6
Mitio wiac sahac mumuteŋte erâ mi ezo
1 “Ŋoŋe miti babaju i mâc ŋic mumuteŋte manasuhuc mi bajunʒepieŋ. Iŋuc moc epie sambâŋ Mamac‐ŋeŋiczi mi suanʒeŋ‐ŋopaocmu.
2 Irec go ŋic bâmec bajarehuc gâcnezi hone manac egareniŋte qeŋ mi qazemec. Mitiŋic burec burec jaŋe hâcne mitificko â tomao ŋic bâmec bajareeŋgopieŋ, gâcnezi honec‐joparâ muafec‐jopaniŋte. No jâmbomac ŋazape: Jaŋe furi‐jeŋic biac ropie tarakac.
3 Mâcne, go bâmec bajarehuc mefâregezi wiac ecmu i qanazi mi manazejec.
4 Iŋuc etecne bâmec eehâmoge soŋsoŋko fogareocmu. Eme Mamacge wiac soŋsoŋko hone manac eekaczi okacne bazu‐gareocmu.
Nunumure dâŋ
(Luk 11:1–4)
5 “Ŋoŋe bucko numuniŋte mitiŋic racne jaŋe iŋucne mi enʒepieŋ. Jaŋe mitificko â tomao numuniŋte boc ejareekac, ine ŋiczi hone warec ejareniŋte iŋuc eeŋgopieŋ. No jâmbomac ŋazape, hone warec ejarepie izi furi‐jeŋic eme tarakac.
6 Go numuzo murâ ficgao ferâ motâc herâ Mamacge soŋsoŋko juekac erao numuzemec. Eme Mamacge soŋsoŋko wiac hone manac eekaczi fârine bâfua‐gareocmu.
7 Ŋoŋe nunumu mâc miczi mu raʒic wefuc ehuc mi munʒepieŋ. I miti tâmiric jaŋere mâsi. Jaŋe hâcne dâŋ bocjaha wose rakupene mana‐nâreocmu mueŋgopieŋ.
8 Irec ŋoŋe jaŋe iŋucne mi enʒepieŋ. Mamac‐ŋeŋic e mi numucnehapie wiac basaeŋgopieŋ i biac manaekac.
9 Irec ŋoŋe kecʒiŋuc muhuc numunʒepieŋ:
‘Sambâŋ Mamac‐nâŋec, gore ʒâŋe tiri fozejec.
10 Ware maŋ sâc mâreŋ sâc Wofuŋ enârec.
Sambâŋko gore micrereŋ fokac,
iŋuc jaha mâreŋko nâŋerao fuazejec.
11 Go miŋecgac nânâ sâcnâŋec nârezemec.
12 Kiŋtofa‐nâŋec behe‐nârec,
nâŋe iŋuc jaha ŋic jaŋere kiŋtofa beheŋgopeneŋ.
13 Eesâicko mi râec‐nâpozemec.
Sâqocnaonec bâhoc‐nâpozemec.’
14 Ŋoŋe ŋic jaŋere bahac behepie sambâŋ Mamac‐ŋeŋiczi ŋoŋere bahac iŋuc jaha beheocmu.
15 Me ŋoŋe ŋic jaŋere bahac bajupie Mamac‐ŋeŋiczi ŋoŋere bahac iŋuc jaha bajuocmu.
Sowa jujure dâŋ
16 “Ŋoŋe sowa juhuc ʒâŋe mai‐ŋeŋic sorondoŋ mi ezejec. Mitiŋic racne jaŋe hâcne iŋuc ehuc ʒâŋe mai‐jeŋic fâsâeme jueŋgopieŋ, ŋic gâcne jaŋe sowa juju‐jeŋicte ʒâŋitac‐jopaniŋte. No jâmbomac ŋazape, jaŋe suanʒeŋ‐jeŋic biac ropie tarakac.
17 Goki ine sowa juhuc qizecge tokic ruacnerâ ʒâŋe maige ʒurezemec.
18 Eme ŋic jaŋe sowa jujuge mi ʒâŋitanʒepieŋ, Mamacge soŋsoŋ juekac e buc manazejec. Eme e soŋsoŋko wiac hone manac eekaczi okacne bazu‐gareocmu.
Mafa sisirowenere sasec mi ezo
(Luk 11:34–36; 12:33–34)
19 “Ŋoŋe mâreŋte mafa, wâfu qoʒazaŋzi nânâne â ŋiczi fiuc rorone, i boc mi hurepie fezejec.
20 Ŋoŋe sambâŋte boreŋ ʒeŋaŋ, wâfu qoʒazaŋzi mi nânâne â ŋiczi fiuc mi rorone, i hurepie fezejec.
21 Manakic, ʒeŋaŋge foocmu ijaha maŋge foocmu.
22 Sahacgere lambe ine ʒâŋege. Ʒâŋege biaŋne fohuc sahacge sâcne batamaecneocmu,
23 ʒâŋege sâqoreme ine sahacge tiŋtuŋ qaocmu. Â maŋgere tatamaczi dapâc eme, opo, dapâc mo iŋucne fua‐gareme tiŋtuŋ qahuc jucmu.
24 Motec mocjahazi ŋicbomboŋ jajahec jahere kiŋaŋ sâcne mi qaocmu. E moc âgo ecnehuc moc hone takireocmu, ehuc moctao qohotahuc moc râpeckeocmu. Ŋoŋe iŋuc jaha Anuture gie mecne â moneŋ mafa qâqâhâc sâko irec gie mecne sâckoa sâcne mi bacjofaniŋmu.
Wiac jabanere mu mezac boc mi ezo
(Luk 12:22–32)
25 “Irec ŋazape mananiŋ: Ŋoŋe juju‐ŋeŋicte mana mezac ehuc ʒiŋuc boc mi munʒepieŋ: Wemo wiac ba nâc enaŋmu? Me sahac‐ŋeŋicte mu heŋɋâŋ ehuc ʒiŋuc boc mi munʒepieŋ: Wemo wiac rojunaŋmu? Ŋoŋe muniŋ, juju‐ŋeŋiczi fârine me nânâzi fârine? Sahac‐ŋeŋiczi fârine me ŋaqizi fârine?
26 Ŋoŋe sawao wipe honeniŋ, jaŋe he sarac me qa roro me nâ rowaŋ mi eeŋgopieŋ. Eme sambâŋ Mamac‐ŋeŋiczi sifu nânâ bâfua‐jareekac. Eme weniŋuc, ŋoŋe jaŋere wahamicne me?
27 Me ŋoŋe tâpiri‐ŋeŋic moc fokacko mu waiʒoc ehuc sahac‐ŋeŋic sâcne basanaŋkerâ dameŋ ŋondeŋ bembeŋne mac jufeniŋmu?
28 Iŋuc eene mi fokacko ine wemocte ŋaqi qoructe mana mezac boc eeŋgopieŋ? Ŋoŋe firindoac kâteo fuarâ domaekac, irec fuŋne mananʒapiŋ me. E ŋaqi qoruc‐ticnere gie mi baekac.
29 Eme irec ŋazape mananiŋ: Salomo e eri qaraweŋ‐ticneheczi hawari biaŋ iŋucne mi rojuwec.
30 Eme kâteo âri wiac dodocne, miŋecgac iŋuc fuaekac â tomâcko iŋuc mârâŋkeekac, i Anutuzi sifu mume hawari biaŋ fuaekac. Eme ŋoŋe ŋaqi qoruc sâcne mi bâfua‐ŋareocmu me, mamanasiŋ gogoroŋ ŋoŋe?
31 Irec ŋoŋe mu mezac ehuc ʒiŋuc boc mi munʒepieŋ: ‘Wemo wiac ba nâc enaŋmu, wemo wiac rojunaŋmu?’
32 I qâpuc jaŋe hâcne maŋ mamanasu‐jeŋic ira duckepie foekac. Ŋoŋe wiac i tâmiric sâcne mi juniŋmu, i sambâŋ Mamac‐ŋeŋiczi manaekac.
33 Ŋoŋe ere sambâŋ miti â ere tiŋke biaŋ hata ira maŋ mamanasu‐ŋeŋic qanaŋ râepie fozejec, eme fainao wiac gâcne sasawa i wâc fua‐ŋareocmu.
34 Ŋoŋe tomâckore harac huacbuc mi enʒepieŋ. Tomâckore harac huacbuc i tomâckore biŋe. Ʒoaŋ gie bapa sâc ʒâic‐ticnezi jahacne biŋe fome sâckeocmu.