16
Mâsire mupie Jesuzi qatara‐jarewec
(Mar 8:11–13; Luk 12:54–56; 11:29)
1 Eme farisaio â sadukaio ŋic jaŋe Jesurao fisirâ mu esâic ecnehuc mumbiŋ, “Go mutec sambâŋko fuŋne qaqa mâsi moc fuame honenaŋ.”
2 Mupie jazawec, “Ŋoŋe hae ŋafezo eme mueŋgopieŋ, ‘Furic karorac emasaŋkekacte tomâcko ʒoaŋ qaocmu.’
3 Â hae fureme mueŋgopieŋ, ‘Dudupi sâsâoc fuakacte hoe heocmu.’ Ŋoŋe karorac qânikiŋ irec fuŋne manaeŋgopieŋ, â dameŋ ʒirec fuŋne sâcne mi manaeŋgopieŋ me?
4 Ŋic hehesicne â miti qiqikiŋ ŋoŋe mâsi moc honeniŋte muŋgopieŋ. Ŋoŋe furune moc mâcne, Jonarao fuawec mâsi i sawa fuame honeniŋmu.” Iŋuc murâ behec‐joparâ rawec.
Farisaio â sadukaio ŋic jaŋere uŋ muwec
(Mar 8:14–21)
5 Eme motec jaŋe poroŋte nikec‐jopame foha Jesuhec riqic fotâcnerâ ocniŋucnao fisihuc manasumbiŋ.
6 Ehame Jesuzi ʒiŋuc jazawec: “Ŋoŋe farisaio â sadukaio hâmu goreŋ‐jeŋic bâec bacnehuc paŋsawa junʒepieŋ.”
7 Iŋuc jazame jaŋe ʒiŋuc muhuc nazaŋ gazaŋ embiŋ: “Poroŋ foha warembeneŋte iŋuc nâzâkac.”
8 Dâŋ muhapie hazec‐ticnao hume manarâ jazawec, “Oi, mamanasiŋ gogoroŋ, ŋoŋe wemocte poroŋ behembieŋ irec nazaŋ gazaŋ eŋgopieŋ?
9 No wiac epo irec biac nikec‐ŋopawecte mi manasuŋgopieŋ me? No poroŋ memoc izi ŋic 5 tauseŋ gumec‐jopape nâ gapec erâ tiwâne ro qânusuc epie sasac wezimuc fusewec?
10 Â poroŋ 7 izi ŋic 4 tauseŋ gumec‐jopape nâ gapec erâ tiwâne ro qânusuc epie sasac wezimuc fusewec?
11 No poroŋte mi ŋazapac i weniŋucte mi mana tarambieŋ? Farisaio â sadukaio goreŋ‐jeŋicte paŋsawa erâ junʒepieŋ, iŋuc mukopac.”
12 Dâŋ i jazame miŋecne mana‐hâmorâ mumbiŋ, “O, goreŋ jâmbâŋte mi mujec, farisaio â sadukaio miti mumu‐jeŋicte mujec.”
Petorozi Jesure fuŋne mutaniŋkewec
(Mar 8:27–30; Luk 9:18–21)
13 Jesu e Kaisarea hae, ŋicwofuŋ Filipozi mume bambiŋ, i bâqiŋkezo ehuc motecfâcne mu indiŋ ejarerâ muwec, “Ŋic jaŋe Ŋic Fâri Wâtuŋne ere mo muŋgopieŋ?”
14 Eme jaŋe âzâcnerâ mumbiŋ, “Gâcnezi Johane Miti Opâ fufuŋke mueŋgopieŋ, gâcnezi Elia, â gâcnezi Jeremia me porofete moc, iŋuc mueŋgopieŋ.”
15 Iŋuc muhuc âzâcnepie wio‐jarerâ muwec, “Â ŋaŋacne ine nore mo muŋgopieŋ?”
16 Wio‐jareme Simoŋ Petorozi muwec, “Go Kristo, Anutu juju sanaŋ ere Ŋokâ.”
17 Mume Jesuzi ʒiŋuc âzâcnewec: “Simoŋ Jonare ŋokâ, gore manape ʒerine ekac, mamana i ŋicmaŋkonec mi fua‐garekac, sambâŋ Mamac‐nanezi mujaŋgeŋke‐garewec.
18 Irec gazape manac, go ʒâŋege Petoro, eme noni haroŋaŋ irec faio kikefuŋ gurufâc‐nane râec‐jopape hârâcte tâpirizi mi qâhoc‐jopaocmu.
19 Erâ no sambâŋ uucmaŋte ki garepemu. Eme go mâreŋko niniŋgiŋ gie batec sambâŋko wâc fârio qaocmu, â mâreŋko gogoroŋ gie batec sambâŋko wâc fârio qaocmu.”
20 Iŋuc murâ motecfâcne mic muac sanaŋne ejarehuc muwec, “No Kristo jukopac, irec ŋic moc mi jaza‐jâmbâŋkenʒepieŋ.”
Hâmorâ fahareocmu irec biŋedâŋ mufua‐jarewec
(Mar 8:31—9:1; Luk 9:22–27)
21 Dameŋ ira Jesuzi fuŋkerâ, juku wiac fuacneocmu irec dâŋ motecfâcne mufua‐jarewec. Ehuc Jerusalem haeo feme soŋaŋ â taha bapa micne â miti qaqazu jaŋe wiac gâgâpâcne ecnehuc qapie hâmorâ ʒoaŋ jahec â moc eha ɋârerâ fahareocmu, irec dâŋ jaza‐fârewec.
22 Jazame Petorozi bucko hefârerâ qataracnehuc muwec, “Wofuŋ, Anutuzi ŋezicgume wiac iŋucne mi mac fua‐gare‐jâmbâŋkeocmu.”
23 Mume fotikierâ Petoro ʒiŋuc âzâcnewec: “Sataŋ go râriec, go hata ŋeŋezic enarekic, go dâŋ mukomec i Anuture dâŋ aricne, i ŋicdâŋ ekac.”
Jesu bâjâpezore dâŋ
24 Dameŋ ijaha Jesuzi motecfâcne ʒuhuckerâ ʒiŋuc jazawec: “Ŋic moczi no bâjâpecnuzo murâ maŋ sahac‐ticnere dâŋ qikiŋnehuc maripoŋ‐ticne hâporâ bâjâpecnuzejec.
25 Moc e juju‐ticne sakareme sifuckecneocmu, â moc e nore erâ qikiŋneme fuacneocmu.
26 Moc e mâreŋte wiac sasawa hure‐fâreku kinduŋ bânduŋ bajuhame juju‐ticne omaeme wemo wiac fârine focneocmu? Me juju‐ticnere kiwiric wemo wiac rome risiecneocmu?
27 Manaŋgopieŋ, Ŋic Fâri Wâtuŋne e Mamac‐ticnere tatamaczi fainao uucne riŋkeha aŋelofâc‐ticne amec‐jopame wahaniŋmu, eme ŋic mâmâc sasawa juju bapa‐jeŋicte sâc okacne bazu‐jareocmu.
28 No jâmbomac ŋazape: Domaŋgopieŋ ʒi ŋoŋeraonec gâcne hâmoczi mi bâqiŋ‐ŋopaha Ŋic Fâri Wâtuŋnezi waharâ Wofuŋ juju‐ticne tâtâc bâfuame honenʒoŋgopieŋ.”