56
Râsi mana suac‐jopahuc Anuturao rorowecke
1 O Anutu, go nore buge sâqoreoc, ŋiczi jâpecnuŋgopieŋ;
ʒoaŋ ʒora ʒikaŋiczi guriŋnuŋgopieŋ.
2 Râsifâc‐nane jaŋe ʒoaŋ ʒora jâpecnuŋgopieŋ,
bocjahazi sahac fefe ehuc râsi enareŋgopieŋ.
3 Hâhâwiczi fua‐nareekac,
dameŋ ira gorao roweckeekopac.
4 No Anutuhec juhuc dâŋticne mumbiaŋkeekopac,
Anuturao roweckehuc hâwic tâmiric juekopac,
ŋiczi wemo enareniŋmu?
5 Dameŋ sâc hata‐nane hesifuckeniŋte ʒoɋac eeŋgopieŋ,
mamanasu‐jeŋiczi bâsâqorecnuniŋte gie baeŋgopieŋ.
6 Jaŋe heâckerâ ruc banareeŋgopieŋ,
kike hata‐nanere hetâc roeŋgopieŋ,
juju‐nane omaeocte hejâpeeŋgopieŋ.
7 Irec sindaŋ‐jeŋicte okacne jarezemec!
O Anutu, go kimbeŋko ŋicguru i qâfiec‐jopazemec!
8 Ʒika kipo i wose‐fâremeŋ,
ʒâŋeuc‐nane wose qâreŋ etec
papiagao mi fokac me?
9 Eme no wirapemu dameŋ ira râsifâc‐nane bâsuec‐jopazo.
No manakopac, Anutu e no âgo enarekac.
10 Anutu, dâŋticne mumbiaŋkeekopac,
Wofuŋ, dâŋticne mumbiaŋkeekopac,
11 Anutu erao hâcne roweckehuc hâwic tâmiric juekopac,
ŋiczi wemo enareniŋmu?
12 O Anutu, no dâŋ mupaŋkepo i fârine bâfuape,
no daŋge bâzi taha bagarepe.
13 Go juju‐nane hâmockonec batarameŋ,
â kike‐nane biric boroc ezacte basanaŋkemeŋ.
Irec ʒi Anuture maio, jujure tatamacko jupemu.