6
1 Wofuŋzi Mose dâŋ kecʒiŋuc âzâcnewec:
2 “Ŋic moc e ŋic âgo‐ticnere wiac hone soŋaŋ eocte râcnekicne i mickecnehuc bajuocmu me wiac moc fiuc roocmu, me ŋic âgo‐ticne bâʒâickehuc wiac jâoc roocmu e Wofuŋ râpeckerâ kiŋ bâfuaocmu.
3 Me wiac sifuckekicne i bâfuarâ mumupaŋ dâŋ burecne muhuc mickeocmu ine kiŋ jaha bâfuaocmu.
4 Ine ŋiczi wiac i me i ebac ehuc sâqocne bâfuaeŋgopieŋ i ehuc kiŋ hotâckeocmu jaha. Irec wiac fiuc roocmu me ŋic jopa sipiric ehuc roocmu me wiac hone soŋaŋ eocte râcnepie bâsifuckeocmu me wiac sifuckekicne bâfuaocmu,
5 me wiac irec me irec mumupaŋ dâŋ burecne muhuc sakareocmu i furu jaha bârisie‐fârezejec. Erâ i sawa mâcne, e wiac i sasawa irec 5‐konec wâŋ ʒuhuckerâ kiŋ tatara taha râeocmu dameŋ ira rune râcne‐fârezejec.
6 Erâ goki mucmu irec sâc lamafâc‐ticne jaŋeraonec ŋicne biaŋne moc Wofuŋte biŋe qahuc kiŋ tatara tahare biŋe taha baparao bafisizejec.
7 Eme taha bapa e Wofuŋte maio kiwiric jâoc rome ŋic e wiac i me i ebac ehuc kiŋ bâfuawec irec bâbâtâmire fuacnezejec.”
Taha bâzi ririkere sâcmutâc dâŋ gâcne
8 Wofuŋzi Mose dâŋ kecʒiŋuc âzâcnewec:
9 “Go Aroŋ â ŋokâfâcne ʒiŋuc mutâcne‐jarezemec: Qowi bâzi ririkere sâcmutâc kecʒiŋuc fokac: Qowi bâzi i alata faio ʒafeo jaha ʒahuc foha hae furezejec, ehame alatao ʒoc ʒakac i bâruŋkehuc fozejec.
10 Eme taha bapa e gie ŋaqi â hohose‐ticne heme hume qowi bâzi alatao ʒakume ʒafe fuawec i rorâ alata heririŋnao hesiezejec.
11 Iŋuc erâ gie ŋaqi wiac‐ticne mocwâc heunuckerâ ŋaqi omane herâ ʒafe wiac hae râpenao ʒafe hohoŋke mâreŋ biaŋne fokac ira barazejec.
12 Alata faio ʒoc i mi hâhâpo ʒahuc jaha fozejec, ehame taha bapa e furic sâc ʒoc tucne râerâ fainao qowi bâzi qandaŋkehuc ine wama bâzire wokemaŋ rikezejec.
13 Ehame alata faio ʒoc i mi hâhâpo ʒahuc jaha fozejec.
14 “Taha bâzi ririkere sâcmutâc kecʒiŋuc fokac: Aroŋ ŋokâfâcne jaŋe Wofuŋte maio alata fuŋko taha bâzi râenʒepieŋ.
15 Ehame moczi taha bâzire poroŋ uucne wokemaŋnehec me fufusuc moc, â wiac âsu biaŋhec fainao râekicne i sasawa rorâ alata faio rike siŋsiŋkeme Wofuŋte maio âsu biaŋ fuazejec.
16 Tiwâne ine Aroŋ â ŋokâfâcne jaŋe nânʒepieŋ, jaŋe wiac i goreŋ tâmiric tutumaŋ qoruc bozere tiri hae ʒoŋao nânʒepieŋ hâcne.
17 Tiwâ bâzi i goreŋ tâmiric mâc rikenʒepieŋ. Nore biŋe tiwâ bâzi rikekicne irec dâkâne moc qikiŋne‐jarepo hâcne, i sâqocne tâtâmire â kiŋ tatarare taha irec sâc taha tiri jâmbâŋ ekac.
18 Aroŋ ɋâricfâcne jaŋe sasawa Wofuŋte tiwâ bâzire dâkâne sâcne nâniŋmu irec sâcmutâc i mimiŋzi ɋâric foŋare rahuc juzejec. Ehame ŋic izi me izi wiac i ba bâuac ejarerâ tirine eocmu.”
19 Wofuŋzi Mose ʒiŋuc âzâcnewec:
20 “Aroŋ ŋokâfâcne jaŋeraonec moc wokemaŋ ruacneniŋmu dameŋ ira Aroŋ â ŋokâfâcne jaŋe taha bâzi kecʒiŋuc râenʒepieŋ: Poroŋ uucne amae 10‐konec wâŋ iŋuc râenʒepieŋ, ehuc gâcne furictere â gâcne ŋafere biŋe râenʒepieŋ.
21 Jaŋe wokemaŋhec bâsifuckerâ ʒocrâqâcko rikenʒepieŋ; eme rike hâmokicne i bazutec dâkâ piic piic eme taha bâzi iŋucne bafisirâ rike siŋsiŋketec Wofuŋte maio âsu biaŋ fuazejec.
22 Ehame Aroŋ ŋokâfâcne jaŋeraonec moc mamac‐ticne âkehockeocte wokemaŋ ruacnekicne e wâc iŋuc jaha taha bâzi Wofuŋte biŋe râehuc juzejec. Ʒi Wofuŋte mumupaŋ fofo sanaŋ. Taha i ine furu jaha rikenʒepieŋ.
23 Taha bapazi taha bâzi rikeocmu i moc mi nâhuc furu jaha râepie ʒafârezejec.”
24 Wofuŋzi Mose ʒiŋuc âzâcnewec:
25 “Go Aroŋ â ŋokâfâcne kecʒiŋuc jazazemec: Sâqocne tâtâmirere sâcmutâc i kecʒiŋuc: Qowi bâzi qâhâmoeŋgopieŋ hae ijaha sâqocne tâtâmire qowi Wofuŋte maio qâhâmonʒepieŋ, i wiac tirine jâmbâŋ.
26 Taha bapa sâqocne tâtâmire bâzi rikeocmu eki nâzejec; ine tutumaŋ qoruc bozere tiri hae ʒoŋao nâzejec.
27 Ŋic omane moczi ba bâuac eocmu e ine okacne fuacneocmu, me socticnezi ŋaqi moc ruacneme ŋaqi i tirific maŋko ʒurenʒepieŋ.
28 Â qowi biucne ʒaekac hapec i qanʒaŋnenʒepieŋ, me aeŋ kuʒio ʒaocmuo ine kuʒi i ʒure bâkereŋ enʒepieŋ.
29 Taha bapa ŋic jaŋe sâqocne tâtâmire taha irecnec nâzo murâ sâcne nâniŋmu, taha i wiac tirine jâmbâŋ hâcne.
30 Mâc sâqocne tâtâmire qowi mocte soc tutumaŋ qoruc bozere maŋko kiwiric rorore manasuhuc tirificko bafembiŋko ine qowi i moc mi nânʒepieŋ, aricne, i ʒocko râepie ʒafârezejec.