40
Jeremia e ŋic ŋokac ʒanʒaŋne jaŋehec juwec
1 Ŋicwofuŋ momori fuŋfuŋfâcne jaŋere micne Nebuʒaradaŋ e Jeremia bâfuarâ Rama haeo ira rame Wofuŋtaonec dâŋ fuacnewec. Jeremia e dameŋ ira kâpâcwâru ŋic Jerusalem haeonec â Juda mâreŋkonec Babe haeo bacjopa raniŋte rambiŋ jaŋere ŋondeŋko niŋgiŋhec mâmâc rawec.
2 Eme ŋicwofuŋ momori fuŋfuŋfâc‐ticne jaŋere micnezi Jeremia hefârerâ ʒiŋuc âzâcnewec: “Wofuŋ Anutuge e hae mâreŋ ʒi wiac hâhâwicne i hâcne fuacneocte dâŋne mufuawec.
3 Erâ Wofuŋ bunao bahuc dâŋticne mana rereŋ mi embiŋte dâŋ muwec i fârine bâfuame wiac keci fua‐ŋarekac hâcne.
4 Erâ manac, no ʒi mege kâpâcwâruzi basanaŋkekicne i firue‐garekopac; eme go gahac, nohec Babe haeo razo murâ razeperec eme no ira hone soŋaŋ egarepemu; me nohec Babe haeo razore mi egarekacko beherâ ŋezemec. Manakic, mâreŋ bocjaha forakac, irec go ira me ira razore manatec sâckekacko razemec.
5 Ŋezo murâ ine Gedalia, Ahikamte ŋokâ, Safaŋte ŋosa hâcne erao risie razemec; Babe ŋicwofuŋzi ŋic e hâcne Juda mâreŋte soŋaŋ âkendâŋnewec, irec ŋic ŋokac jaŋerao ʒuhuckerâ ehec juzo murâ juzemec, me ira me ira razore manatec sâckekacko razemec.” Momori micne e iŋuc murâ hatare nâsiŋ â bubiaŋte wiac râcnehuc soreme rawec.
6 Eme Jeremia e Ahikamte ŋokâ Gedalia erao Mizipa haeo rawec, erâ ehec ŋic ŋokac nâfocne mâreŋ ira jumbiŋ jaŋere ŋondeŋko juwec.
7 Momori micne jaŋe ŋicfâc‐jeŋic jaŋehec hae mâreŋ ira siŋsaŋ qarâ juhuc ʒiŋuc mana‐fârembiŋ: Babe ŋicwofuŋ e Ahikamte ŋokâ Gedalia mâreŋ soŋaŋ âkendâŋnehuc ŋic ŋokac naru motec â mâreŋ irec ŋic omane Babe haeo mi bacjopa rakicne jaŋe hone maiŋ ejareocte mucnewec.
8 Iŋuc manarâ ŋic kecʒiŋuc jaŋe ŋicfâc‐jeŋic jaŋehec Mizipa haeo Gedalia erao ra fisimbiŋ: Netaniare ŋokâ Isimae, Karea ŋokâ jahec‐ticne Johanaŋ â Jonataŋ, Tanahumeti ere ŋokâ Seraja, Efai Netofa haeonec ere ŋokâfâc erâ Makati ŋokâ‐ticne Jeʒania.
9 Eme Ahikamte ŋokâ, Safaŋte ŋosa Gedalia e jaŋe â ŋicfâc‐jeŋic ʒiŋuc musanaŋke‐jarehuc jazawec: “Ŋoŋe Kaldea ŋic kiŋaŋ qajareniŋte mi hâwic‐ŋopazejec; ŋoŋe mâreŋ ʒijaha juhuc Babe ŋicwofuŋ kiŋaŋ qacnehuc sâcne juhâmoniŋmu.
10 No nahac Mizipa haeo ŋehuc Kaldea ŋic warehuc juniŋmu sâc jaŋere maio dâŋmumu‐ŋeŋic erâ jupemu. Ŋoŋe ine waiŋ â oliwa hândâŋne â wiac gâcne i qa roro dameŋko rowaŋ‐ŋeŋicko râe guruc erâ hae ro rauc embiŋ sâc ira ŋec juc enʒepieŋ.”
11 Babe ŋicwofuŋ e ŋic nâfocne jaŋe Juda mâreŋko juniŋte mana‐jarehuc Gedalia Ahikamte ŋokâ, Safaŋte ŋosa hâcne soŋaŋ âkendâŋne‐jarewec i Judaŋic Moabi me Amoŋ me Edom mâreŋko me mâreŋ ira me ira juhuc biŋene mana‐fârembiŋ.
12 Irec Judaŋic sasawa hae mâreŋ sâc bâtâtiec‐jopakicne irecnec risierâ Juda mâreŋko Mizipa haeo Gedalia erao fisimbiŋ. Erâ waiŋ hândâŋ mecne, jâcfâri mecne i mâriri sâkohec fuame ro guruc embiŋ.
Isimaezi Gedalia râsi ecnewec
13 Kareare ŋokâ Johanaŋ â momori micne jaŋe hae mâreŋ ira siŋsaŋ qarâ jurambiŋzi ra Mizipa haeo Gedalia erao fuambiŋ.
14 Ehuc âzâcnembiŋ, “Amoŋŋic jaŋere ŋicwofuŋ Balisi e Netaniare ŋokâ Isimaezi qâhâmocguocte soreme fisiwec go i moc manakic me?” Ahikamte ŋokâ Gedalia e ine dâŋjeŋicte maname fârine mi ewec.
15 Eme Johanaŋ, Kareare ŋokâ hâcne, e Mizipa ira Gedalia kamierâ ʒiŋuc âzâcnewec: “Mana‐naretec ra Netaniare ŋokâ Isimae qâhâmozepac, eme ŋic moczi moc mi manazejec. E wemocko qâhâmocgume Judaŋic gorao tumaŋne‐fârehuc rârecguŋgopieŋzi mocwâc tâtiepie Judaŋic nâfocne jaŋe wâc sipirickeniŋmu?”
16 Ahikamte ŋokâ Gedalia e ine Karea ŋokâ‐ticne Johanaŋ ʒiŋuc âzâcnewec: “Go iŋuc mi ejâmbâŋkezemec, go Isimaere dâŋ mukic i burec.”