
 Wofuŋte mâsi qâreŋ i mo ŋiczi hone tarawec?
2 E mai‐ticnao jâcbâpâŋ iŋucne fua sokac ewec,
â mâreŋ hahaŋkekicnao jâcgâtâ gitec heekac irec sâc.
E weniŋuc erâ hawari‐ticne qacfiricne eha honebâckenʒapeŋ,
â weniŋuc erâ qâreŋ biaŋ‐ticne moc fuame ere aŋac‐nâpozac?
3 Ŋiczi mana takic ecnehuc bâsuembiŋ,
e ʒâicmaŋko juhuc ʒârâ hâriŋ rauckewec,
ŋic moc hone takic ecnehuc ʒâŋe titiki fieŋgopeneŋ ere sâc,
mana takic ecnepie honepene omane ewec.
4 Jâmbomac, e nâŋâcne ʒârâ hâriŋ dewec,
â nâŋâcne ʒâic âsickewec.
Nâŋâc ine mumbeŋ, e ʒikare biŋe,
Anutuzi qa bâʒâic ecnekac hâcne.
5 Nâŋâcne qaqatarare erâ soc ruawec,
nâŋâcne hehesicte qanʒaŋnembiŋ.
Fainao ʒika fewec izi bâpiaŋ‐nâpowec,
â ere wiczi nâŋâcne wic bâsomiewec.
6 Nâŋâc mâmâc sasawa lama iŋucne qâsoriembeŋ,
maŋ bucnâŋec hatane hatane âtembeŋ.
Eme Wofuŋzi hehesic‐nâŋec sasawa
i ere faio râe‐fârewec.
7 Jaŋe imackepie e mana uruewec,
ehuc micticne moc mi aŋkewec;
lama motecne hezuniŋte baraeŋgopieŋ,
me neŋgocne kanʒaŋ bâbâtâc ŋic erao fâsâerâ domaekac,
iŋuc hâcne micticne mi aŋkewec.
8 Fific guguriŋ ecneku dâŋticne mutararâ tuŋkepie rawec.
Eme juha jumbiŋ jaŋeraonec mozi ʒiŋuc manazac:
Nore gurufâc nâŋere qaqatarare erâ qakicne?
Ehuc mâreŋko juju nâŋâcne guruonec bârâriekicne?
9 Ʒâŋeruŋ‐ticne i ŋic sindaŋne jaŋerao mucnembiŋ
i hâmohame mafaŋic moctao bâfuacnembiŋ.
Ʒika moc mi bâuwaha â micticnao eeatuc dâŋ moc mi foha iŋuc ecnekicne.
10 Sifu Wofuŋzi maname sâckeha qanʒaŋnembiŋ,
ehuc ʒâic sâko bâfuacnembiŋ.
Eme kiŋ taraocte e jahac sâqocnere due bame tarame
ɋâricfâcne fuapie honec‐jopazejec
â dameŋ ʒora juraʒizejec,
â Wofuŋte dâŋbiri giene bakume fârio qazejec.
11 Maŋticnezi ʒâic serereŋ manawecte
fârine fuame honerâ maŋne taraocmu.
Tiŋne rune, kiŋaŋŋic‐nane e mamana‐ticnezi
ŋic bocjaha bafic‐jopame tiŋkeniŋmu,
â kiŋbahac‐jeŋic i eki âsickeocmu.
12 Irec hâcne fekicne jaŋehec wiac kâdoc qacnepemu,
â ʒika furi i momori jaŋehec bâtâc babac enʒepieŋ,
e juju‐ticne qikiŋnehuc hâmocko utuckewecte,
â sâqocne bapa jaŋere guruo huwecte.
Erâ i bocjaha jaŋere sindaŋ âsickewec hâcne,
ehuc sâqocne bapa jaŋere erâ numuwec.