22
1 Eme Dawidizi muwec, “Ʒira hâcne Wofuŋ Anuture ufuŋ ŋezejec â alata ʒizi Israe ŋic jaŋere bâzi ririkere alata ezejec.”
Dawidizi taha ufuŋte ʒaʒawie gie bawec
2 Dawidi e ŋic furune Israe mâreŋko jumbiŋ jaŋe tumaŋne‐fâreniŋte jazawec. Ehuc Anuture ufuŋ bapare qânâ he qâfâuc ee ŋic jaŋe qânâ he qâfâuc eniŋte râec‐jopawec.
3 Erâ Dawidi e haesac motâcte biriŋ â babasanaŋ fuaocte aeŋ bocjaha jâmbâŋ râe guruc ewec. Erâ aeŋ bâbâroŋ i wowosene tâmiric râe guruc ewec wâc.
4 Erâ Sidoŋ â Tiroŋic jaŋe jâmâzâc katapa wowosene tâmiric Dawidirao bafisihuc domambiŋ.
5 Dawidi e ʒiŋuc muwec hâcne: “Ŋokâ‐nane Salomo e motec ɋâri erâ giere fuŋne mi manakac. Wofuŋte ufuŋ i ine hawari biaŋ â eri qaraweŋ‐ticnehec bapie ʒâŋe biŋe rara‐ticne mâreŋ sâc razejec. Eme no irec ʒaʒawie gie bazepac.” Dawidi e iŋuc murâ ɋaricne juweckoa ufuŋte wiac i emoc bâmoc efârewec.
6 Eme ŋokâ‐ticne Salomo hefârerâ Israere Wofuŋ Anutu ere ufuŋ moc baocte mucnewec.
7 Ehuc ŋiŋuc âzâcnewec: “Ŋokâ‐nane, no Wofuŋ Anutu‐nanere ufuŋ moc bapemurâ manasuhuc juwarepo.
8 Ehame Wofuŋte dâŋzi norao ʒiŋuc fuawec: ‘Go soc bocjaha hoŋkemeŋ â ʒika mâretec qameŋ. Go mâreŋko nore maio soc boc hoŋkemeŋte ʒâŋe‐nanere ufuŋ moc mi bazemec.
9 Manakic, ŋokâge moc fuaocmu e ŋic wamane juocmu. Râsifâc‐ticne rârec rârec juraŋgopieŋ jaŋe ejarepe ʒika behepie wama fuarâ fozejec; ʒâŋe‐ticne ine Salomo muzo. No ere dameŋko mupe Israe ŋic jaŋerao wama â nacgumo roroc fuarâ foocmu.
10 Ŋokâge eki hâcne ʒâŋe‐nanere ufuŋ moc bazejec. Erâ e ŋokâ‐nane erâ juha noni mamac‐ticne erâ jupemu. Ehuc Israe maŋnao ŋicwofuŋ eri ŋeŋe‐ticne basanaŋkepe raŋɋa raŋɋa ŋerahuc juzejec.’
11 Irec ŋokâ‐nane, Wofuŋzi gohec juzejec. Ehame Wofuŋzi gore manasuhuc dâŋ muwec irec sâcko Wofuŋ Anutugere ufuŋ bâpiaŋkerâ bazemec.
12 Mocjaha, Wofuŋ e maŋɋârâŋ â mamana tara tahacguzejec. Erâ Israe ŋic rauc‐joparâ jucmurâ mugareme Wofuŋ Anutugere sâcmutâc i aimuŋ soŋaŋkezemec.
13 Iŋuc ehuc Wofuŋzi Israe ŋic jaŋere erâ dâŋsanaŋ â mumutâc dâŋ Moserao râewec i wâc aimuŋ jaha soŋaŋkecmuo ine gorao wiac fofo dunduŋ jaha fuahuc foocmu. Go sanaŋkerâ hâbi hâro juzemec. Mi hâwicguzejec, erâ wâc maŋguru tâmiric juzemec.
14 No ʒâic sâko manahuc Wofuŋte ufuŋ fuaocte gol ŋemâc‐ticne 100 tauseŋ â siliwa ŋemâc‐ticne 1 milioŋ erâ aeŋ bâbâroŋ â aeŋ omane ŋemâc bâbâfuare sâcko mi rârâene â wowosene tâmiric i râe guruc epo. Erâ katapa â qânâ i wâc râe bâmoc efârepo. Eme go ira gâcne ro ʒuhuc ezemec.
15 Go gie bapa ŋicfâcge afecne mi jugareŋgopieŋ: Qânâ he qâfâuc ee ŋic â qânâ râe biric ee ŋic â fic bapa ŋic, erâ gie bapa ŋic gâcne ʒare tâmiric.
16 Jaŋe gol â siliwa â aeŋ bâbâroŋ â aeŋzi wiac bapa saric. Ajoc, go faharerâ gie fuŋkec. Wofuŋzi gohec juzejec.”
17 Erâ Dawidi e Israe soŋaŋ jaŋe ŋokâ‐ticne Salomo bafickeniŋte ʒiŋuc muhuc jazawec:
18 “Wofuŋ Anutu‐ŋeŋic e ŋoŋehec jukac hâcne. E ŋifec â ŋifec wama sâckoa tahac‐ŋopawec. Eki hâcne mâreŋ ʒirec rune nore meo râec‐jopawec. Ehame mâreŋ ʒi rauckekicne irec rune jaŋe Wofuŋ â ŋicfâc‐ticne ŋoŋere rurumaŋko juŋgopieŋ.
19 Irec ŋoŋe Wofuŋ Anutu‐ŋeŋic bâfuaniŋte maŋ mamanasu‐ŋeŋic râepie fozejec. Ajoc, ŋoŋe faharerâ Wofuŋ Anuture ŋeŋe hae moc baniŋ. Erâ Wofuŋte ʒâʒâfic katapa â Anuture râqâc tirine i Wofuŋte ufuŋ baniŋmu ira barâ râenʒepieŋ.”