20
Dawidizi Raba hae ro rauc ewec
(Sam II 12:26–31)
1 Ʒoaŋ dameŋ maickeme ŋicwofuŋ jaŋe ʒikao rajumbieŋ dameŋ ira Joabezi momori guru bânie‐jareme Amoŋŋic jaŋere mâreŋ imacke raku Raba haeo fisirâ hae somâckembiŋ. Dawidi e ine Jerusalem haeoa juwec. Eme Joabezi Raba hae i ima samaki bawec.
2 Eme Dawidizi ŋicwofuŋ‐jeŋicte qizecko eridu ŋewec i heunuckewec. Heunuckerâ honeme ŋemâc‐ticne i 100 ewec. Erâ eridu sahacnao qânâ furi sâko moc ŋewec. Eme eridu i Dawidire qizecko hepie huwec. Eme Dawidi e hae irec mafa wiac bocjaha jâmbâŋ ameckerâ rawec.
3 Ehuc hae irec ŋic rocjoparâ ejareme sege â kinoŋ sanaŋ â râriczi gie bambiŋ. Dawidi e Amoŋŋic jaŋere hae ŋerawec ira iŋuc hâcne efârewec. Erâ e jahacne â ŋicfâcne jaŋe Jerusalem haeo risiembiŋ.
Dawidire ŋicfâc jaŋe ŋicsâko jopambiŋ
(Sam II 21:18–22)
4 Eme irec faicnao Geʒere haeo Filisa ŋic jaŋehec mocwâc qaqac embiŋ. Ehame Husaŋic Sibekaizi ŋicsâko jaŋere ɋâric moc, ʒâŋene Sipai e qâhâmowec. Iŋuc ehuc Filisa ŋic bawahac‐jopambiŋ.
5 Juku Filisa ŋic jaŋehec qaqac mocwâc ekicne. Ehame Jairi ŋokâ‐ticne Elihanaŋzi Gitiŋic Goliata ere ɋa Lami e qâhâmowec. E sându‐ticne i wâtuŋ neŋgocne iŋucne.
6 Eme Gati haeo ʒika mocwâc fuawec. Eme hae ira ŋic ʒâŋe biŋe sâkohec moc juwec e ŋicsâko jaŋere ɋâric jaha. E me kike motec‐ticne i 6 sasawa, qâhâckeme ʒare‐jeŋic 24 ewec.
7 E Israe ŋic hesuac‐jopakume Dawidi hahac‐ticne Simeare ŋokâ Jonataŋzi qâhâmowec.
8 Ŋic i jaŋe ŋicsâko jaŋere ɋâriczi Gati haeo jumbiŋ. Ehuc Dawidi â ŋicfâcne jaŋere meo fehuc hâmo‐fârembiŋ.