32
Sâqocne bâbâtâmire i wiac furi sâko
1 Ŋic moc bahac‐ticne behekicne,
â sâqocne‐ticne bâtâmirekicne,
ere manape ʒerine ekac.
2 Ŋic moc Wofuŋzi manacneme kiŋhec mi eekac,
â maŋticnao eatuc mi fokac,
ere manape ʒerine ekac.
3 No sâqocne‐nane hesoŋkezo mupe sahac‐nane wahawec,
ʒoaŋ ʒora husehuc jupo Irec.
4 Ŋafe ʒoaŋ sâc megezi badapecnumeŋ,
eme maŋwamboŋ‐nane kereŋkewec,
ʒoaŋ sanaŋ qakume wiac hahaŋkeekac irec sâc.
5 No sâqocne‐nane mufua‐garepo,
â hehesic‐nane mi hefackepo;
no mupo, “Bahac‐nane Wofuŋ mufuacnepe.”
Eme sâqocne‐nanere kiŋtofa behemeŋ.
6 Irec mitihec juekaczi ʒârâ hâriŋ dameŋko numu‐garezejec;
eme opâ rumi sâko fisiocmu,
izi siwiŋne fehuc e mi heuaocmu.
7 Go maro enarehuc ʒârâ ʒâpâre sabecnuekic,
ehuc rârec rârec sisipiricte erâ ŋezicnuekic.
8 Wofuŋzi mukac: Hata âtecmurâ mugarekicne,
i qazu‐garehuc gowatupe,
no ʒâŋe‐nanezi hone soŋaŋ egarepe.
9 Becâsic me doŋgi, mamana tâmiric,
jahere sâc mi ezemec.
Jahe micko kikizi bâmâteŋ‐jofazo,
i tâmiric mi bâjâpec‐nâponicmu.
10 Ŋic sindaŋne e maŋʒârâ bocjaha fuacneekac;
Wofuŋtao qohotaekac e ine aki anonoczi bârârâŋkeocmu.
11 Ŋic tiŋne ŋoŋe Wofuŋ bubiaŋ manacnehuc ʒeri eniŋ;
maŋsioc tâmiric juŋgopieŋ ŋoŋe kiwae‐fâreniŋ.