32
Jeremia e Anatoti haeo mâreŋ moc furine bawec
1 Juda ŋicwofuŋ Zedekia e ŋicwofuŋ juha jara 10 ewec, â Nebukaneza e ŋicwofuŋ juha jara 18 eme Wofuŋtaonec dâŋ Jeremiarao fuawec ʒine hâcne.
2 Dameŋ ira Babe ŋicwofuŋ momorifâc‐ticne jaŋe Jerusalem hae somâ bambiŋ, ehame Jeremia e Juda ŋicwofuŋte hae ʒoŋao momori jaŋe soŋaŋ jumbiŋko kâpâcwâruo ŋewec.
3 Juda ŋicwofuŋ Zedekia eki ʒiŋuc muhuc kâpâcwâru barâ ira râeme ŋewec hâcne: “Go wemocte findaŋdâŋ ʒiŋuc mumeŋ: ‘Wofuŋzi mukac: Manaŋgopieŋ, no hae ʒi Babe ŋicwofuŋ ere meo râepe rauckezejec.
4 Eme Juda ŋicwofuŋ e Kaldea jaŋe sâcne mi wise‐jareocmu, aricne, e Babe ŋicwofuŋ ere meo râepe fejâmbâŋkeocmu, eme jahe nazaŋ gazaŋ ehuc hohone ezepirec.
5 Eme e Zedekia Babe haeo baraocmu, ira juhame iqickezepac. Ŋoŋe Kaldea ŋic jaŋehec ʒika qahuc sâcne mi sasaŋkeniŋmu. Wofuŋ nore dâŋ iŋuc.’ ”
6 Eme Jeremiazi muwec: “Wofuŋte dâŋ norao ʒiŋuc fuawec:
7 Manakic, mamac wârâŋge Salum ere ŋokâ Hanamelezi gorao fisirâ muocmu, ‘Go mâreŋ‐nane Anatoti haeo fokac i furine bac; gore ʒâŋe bâbâni fokacte furine bacmurâ sâcmutâczi mana‐garekac.’
8 Eme Wofuŋzi muwec irec sâcko fuarâ mamac wârâŋ‐nanere ŋokâ Hanamele e momori jaŋere hae ʒoŋao fisirâ nazawec: ‘Benjamiŋ mâreŋko Anatoti hae ira mâreŋ‐nane fokac i furine bac; goki hâcne furine barâ rauckecmurâ sâmutâczi mana‐garekac; gore biŋe eocte furine bac me!’ Iŋuc mume mana tarapo: Wofuŋte dâŋ ine hâcne.
9 “Eme no mamac wârâŋ‐nanere ŋokâ Hanamele eraonec Anatoti haeo mâreŋ fowec i rorâ furine siliwa moneŋ 17 râcnepo.
10 Ehuc furi bapare papia qâreŋkerâ maqâreŋ râerâ ŋic gâcne ejarepe honehapie moneŋ i woserâ râcnepo.
11 Izi ine furi bapare papia basanaŋkekicne â mi basanaŋkekicne i mâmâc rocjofapo.
12 Erâ mamac wârâŋ‐nanere ŋokâ Hanamele ere maio mecne â papiao ʒâŋe‐jeŋic râembiŋ ŋic i jaŋere maio mecne, erâ Judaŋic gâcne momori jaŋere sacmaŋko ŋefârembiŋ jaŋere maio mâmâc Masejare ŋosa, Neriare ŋokâ Baruku e hâcne râcnepo.
13 Ehuc mai‐jeŋicko domahuc Baruku ʒiŋuc mutâcnecnepo:
14 ‘Anutu Tâpiri Ɋuŋɋasaŋ Wofuŋ, Israere Anutu e ʒiŋuc mukac: Go papia ʒi, furi bapare papia basanaŋkekicne â mi basanaŋkekicne i rorâ hapec mocko râetec hurâ dameŋ ʒora fozejec.
15 Anutu Tâpiri Ɋuŋɋasaŋ Wofuŋ, Israere Anutu e ʒiŋuc mukac hâcne: Fic mecne, mâreŋ mecne, waiŋ gie mecne i mâreŋ ʒira mocwâc furine bahuc juzo.’ ”
Jeremiazi numuwec
16 Eme furi bapare papia i Neriare ŋokâ Baruku râcnerâ Wofuŋtao ʒiŋuc muhuc numupo:
17 “O Wofuŋ Anutu, sambâŋ â mâreŋ i goki hâcne tâpiri sâkogezi â mesanaŋgezi bâfuac‐jofameŋ. Go wiac moc ezo murâ mi eipiekic.
18 Go ŋic tauseŋne tauseŋne maŋzi ʒâfic‐jopahuc juekic, â mamac jaŋere kiŋtofa i ɋâricfâc‐jeŋic jaŋere faio gurucke rahuc juekic. O Anutu sâko tâpiri rune, go Anutu Tâpiri Ɋuŋɋasaŋ Wofuŋ, ʒâŋege iŋuc hâcne.
19 Mamana birige kâcɋene sâko â eebapage i tâpirinehec, ʒâŋegezi ŋic ʒeŋgoma hata‐jeŋic honeekic, ehuc ŋicne ŋicne ru sâc hata raeŋgopieŋ irec sâcko okacne bazu‐jareekic.
20 Go Aigita mâreŋko mâsi â wiac ʒâŋe furu bahuc jumeŋ, erâ Israe â ŋic gâcne jaŋerao dameŋ ʒiŋuczia bahuc juekic jaha; ehuc ʒâŋe biŋege bâfuameŋ i miŋecgac tâtâc fokac wâc.
21 Go Israe ŋicfâcge jaŋe Aigita mâreŋkonec mâsi â wiac ʒâŋe furu bahuc tâpiri â mesanaŋge sicnerâ wiac hâhâwicne sâko bâfuahuc jowac‐jopatec wahambiŋ.
22 Ehame mâreŋ ʒi mimiŋnefâc‐jeŋic jarecmurâ mupaŋkemeŋ i hâcne jaremeŋ; mâreŋ moc susu â baŋac fusucmarâ qâmbâriŋkeekac hâcne.
23 Eme jaŋe raʒirâ rauckehuc gore dâŋ mana rereŋ mi ejumbieŋ, â sâcmutâc dâŋgere sâcko wâc mi jujumbieŋ, erâ goki wiac eniŋte mutâcne‐jaremeŋ i qatara‐fâre jumbieŋ jaha; iŋuc epie mutec ʒârâ hâriŋ sasawa ʒi fai‐jeŋicko fewec hâcne.
24 Manakic, hae roniŋte somâre ʒae i âke suepie biac hae sac maŋfuŋko ware ŋekac, ehame ʒika â nânâ babasa â huc hâmoc fokacte hae i biac somâ bapa Kaldea ŋic jaŋere meo feocmu. Goki dâŋ mumeŋ i fâricnehec ewec hâcne, go gahac honekic i!
25 O Wofuŋ Anutu, go ine hae i Kaldea ŋic jaŋere meo fezo eha sifu ʒiŋuc nazameŋ: ‘Go ŋic gâcne rocjopatec honehapie mâreŋ moneŋzi furine bazemec.’ ”
Wofuŋzi Jeremia dâŋ bâtikiecnewec
26 Eme Wofuŋte dâŋ Jeremiarao kecʒiŋuc fuawec:
27 “Manakic, Wofuŋ noni hâcne wiac jujune sasawa irec Anutu, no wiac mocte moc mi eipiepemu.
28 Irec no hae ʒi Kaldea ŋic jaŋere meo, â Babe ŋicwofuŋ Nebukaneza ere meo râepe ro rauc ezejec.
29 Kaldea ŋic jaŋe hae ʒi somâ baeŋgopieŋzi maŋnao wefurâ turuŋkepie ʒazejec, erâ bâiŋnuniŋte ficbupu gâcne wâwâneŋ bakicne irec faio Baali nemu hosâc âsu rikecne jumbieŋ â waiŋ wiac nemu gâcne jaŋere taha muhuc hoŋke‐jare jumbieŋ fic i mâmâc ʒazejec.
30 Israe ŋic â Judaŋic jaŋe ɋie‐jeŋickonecteaŋ wiac hone aŋac mi ecneekopac i hâcne ejumbieŋ; Israe ŋic jaŋe hâcne dameŋ sâc eebapa‐jeŋiczi bâiŋnuhuc jumbiŋ, Wofuŋ nore dâŋ iŋuc.
31 Hae ʒi bambiŋ dameŋ ira rune jaŋe fuŋkerâ bâiŋnuhuc juwefukuhapie kimbeŋ â aaric mana‐jarehuc jupozi jukopac, irec hae i ʒâŋe mai‐naneonec bârâriepemu.
32 I Israe ŋic â Judaŋic jaŋe jaŋac mecne, ŋicwofuŋfâc‐jeŋic mecne, fekicnefâc‐jeŋic mecne, taha bapa â porofetefâc‐jeŋic mecne, Juda mâreŋ rune mecne, erâ Jerusalem ŋecjucfâcticne mecne, jaŋe mâmâc bâiŋnuhuc hehesic bâfua‐fârembiŋte iŋuc epemu.
33 Jaŋe maicnurâ mâcne, râpecnurâ domambiŋ, ehuc dameŋ sâc dâŋ jaza qazuc ehuc jupo i sifu mi manambiŋ â bâbâtiŋte takic‐jopawec wâc.
34 Jaŋe nemuɋâŋfâc‐jeŋic mamakâcne i ine taha ufuŋ nore ʒâŋe fokac i gâc hecneniŋte ira baferâ âkendâŋ‐jopambiŋ.
35 Jaŋe naru motecfâc‐jeŋic Moleke nemu ere biŋe qahuc rikec‐jopaniŋte Beŋ‐Hinom wâneŋko Baali nemu ere bâzi ririke toma bambiŋ. No ine wiac iŋucne moc mi mutâcne‐jarepo â jaŋe wiac mamakâcne iŋucne ehuc Juda eatuckepie sâqocne baocte moc mi manasupo.
36 “ ‘Hae ʒi ʒika â roroc â huc hâmoczi qakume Babe ŋicwofuŋ ere meo feocmu’, ŋoŋe iŋuc mueŋgopieŋ, Wofuŋ Israere Anutu noni ine hae irec dâŋ ʒiŋuc mukopac:
37 Manakic, no aaric â kimbeŋ â mamana sâqoc mâretec mana‐jarehuc mâreŋ sâc bâtâtiec‐jopapo irecnec mocwâc ro nusec ejarerâ jowac‐jopape hae mâreŋ ʒira risierâ wamao junʒepieŋ.
38 Eme jaŋe ŋicfâc‐nane juhapie no Anutu‐jeŋic juzepac.
39 Eme no maŋ mamana mocjaha â juju hata mocjaha tahac‐jopape dameŋ sâc no araŋ banarehuc junʒepieŋ, i jaŋe jaŋacne â ɋâricfâc‐jeŋic juhâc qâhâmoniŋte iŋuc ejarepemu.
40 Erâ no jaŋehec ʒâʒâfic fofo sanaŋ epemu, ehuc ehâmo‐jarepemurâ moc mi râpec‐jopazepac, â no araŋ babanare irec fuŋne qazu‐jarepe jaŋe maŋzi manahuc no wâc mi râpecnunʒepieŋ.
41 Aricne, no hone aŋac ejarehuc ehâmo‐jarepemu, ehuc maŋ â qâqâtâc‐nane jaŋerao furu jaha râepe foha mâreŋ ʒira jâmbomacko sarac‐jopapemu.”
42 Wofuŋ e ʒiŋuc mukac hâcne: “No ŋicguru ʒi jaŋere faio ʒârâ hâriŋ sâko hâcne râepe fewec, iŋuc jaha wiac biaŋne mupaŋke‐jarekopac sâc i tahac‐jopa‐fârepemu.
43 Eme mâreŋte fuŋne ʒiŋuc mueŋgopieŋ, ŋic â qowi tâmiric tuhutac fokac, erâ Kaldea ŋic jaŋere meo fewec, ira hâcne mâreŋ mocwâc furine bazo.
44 Moneŋzi mâreŋ furine baniŋmu, ehuc furi bapare papia qâreŋkerâ ŋic gâcne ejarepie ware honehapie basanaŋkeniŋmu. Benjamiŋ mâreŋko â Jerusalem rârec rârec â Juda hae ŋerakac â tiki mâreŋ â wâneŋko â Negebe mâreŋko hae ŋerakac ira iŋuc hâcne eniŋmu; no busâqoc faio juju‐jeŋic i hetikiepe bubiaŋ faio juju‐jeŋic fuaocmu irec. Wofuŋ nore dâŋ iŋuc.”