43
Aigita mâreŋko rambiŋ
1 Eme Jeremia e Wofuŋ Anutu‐jeŋiczi dâŋ âzâcne‐fârehuc jaŋerao sorewec i ŋic ŋokac sasawa jaza‐fârewec.
2 Jaza‐fâreme Hosajare ŋokâ Aʒaria â Kareare ŋokâ Johanaŋ erâ ŋic râŋgeŋne gâcne sasawa jaŋe Jeremia kecʒiŋuc âzâcnembiŋ: “Go burec ekomec, Wofuŋ Anutu‐nâŋec e ʒiŋuc nâzâcmurâ mi sorecguwec, ‘Ŋoŋe Aigita mâreŋko juniŋte mi ranʒepieŋ.’
3 Aricne, Neriare ŋokâ Baruku eki ine Kaldea ŋic jaŋere meo râec‐nâpoocmurâ manasuhuc mu qafeŋ egareekac hâcne, jaŋe qâhâmoc‐nâponiŋte me Babe haeo kâpâcwâruo bacnâpo raniŋte iŋuc eekac.”
4 Eme Kareare ŋokâ Johanaŋ â momori micne sasawa erâ ŋic ŋokac gâcne sâko jaŋe Wofuŋte dâŋ qatarahuc Juda mâreŋko mi ŋembiŋ.
5 Aricne, Kareare ŋokâ Johanaŋ â momori micne sasawa jaŋe Juda guruonec ŋic ʒanʒaŋne ŋicne ŋicne jaŋerao bâtâtiec‐jopakicnaonec Juda mâreŋko ŋec juc eniŋte risiembiŋ jaŋe hâcne rocjopa‐fârembiŋ.
6 Ine ŋic ŋokac naru motec mecne, ŋicwofuŋte otâfâc mecne, â ŋicwofuŋ momori fuŋfuŋfâc‐ticne jaŋere micne Nebuʒaradaŋzi Ahikamte ŋokâ Gedalia, Safaŋte ŋosa erao ŋic râec‐jopa‐fâreme jumbiŋ jaŋe mecne, erâ porofete Jeremia â Neriare ŋokâ Baruku jahe mâmâc rocjopambiŋ.
7 Rocjoparâ Wofuŋte dâŋ mana rereŋ mi ehuc ine Aigita mâreŋko rambiŋ; raku Tapanese haeo fisimbiŋ.
8 Eme Wofuŋte dâŋ i Tapanese hae ira Jeremiarao kecʒiŋuc fuawec:
9 “Go qânâ kâcɋene rorâ Tapanese ira Faraore ficmotâc fuŋnao Judaŋiczi honehapie mâreŋko duckezemec.
10 Erâ jazazemec, ‘Anutu Tâpiri Ɋuŋɋasaŋ Wofuŋ, Israere Anutu e ʒiŋuc mukac: Manakic, no kiŋaŋŋic‐nane, Babe ŋicwofuŋ Nebukaneza hâcne, ecnepe ware fisirâ qânâ duckepac ʒirec fainao eri ŋeŋe‐ticne heme ŋezejec, erâ ŋeŋe botâŋnao qoruc bupu erinehec fâreme domazejec.
11 E ware Aigita mâreŋte tâpiri qame wahaocmu, ehame hâmocte biŋe i hâmocko râec‐jopaocmu, â kâpâcwârure biŋe i kâpâcwâruo bacjopa raocmu, erâ ʒikare biŋe i ʒikazi jopaocmu.
12 Erâ nemufâc‐jeŋic jaŋere taha ufuŋ i turuŋkeme ʒaocmu â nemuɋâŋ wiac i baraocmu. Erâ lama soŋaŋ moczi ŋaqi‐ticnaonec fitic wiac ro behec eekac irec sâc Aigita mâreŋ ecnehuc wâcwiac‐ticne jâoc roocmu; ehame moczi aka mi hecneha mocwâc risie raocmu.
13 Ʒoaŋte nemu mujumbieŋ ere jâmâ wâtuŋ qânâzi bakicne i qazurâ Aigita mâreŋte nemufâc jaŋere ufuŋ ʒoczi rikeme ʒafâreocmu.’ ”