11
1 Eme Rehoboam e Jerusalem haeo fisirâ Juda kikefuŋ â Benjamiŋ guruonec ŋic ʒikafac 180 tauseŋ bâwosâec‐joparâ Israe ŋic jopahuc uucmaŋ i Rehoboam e jahacne meo mocwâc feocte hetumaŋ‐jopawec.
2 Ehame Anuture dâŋzi kiŋaŋŋic‐ticne Semajarao ʒiŋuc fuawec:
3 “Go Salomore ŋokâ Juda ŋicwofuŋ Rehoboam â Israe ŋic Juda mâreŋko juŋgopieŋ â Benjamiŋ guru ʒiŋuc jazac:
4 ‘Wofuŋ e ʒiŋuc mukac: Ŋoŋe qomâfâc‐ŋeŋic jaŋehec qaqac eniŋte mi fenʒepieŋ. Wiac ʒi nore micte fuakac irec ŋic sasawa hae‐ŋeŋic sâc râwiŋneniŋ!’ ” Irec jaŋe Jeroboam râsi mi fisicnehuc Wofuŋte dâŋ manarâ risiembiŋ.
Rehoboamzi ʒuhuckerâ wiac ewec
5 Rehoboam e Jerusalem haeo juhuc Juda mâreŋko ŋeŋezic hae barawec.
6 E hae ʒiŋuc barawec: Betelehem, Etam â Tekoa,
7 Bete‐Zuru, Soko â Adulam,
8 Gati, Maresa â Ʒifi,
9 Adoraim, Lakisi â Aʒeka,
10 Zora, Ajaloŋ â Heboroŋ. Hae sacsanaŋ‐jeŋichec ʒi jaŋe Juda â Benjamiŋ mâreŋko ŋeraŋgopieŋ.
11 Erâ e ficsanaŋ bafârerâ ira micne râec‐jopa rawec. Ehuc nânâ â wokemaŋ â waiŋ rowaŋ barawec wâc.
12 Ehuc hae sâc ira sându maro guruckehuc hae i basac qasanaŋke‐fârewec. E iŋuc ehuc Juda â Benjamiŋ mâreŋ jahe basanaŋ‐jofawec.
13 Ehame taha bapa â Lewiŋic Israe mâreŋ sâckerâ jurambiŋ jaŋe heâckerâ Rehoboamtao fisihuc domambiŋ.
14 Lewiŋic jaŋe Wofuŋte taha bapa juhapie Jeroboam â ŋokâfâcne jaŋe bârâriec‐jopapie hae mâreŋ â wiacte wiac fojarewec i hetararâ Juda â Jerusalem haeo fisihuc domambiŋ hâcne.
15 Ehame Jeroboam e furu mâreŋ â faŋfaŋ â e jahac bulimakao motecnere hawari bacjofawec irec taha bapa âkendâŋ‐jopawec.
16 Eme Israere Wofuŋ Anutu e wira basac ecneniŋte maŋjeŋic domawec, ŋic i jaŋe Lewiŋic bâjâpec‐jopahuc apa ŋosafâc‐jeŋic jaŋere Wofuŋ Anutu e taha bâzi rikecneniŋte Israe gurune gurune irecnec Jerusalem haeo fisihuc domambiŋ.
17 Jaŋe iŋuc ehuc Juda uucmaŋ i keteŋkehuc basanaŋkembiŋ. Ehuc jara jahec â moc Salomo ŋokâ‐ticne Rehoboam e dope hutuŋ ecnembiŋ. Jaŋe jara jahec â moc i Dawidi â Salomo jahere hataoa jumbiŋ hâcne.
18 Rehoboamzi Dawidire ŋokâ Jerimoti ere otâ ʒâŋene Mahalate e ŋonâŋ‐ticne rowec. E neŋgoc‐ticne i Isaire ŋokâ Eliabare otâ ʒâŋene Abihai.
19 Eme eki ŋokâfâcne ʒiŋuc rocjopawec: Jeusi, Semaria â Ʒaham.
20 Ehame ʒâhec Abisalomte otâ Maka rowec wâc. Eme eki Abia, Atai, Ʒiʒa â Selomiti rocjopawec.
21 Rehoboam e maŋne Abisalomte otâ Makarao domawec i ŋonâŋfâcne gâcne jaŋerao domawec irec sâc sirickewec. E ŋonâŋfâcne 18 â ŋokac mamare 60, iŋuc rocjopawec; eme ŋokâfâcne 28 â otâfâcne 60 jumbiŋ.
22 Eme Rehoboam e juku Makare ŋokâ Abia ŋicwofuŋ âkendâŋneocte manasuhuc hahac ɋafâcne jaŋeraonec e hâcne fekicne âkendâŋnewec.
23 E wiac mana tarahuc ŋokâfâcne gâcne Juda â Benjamiŋ mâreŋ qâhâcne qâhâcne hae sacsanaŋhec ira râec‐jopa rawec. Erâ juju‐jeŋicte dope bocjaha bâmocke‐jarewec â ŋonâŋfâc‐jeŋic wâc bâfua‐jarewec.