137
Judaŋic Babiloŋ mâreŋko juhuc makuc gae hembiŋ
1 Babe mâreŋte opâ mecnao,
Zioŋte manasuhuc kiohuc ŋembeŋ.
2 Ehuc kakikic jâc tieŋnao,
gita‐nâŋec ɋetickepene domawec.
3 Ocna rucnâpombiŋ jaŋe gae henaŋte munârembiŋ,
bâbâʒâicfâc‐nâŋec jaŋe ʒeri enaŋte ʒiŋuc nâzâmbiŋ:
“Zioŋte gae‐ŋeŋic moc hepie mananaŋ.”
4 Nâŋe weniŋuc Wofuŋte gae moc
mâreŋ jabao juhuc henaŋmu?
5 Jerusalem, gore nikecnuocmuo ine
mefâre‐nane hâmo ɋaŋac ezejec.
6 Go mi maŋguhuc jupemuo,
me Jerusalem haere manape
aŋacte micne sâko mi eocmuo ine
nameŋ‐nanezi ŋaŋarac‐naneo bohotazejec.
7 Wofuŋ, go Jerusalem hae imackembiŋ
dameŋ ira Edomte ɋâricfâc jaŋe
wiac embiŋ, i manasu‐jarezemec.
Ʒiŋuc wirambiŋ: “Qâropieniŋ, qâropieniŋ,
wâtuŋne herisie‐fâreniŋ!”
8 Babe rune, ima qaqa!
Moczi nâŋe enâremeŋ ijaha egareocmu
e juhâc qâhâmozejec!
9 Moczi kogocfâcge qânâo hefâuc‐jopaocmu
e juhâc qâhâmozejec!