13
1 “Dameŋ ira Dawidire kikefuŋ â Jerusalem rune jaŋere erâ opâ ʒâŋe moc wefurâ sâqocne â wâwânâŋ‐jeŋic ʒure‐fâreocmu.
2 “Anutu Tâpiri Ɋuŋɋasaŋ Wofuŋzi ʒiŋuc mukac: No dameŋ ira nemu jaŋere ʒâŋe biŋe bârâriepe moczi mocwâc mi manasuc‐jopazejec, erâ mâreŋ irec porofete â mâro wâwânâŋne jaŋe wâc bâsirowec‐jopapemu.
3 Eme moc e porofete gie mocwâc bame neŋgoc mamac jahec‐ticne jahe ʒiŋuc âzâcnenicmu: ‘Go Wofuŋte ʒâŋeo âke hotahuc burecdâŋ mukomecte mi juzemec.’ Ehame e porofete maracko dâŋ mume neŋgoc mamac jahec‐ticne jahe âke‐hâmonicmu.
4 Dameŋ ira porofete sasawa jaŋe wiac hone manac ehuc findaŋdâŋ mueŋgopieŋ irec mimieniŋmu, ehuc ŋaqi ʒâwânehec hepie hume eatuc gie baeŋgopieŋ i mocwâc mi baniŋmu.
5 Aricne, jaŋe ʒiŋuc muniŋmu: ‘Nâŋe porofete aricne, nâŋe hesarac ŋic, nâŋe ɋieonecteaŋ mâreŋ rauckeeŋgopeneŋ.’
6 ‘Hâc, eme amecgao wemo wicrâfâ fokac?’ Ŋic moczi porofete moc iŋuc wiocneme dâŋ ʒiŋuc bâtikiecneocmu: ‘Âgofâc‐nane jaŋere ficko qaqac epene fua‐narewec.’ ”
Wofuŋte lama soŋaŋ jopakicne
7 Anutu Tâpiri Ɋuŋɋasaŋ Wofuŋzi ʒiŋuc mukac:
“O ʒika, go faharerâ lama soŋaŋ nore maŋfuŋko domakac
e râsi ecnezemec.
Go soŋaŋ qatec lama jaŋe siŋsaŋ qanʒepieŋ,
ehame lama soŋaŋ wahakicne jaŋe wâc râsi ejarepemu.”
8 Wofuŋzi ʒuhuckerâ ʒiŋuc mukac:
“Mâreŋ ʒirecnec ŋic tucne sâko bâsirowec‐jopahape
afecne sawazi juniŋmu.
9 Afecne sawa juniŋmu jaŋe ʒocko behec‐jopapemu,
ehuc siliwa rikepie wosâeekac irec sâc ejarepemu,
â gol esâickeeŋgopieŋ irec sâc jaha ba esâic ejarepemu.
Eme jaŋe ʒâŋe‐nane muhuc riwasecnupie micjeŋicko ropemu.
Ehuc mupemu: ‘Jaŋe ŋicfâc‐nane,’
iŋuc mupe muniŋmu: ‘Wofuŋ e Anutu‐nâŋec.’ ”