26
Mitiŋic e Wofuŋte ecneha mu wâwâsic ecnekac
1 O Wofuŋ, go dâŋnane mufâsâezemec,
no maŋ humuc hata‐mae juekopac,
â Wofuŋ go paŋnea manasiŋguekopac.
2 Wofuŋ, go esâicnurâ fuŋne‐nane bajaŋgeŋkec,
maŋnane â mamanasu‐nane hone wosâec.
3 Aki anonocge hone dendeŋneekopac,
gorao qohotahuc hata‐nane juekopac.
4 Eeatuc ŋic jaŋehec ŋec domac mi eekopac,
gibioc‐jeŋichec jaŋere guruo mi juekopac.
5 Sâqocne bapa jaŋehec jujure takicnuekac,
â sindaŋne jaŋehec ŋeŋe wirec mi ŋepemu.
6 Menane ʒurekupe ɋaɋackeme,
Wofuŋ, alatage râreckeekopac.
7 Ehuc daŋge gae hesokarâ heekopac,
â mâsige sasawa mutaniŋkeekopac.
8 O Wofuŋ, no fic haegere aŋacnukac,
ʒâŋe rarage fokac hae mâreŋ i hâcne.
9 Ŋic sindaŋne jaŋehec mi bâsirowecnuzemec,
soc nânâ jaŋehec juju‐nane mi hetâcnezemec.
10 Jaŋe hâcne wiac hehesicne manasu biric eeŋgopieŋ,
â bâbâmiriŋ moneŋzi mefâre‐jeŋic fusucmakac.
11 No ine maŋ humuc hata‐mae juekopac,
firuecnuhuc anonocnuzemec.
12 Kike‐nanezi mâreŋ wâwâneŋko âte ʒakiekopac;
ŋic tutumaŋ sâkoo Wofuŋ mucne bacnepemu.