97
Anuture guriŋ bapa gie
1 Wofuŋzi guriŋ bakacte mâreŋ e ʒeri eoc,
hâwec mâreŋ biri ʒora jaŋe bubiaŋ mananiŋ!
2 Karorac â duŋdapâczi e râreckerâ fokac;
tiŋne â mumutiŋ izi eri ŋeŋe‐ticnere hobeteŋ ekac.
3 Ʒoczi bâruŋkehuc bâniecnekac,
ehuc râsifâcne rârec rârec ʒâseŋ‐jopakac.
4 Bâbâric‐ticnezi hae mâreŋ batamaekac;
mâreŋzi honerâ ɋarac ɋarac qakac.
5 Tiki jaŋe Wofuŋte maio du âtehuc dockeŋgopieŋ,
mâreŋ sâko mâreŋte Wofuŋ ere maio.
6 Sambâŋne sambâŋne jaŋe tiŋne‐ticne mutaniŋkeŋgopieŋ,
â ŋicne ŋicne eri tatamac‐ticne honeŋgopieŋ.
7 Ɋâŋ qâqâtâc babaju jaŋe mimi faio feŋgopieŋ,
ɋâŋjeŋicte penaroŋ eeŋgopieŋ jaŋe hâcne;
nemu sasawa mai‐ticnao dapeŋgopieŋ.
8 Zioŋ e manarâ ʒeri ekac,
Juda hae sâc jaŋe aŋac‐jopakac;
Anutu gore mumutiŋte iŋuc fuakac.
9 Wofuŋ, go mâreŋ sâko mâreŋ irec guriŋ bapa jukic hâcne,
go nemu sasawa siric‐jopahuc fejâmbâŋkerâ jukic.
10 Wofuŋ e sâqocne qaisockeeŋgopieŋ jaŋere ecneekac,
e tiriŋicfâc‐ticne jaŋere juju soŋaŋkeekac,
ehuc ŋic sindaŋne jaŋere meonec batarac‐jopaekac.
11 Ŋic bahacmâc e tatamaczi uŋ hecneekac,
â maŋhumuc e bubiaŋ fuacneekac.
12 Bahacmâc ŋoŋe Wofuŋ ʒeri ecneniŋ,
â tiri ʒâŋe‐ticne daŋge âzâcneniŋ.