21
Jesu e doŋgio Jerusalem haeo fewec
(Mar 11:1–10; Luk 19:29–38; Joh 12:12–19)
1 Eme raku Jerusalem hae bâqiŋkezo embiŋ. Ehuc Betefage hae, Oliwa tiki fuŋnao ŋewec, ira fisirâ Jesuzi motecfâcne jaŋeraonec jajahec jasa sorec erâ
2 kecʒiŋuc muwec: “Ŋohe raecko hae ŋekac ira rarâ doŋgi neŋgoc motec niŋgiŋko domakopirec honec‐jofarâ firuec‐jofarâ barec‐jofanic.
3 Ŋohe iŋuc epire moczi mu wioc eŋacteme muzepirec, ‘Wofuŋ e irec mukac.’ Iŋuc mupire qikiŋne‐ŋacteocmu.”
4 Wiac i mâc mâcne, porofete ere findaŋdâŋ deŋkeocte iŋuc ekicne. E dâŋ kecʒiŋuc qâreŋkewec:
5 “Zioŋte otâ âzâcneniŋ,
Manakic, ŋicwofuŋgezi gorao fakac,
e maŋuruczi doŋgio ŋehuc fakac,
mafa dete motecnezi âsickeme fâkopirec.”
6 Eme motec jahe rarâ Jesure mic reŋkehuc
7 doŋgi neŋgoc motec bacjofa warepire fainao ŋaqi‐jeŋic rumackepie ferâ ŋewec.
8 Eme ŋic jaŋeraonec bocjahazi ŋaqi‐jeŋic hatao rumackembiŋ â tucnezi ʒariŋ bazurâ hatao herambiŋ.
9 Eme ŋic guru sâko roʒâc bâʒâŋiŋ ecnembiŋ jaŋe kecʒiŋuc muhuc ofac hecnembiŋ: “Ohec, Dawidire ɋâriczi ware‐nârec. Wofuŋte micte ware‐nârekomecte mumbiaŋgunaŋ. Ohec, Anutu faic sambâŋko.”
10 Eme Jerusalem haeo feme hae rune jaŋe bujeŋic fahareme fickonec waharâ mâreŋ qanʒaŋnerâ domahuc mumbiŋ, “Mozi wareme eŋgopieŋ?”
11 Mupie jazambiŋ, “Porofete Jesu, e Galilaia mâreŋko Nazarete haeo fuakicnezi.”
Jesu e taha ufuŋ furu muwec
(Mar 11:11–24; Luk 19:45–48; Joh 2:13–22)
12 Eme Jesuzi taha ufuŋko ferâ wiac nareŋ gareŋ ehuc domambiŋ jaŋe jâpec‐joparâ moneŋ katapa â hapâ ŋeŋe herândiŋkewec; ehuc jazawec,
13 “Dâŋqâreŋ kecʒiŋuc fokac, ‘Ufuŋ‐nane i nunumu fic ezejec’, ŋoŋe ine epie fiuc sindaŋhec jaŋere qânâuŋ tinac ekac.”
14 Eme ira juhame ŋic tiŋtuŋ â puriŋ jaŋe erao rapie bâpiaŋ‐jopawec.
15 Iŋuc eme taha bapa micne â miti qaqazu jaŋe mâsi‐ticne honembiŋ â naru motec taha ufuŋko ofac hecnehuc “Ohec, Dawidire ɋâriczi ware‐nârekic” iŋuc mupie manambiŋ. Erâ irec â irec mâmâc mana gâpârembiŋ;
16 erâ Jesu âzâcne mumbiŋ, “Keci jaŋe ofac hegarepie manakomec?” Mupie muwec, “Manakopac. Erâ ŋoŋe mitidâŋ moc kecʒiŋuc fokac i mi woseeŋgopieŋ me:
‘Gegecne â susuonec jaŋere maŋ baafecketec micjeŋicko gore mumuteŋ fuakac’?”
17 Iŋuc jazahuc râpec‐joparâ Jerusalem haeonec hurâ Betania haeo ferâ ŋafeme fowec.
Nemuja jâcnezi Jesure micte ururuckewec
18 Eme furicte hae sâkoo risiehuc nânâre ecnewec.
19 Erâ hatamecko nemuja jâcne moc honerâ fuŋnao rarâ fârine basahuc rehacne sawa domame honewec. Honerâ jâc kecʒiŋuc âzâcnewec: “Go hohozec erâ mâc domahuc juzemec sanaŋ.” Mume izia jâc e ururuckewec.
20 Eme motec jaŋe i honerâ wareckerâ mumbiŋ, “Jâc e weniŋuc erâ biac ɋaŋakac?”
21 Mupie Jesuzi jazawec, “No jâmbomac ŋazape, ŋoŋe maŋguru mi ehuc mamanasiŋ fârihec juniŋmu, eme jâcko mâsi fuajec i sawa mi baniŋmu; ŋoŋe tiki kecocni ʒiŋuc âzâcneniŋmu: ‘Tiki go hockerâ hâwecko rucnerâ huc’, eme dâŋŋeŋic reŋkeocmu.
22 Erâ wâc mamanasiŋ fârihec juhuc wiac irec me irec numupie fua‐ŋareocmu.”
Jesu â soŋaŋ micne eesâic embiŋ
(Mar 11:27–33; Luk 20:1–8)
23 Eme raku taha ufuŋko ferâ miti qazu‐jarehuc ŋehame taha bapa micne â soŋaŋ jaŋe erao rarâ ʒiŋuc muhuc indiŋkembiŋ: “Go ʒira wiac eekic i more micte eekomec? Mozi mugareme eekomec?”
24 Mupie Jesuzi dâŋ kecʒiŋuc muhuc bâtikie‐jarewec: “No dâŋ mocjaha sawa wio‐ŋarepe nazapie noni iŋuc jaha, more micte wiac eekopac, i okacne ŋazapemu.
25 Johane Miti Opâ gie‐ticne i wenirec fuawec, sambâŋkonec me ŋickonec?” Iŋuc muhuc wio‐jareme jaŋe, dâŋ wenimoi munaŋ, muhuc maŋguru erâ ʒiŋuc mumbiŋ: “Nâŋâc ‘sambâŋkonec fuawec’ iŋuc mupene muocmu ‘Hâc, eme wemocte dâŋticne mi manambiŋ?’
26 Me ‘ŋickonec fuawec’ iŋuc munaŋte ine ŋic jaŋere hâwic‐nâpokac, jaŋe ʒeŋgoma Johane porofete mucneeŋgopieŋ.”
27 Iŋuc murâ Jesu ʒiŋuc âzâcnembiŋ: “Mi manaŋgopeneŋ.” Eme Jesuzi dâŋ ʒiŋuc bâtikie‐jarewec: “Wiac murâ sâcne, eme noni iŋuc jaha, more micte wiac eekopac, okacne wâc mi ŋazapemu.
Motec jajahec wiac sâctiri epic
28 “Dâŋ moc ŋazape mana honeniŋ. Ŋic moc ere ŋokâ jajahec jupic. Eme qanaŋ ŋokâ‐ticne moc ʒiŋuc âzâcnewec: ‘Ŋokâ go miŋecgac ra waiŋ gie bac.’
29 Âzâcneme muwec, ‘Sâcne, mamac, bapemu.’ Iŋuc murâ ra qâoma ewec.
30 Ehame ʒâhec mamac e ŋokâ‐ticne moc dâŋ ijaha âzâcnewec. Âzâcneme muwec, ‘Mozi, mi bapemu.’ Iŋuc murâ ʒâhec bune sâqoreme sifu ra bawec.
31 Eme ŋoŋe mo moteczi mamac‐ticnere mic reŋkewec muŋgopieŋ?” Jaŋe mumbiŋ, “Dâŋ ʒâhec âzâcnewec e.” Mupie Jesuzi ʒiŋuc jazawec, “No jâmbomac ŋazape: Takesi ro bâsifuc ŋic â sasec ŋokac jaŋe Anuture uucmaŋko raʒihapie ŋoŋe râpene eniŋmu.
32 Johane fisirâ tiŋne jujure hata ŋowatume ŋoŋe miti‐ticne qikiŋnehapie takesi ro bâsifuc ŋic â sasec ŋokac jaŋe mana ʒakiembiŋ. Jaŋe iŋuc epie ŋoŋe honec‐joparâ ʒâhec busâqoc bâfuarâ miti‐ticne mamana i sifu mi embiŋ.
Waiŋ gie soŋaŋ sâqocne jaŋere binaŋ
(Mar 12:1–12; Luk 20:9–19)
33 “No kesaic dâŋ moc mupe mananiŋ. Bomboŋ moczi mâreŋ mocko waiŋ saraku sara‐fârerâ râreckehuc sac hafewec. Erâ fârinere giefic barâ soŋaŋ jaŋere fic iŋuc jaha bawec. Iŋuc efârerâ soŋaŋ râec‐joparâ mâreŋ mocko rawec.
34 Jukuhame fâri fufua dameŋ maickeme motecfâcne jaŋe fârine roniŋte sorec‐jopame rarâ soŋaŋ jaŋerao fisirâ mupie
35 soŋaŋ jaŋe motec rocjoparâ moc qa tuŋtuŋ ecnembiŋ â moc qarâ qâhâmombiŋ â moc qânâzi hembiŋ.
36 Iŋuc epie gie runezi manarâ harierâ motec bocjaha sorec‐jopame ra fisipie sâc ijaha ejarembiŋ.
37 Eme ʒâhec ŋokâ jâmbâŋ‐ticne ʒiŋuc manasuhuc sorewec: ‘Ŋokâ‐nane ra fisime honerâ araŋ bacneniŋmu.’
38 Eme soŋaŋ jaŋe ŋokâ jâmbâŋ‐ticne honerâ ʒiŋuc muhuc nazaŋ gazaŋ embiŋ: ‘Eki hâcne juku gie ʒi rauckeocmu, irec nâŋâc e qarâ gie ʒi sakarepene nâŋâcne ezejec.’
39 Iŋuc muhuc rorâ gieonec tuŋke tuŋke raku qâhâmombiŋ.
“Gie rune e fisirâ soŋaŋ weniŋuc ejareocmu?”
40 Mume jaŋe ʒiŋuc âzâcnembiŋ: “Wiac gâgâpâcne embiŋte wiac gâgâpâcne jaha ejareocmu.
41 Erâ gie‐ticnao soŋaŋ biaŋne râec‐jopame jaŋe dameŋ sâc fârine râcnehuc juniŋmu.”
42 Iŋuc mupie Jesuzi kecʒiŋuc muhuc ʒuhuckerâ jazawec: “Miti papiao dâŋ moc ʒiŋuc fokac i ŋoŋe moc mi woseeŋgopieŋ me?
‘Ficbapa ŋic jaŋe wâtuŋ surehuc behembiŋ,
wâtuŋ izi mi jâmâ wâtuŋ ezejec i!
Wiac i Wofuŋte micte iŋuc fuame
ŋiczi honepene mâsi furune ekac.’
43 Irec ŋazape mananiŋ: Anuture uucmaŋ i ŋoŋe ŋowac rorâ ŋic furune jarezo. Eme jaŋe fârine‐ticne bâfuaniŋmu. [
44 Ŋic moczi jâmâ wâtuŋ ira herâ sahac‐ticne imackeocmu. Â wâtuŋzi ine ŋic mocte faio waha qarâ qâgâreckeocmu.]”
45 Kesaic dâŋ iŋuc mume taha bapa micne â farisaio jaŋe mana tararâ mumbiŋ, “Oc, i nâŋâcne mukac.”
46 Iŋuc murâ ro qaniŋte manasurâ, ŋic jaŋe Jesure porofete mumbiŋte ine hâwic‐jopame behembiŋ.