13
Dawidizi ʒâʒâfic katapa Jerusalem haeo bârisieocte muwec
1 Dawidi e momori tauseŋ gurune gurune â 100 gurune gurune jaŋere micne sasawa jaŋehec dâŋ muc manac embiŋ.
2 Ehuc Israe ŋic tutumaŋ‐jeŋicko ʒiŋuc muwec: “Ŋoŋe manapie sâckekacko â Wofuŋ Anutu‐nâŋeczi maname sâckeme Israe ŋic mâreŋ sâc juraŋgopieŋ jaŋerao mecne â taha bapa â Lewiŋic hae mâreŋ‐jeŋic sopâc kecɋaŋnehec ira juŋgopieŋ jaŋerao mâmâc dâŋ râepene rame ʒira warenʒepieŋ.
3 Warepie Anutu‐nâŋecte ʒâʒâfic katapa i mocwâc bârisienʒepeneŋ. Nâŋâc Saulore dameŋko behe sanaŋke‐jâmbâŋkembeŋ hâcne.”
4 Eme ŋic sasawa jaŋe dâŋ i manapie sâckeme tutumaŋ‐jeŋiczi qâtâc hewec.
Dawidi e ʒâʒâfic katapa roocte rawec
(Sam II 6:1–11)
5 Eme Dawidizi Anuture ʒâʒâfic katapa Kiriati‐Jearim haeonec bârisieniŋte Israe ŋic Aigita hae Sihoro irecnec raku Hamati haere motâcko fisiwec mâreŋ ŋondeŋ ira jumbiŋ jaŋe hetumaŋ‐jopawec.
6 Eme Dawidi â Israe ŋic sasawa jaŋe Wofuŋ Anutu e kerubim qâhuc‐jofarâ juhame ʒâŋe‐ticne riwaseckembiŋ ere ʒâʒâfic katapa bârisieniŋte Juda hae Bala, Kiriati‐Jearim hâcne, ira rambiŋ.
7 Ehuc Anuture ʒâʒâfic katapa i Abinadare fickonec rorâ keretac ɋâricnao herâ bawarembiŋ. Ehame Uʒa â Ahio jahe keretac guriŋ bapic.
8 Ehame Dawidi â Israe ŋic jaŋe ʒeŋgoma Anuture maio ʒoɋachec jaha gae â kulele â gita â woŋgâŋ â kaŋkuc â qeŋjeŋichec domahuc ʒeri sâko embiŋ.
9 Iŋuc erâ raku Kidoŋte padi qâqâmârâŋ tomao fisimbiŋ. Eme ira bulimakao jaŋe heguc qâguruc epie Uʒazi katapa i basanaŋkewec.
10 Uʒa e katapa bâuawecte Wofuŋzi mana gâpârecnerâ qame mai‐ticnaoa hâmowec.
11 Eme Dawidi e Wofuŋte kimbeŋzi Uʒarao fua tâcnewec irec maname ŋemâckewec. Eme mâreŋ ŋondeŋ irec ʒâŋe Peresuʒa mukicne, eme ʒâŋe i dameŋ ʒi fokac jaha.
12 Eme ʒoaŋ ira Dawidizi Anuture hâwickeme ʒiŋuc muwec: “No Anuture katapa wemocko ficnaneo barapemu?”
13 Dawidi e iŋuc murâ katapa i hae qizec‐ticnao e jahacne ficko mi barawec. E rorâ Gitiŋic Obededomte ficko heme ŋewec.
14 Eme Anuture katapazi Obededomte ficko wiacfâcne jaŋehec mosa jahec â moc ŋewec. Eme Wofuŋzi Obededom â wiacfâcne erâ wiac focnewec jaŋe ehâmo‐jarewec.