12
YisasiꞋa Sapati kanaleꞋma aliꞋya neꞋaliya yafema kahegi malenaya yafe hu-maine.
1 Nago Sapati yupa YisasiꞋene agaiꞋaene tokaeꞋya nemaiya anagaꞋaene nago atili hoya amuꞋnopi neꞋvageno anagaꞋamogamina amakategeꞋya ani atilia kaleteꞋya takiꞋya ne-mainae.
2 NenageꞋya nagoꞋa Falasia vayaꞋmoꞋya amaketeꞋya Yisasifena mage huꞋya hae “Ago kagaiꞋenema tokaeꞋya nemaiya anagaꞋmoꞋya Sapati yupama katile-malenaya yana ali haviya nehae.” huꞋya hae.
3 Hageno YisasiꞋa mage huno hie “Tamakaya Tevitina agava huꞋya umainaya vayaꞋene amaka-te-mainea yamo kea hapalitama ohavinao?
4 Amakategeno TevitiꞋa Anumaya Koti nopi hai-faleno ‘Afa vayaꞋmoꞋya onesageꞋya mono nopi kava vayaꞋmoꞋya amakaiꞋamige negahae.’ huꞋya katile-malenaya maya TevitiꞋa agaiꞋaene tokaeꞋya emainaya vayaꞋenena ne-mainae.
5 Tamakaya kahegi kema kae-malenaya avopima hanea kea hapalitama ohavinao? Mage huno hu-maine mono note kava vayaꞋmoꞋya mukiꞋa Sapati yupa aliꞋyaꞋamia neꞋaliꞋya Sapatimo kahegi kemona atagayayanagi Anumaya KotiꞋa ‘Kefo ya haya vaya mainae.’ huno ohune.
6 Tamaha-pauve Anumaya Koti ala mono nomona agase-mainea kanoa nagaiꞋniꞋa ma mainoe.
7 Nayona Anumaya Koti autaꞋmafina mage huꞋya kae-malenayane.
‘Nagaya Anumaya KotiꞋna sipi sipia hetama kolama takiꞋya nenamiya kavafena nonahaigeꞋna kalagi ai-ma-tesaya yafeke nenahaiye.’ huꞋya kae-malenayane.
Kae-malenagi tamakaya ani kema havilamama hu-mainaleꞋasina kefo yama ohunaya vayafena ‘Kefo ya nehae.’ hutama ohaleꞋasine.
8 Ikapinagati emainoa kanoa vayaꞋmo natenea nafaꞋnemoꞋna Sapati yupa kava yagai-mainoe.” huno hu-maine.
Sapati yupa YisasiꞋa aya avayu hu-mainea kanomona alino kanale hu-tene.
9 Ani kumala neꞋataleno mono nopi haino maine.
10 Maineno ageana nago kanoa aya avayu hu-lavi-mainea kanoa anile maine. MainegeꞋya nagoꞋa vayaꞋmoꞋya YisasiꞋa havi kavaꞋma hisiafene huꞋya ati neꞋayeꞋya Yisasife mage huꞋya hae “Sapati yupa kali kanoa alino kanale hu-tesia yana kanale yano?” huꞋya Yisasina havinegeꞋya amata hu-mainae.
11 YisasiꞋa mage huno hie “Nagola hana kanomoga afukama Sapati yupama komufi tavi-mainesigeka ago hevayu huka faitega ategano? E aniꞋa hugane.
12 VeaꞋmoꞋya afua agaseꞋya ala yaga mainaya yafenagiꞋya kahegi kemoꞋa ‘Sapati yupa kanale ya hu-ma-teho.’ huno hu-maine.”
13 Huteno ani ayama avayu hulavi-mainea kanomofe mage huno hapaiye “Kayana aipi huo.” huno higeno aipi hiana nago kaiyaga ayaꞋmoꞋma hia kava huno kanale hu-maine.
14 Kanale hianagi Falasia vayaꞋmoꞋya mono nopitila ataleteꞋya hati-laviꞋya melitalu huꞋya huge havige huteꞋya “Yisasina hanaꞋa huta haesunageno falisie?” huꞋya vege hu-mainae.
YisasiꞋa tamage huno Anumaya Koti aliꞋya nafaꞋne maine.
15 Yisasina haegahema huge havige haya kea ago haviteno ani kumala neꞋataleno vigeꞋya kasagoꞋya veaꞋmoꞋya akave vageno mukiꞋa kali veaꞋmogamina kaliꞋamia alino kanale hu-ma-tene.
16 Hu-ma-teteno mage huno hie “Nagai aepaꞋa veala hamaꞋopaiho.” huno hie.
17 Mani kema hia kemofena nayona AisaiyaꞋa Anumaya Kotina aune kanomo hu-mainea kemoꞋa falote huno tamage hie. Mage huno hu-maineane.
18 Anumaya KotiꞋa mage huno hie ageho mani kanoa nagai aliꞋya kano maisia yafe ago hapali-tenoe. Ani kanohena aluya huꞋna musena nehuꞋna nahau-mainea kanoe. Nagaya AvamuꞋnia amisugeno nagayama fatago huꞋna yagai-matesua kehena mukiꞋa Yuta vea omainaya veala hama-paigahie.
19 Agaya kea oꞋvaino ala kenake ohugahigi katega veaꞋmoꞋya nagola agea ohavigahae.
20 NagoꞋma fagagi mainesia hopama alino kofa ohuno aniꞋa huno fulu fuluma hu-mainaya veaꞋmoꞋmogamina kaꞋyona oꞋamamigahie. Asu hugahema hisia kaꞋnila asu ohuno aniꞋa huno fulu fuluma hu-mainaya veaꞋmoꞋmogamina kaꞋyona oꞋamamigahianagino agaiꞋa fatago kavala huge huge hisiana ani fatago kavaꞋamoꞋa havi kavaꞋmona agaseno haigahie.
21 Haisiana muki mopale Yuta vea omainaya veaꞋmoꞋya agai agihe haviꞋya amakupi maleꞋya amametiti hugahae.
Yisasifena “Pielesepulia Kefo AvamuꞋmo kava kanoene aliꞋyana neꞋaline.” huꞋya hu-mainae.
22 Nago kanomona Kefo AvamuꞋmoꞋa* aguꞋafi maineno aulaga alino asu huno avefuꞋna alino ai-yahae higeno agea noꞋaiyanagiꞋya Yisasite avaleꞋya ageno YisasiꞋa ani Kefo Avamula anati-talegeno vigeno ani kanomoꞋa aulaga age-gali huno ageteno agea aino kea kea hie.
23 Ani kava higeꞋya alitalu hu-mainaya veaꞋmoꞋya ageteꞋya tusi amamaꞋyo ai-mainae. AmamaꞋyo aigeꞋya mage hae “Mani kanomoꞋa Tevitina aginagomo maineo? Anumaya KotiꞋa taugafa ali-gatigahema hutea kano maineo?” huꞋya hae.
24 HageꞋya Falasia vayaꞋmoꞋya haviteꞋya mage hae “PielesepuliꞋa Kefo AvamuꞋyagale kava hu-mainea kanomoꞋa tokiyaꞋa amigeno Kefo AvamuꞋmona anati-neꞋatale.” huꞋya hae.
25 Hageno YisasiꞋa amakupi haviya amaku amakesa ago haviteno mage hie “MukiꞋa nagoke kotega veaꞋmoꞋya aye-fako huꞋya tuma hisayana ani kotega veaꞋnene haviya hu-lavigahae. Nago kumate afamopina aye-fako huꞋya ‘Alu vaya mainone.’ huꞋya tuma hisayana ani kumaꞋene afamoꞋene haviya hu-lavigahae.
26 SataniꞋa agaiꞋa aliꞋya AvamuꞋyagamona anati-talesiana agaiꞋa nofi vayaꞋma aye-fako huꞋya ‘Alu vaya mainone.’ huꞋya hisayana SataniꞋa kava yagaisia tokiyaꞋa hanaꞋa huno hanegahie?
27 Nagaifena ‘Kagaya Pielesepulimo tokiyaleti anati-neꞋatalane.’ hutama hayanagi tamakaitami anagatamimoꞋa Kefo Avamula anati-talageno Pielesepulimo amakaila amaya nehio? Ani anagatamia amakaiꞋami manima haya kea ali fako huꞋya tamave-neliye.
28 Tamage nagaya Anumaya Koti AvamuꞋmo tokiyaleti ani Kefo AvamuꞋyaga anati-neꞋataloafe Anumaya KotiꞋa kava yagaisia kanamoꞋa tamakaitela ago emaine.
29 Nagola tokiyaꞋage kanomoꞋma nomaꞋafima nago kanomoꞋa musufa ya hugahe vinunoꞋa hagoteno ani tokiya kanomona nofiteti ki-teteno afenoꞋyamaꞋa musufa yana hugahie. Nagaya aniꞋa hu-mainoafe Satanina agaseꞋna nofiteti ki-teteꞋna agai Avamula ago anati-talenoe.
30 NagoꞋa veaꞋmoꞋya nagai kanapa veaꞋne omaisayana kame vayaꞋniꞋa mainae. Sipi sipiꞋnima naya huꞋya ali-taluma ohisaya veaꞋmoꞋya amanati-neꞋatalae.”
31 NaꞋa hu-maineafe nagaya tamaha-nepauve mukiꞋa alu kefo ya alu kefo yaꞋene hu-haviya hu-neꞋataya yaꞋene Anumaya KotiꞋa aigeꞋama-teno ani kefo yaꞋamia atale-ma-tegahianagi nagoꞋa veaꞋnemoꞋya Alu aotage AvamuꞋmofema hu-haviya hu-tesayana Anumaya KotiꞋa aigeꞋma-teno ani kefo yaꞋamia atale-oꞋama-tegahie.
32 NagoꞋa veaꞋmoꞋya ikapinagati emainoa kanoa vayaꞋmo natenea kanomonihema hu-haviya hu-natesayana Anumaya KotiꞋa aigeꞋama-teno ani kefo yaꞋamia atale-ma-tegahianagi nagoꞋa veaꞋmoꞋya Alu Aotage AvamuꞋmofema hu-haviya hu-tesayana Anumaya KotiꞋa aigeꞋamateno ani kefo yaꞋamia meni kanafiꞋene haenagama falote hisia kanafiꞋene agola atale-oꞋama-tegahie.
Havi yosamoꞋa havi yosalaga neꞋaye.
33 “Kanale yosama hanesigenoꞋa alagaꞋamoꞋenena kanaleꞋya hugahie. Havi yosama hanesigenoꞋa alagaꞋamoꞋenena haviya hugahie. VeaꞋmoꞋya yosalaga ageteꞋya kanale yosalaga hanesigeꞋyahena ‘Kanale yosa hane.’ huꞋya hugahae.
34 Tamakaya osifaꞋvemo nafaꞋneyagamogatama havi vayalagitama hanaꞋa hutama kanale kea hugahae? VeaꞋmoꞋya amaku amakesafinaga havateteno ai-vali-lavi-mainea kea amavayafiti hu-falote nehae.
35 Fatago huꞋya mainaya veaꞋmoꞋya kanale amaku amakesa havilineꞋya kanale kavala nehayanagi kefo yama nehaya veaꞋmoꞋya havi amaku amakesa havi-lineꞋya havi kavakeꞋya nehae.
36 Nagaya tamaha-nepauve Anumaya KotiꞋa veala kaiyekema hu-ma-teno ali fako hisia yupa mukiꞋa veaꞋmoꞋya amakesa ohavi ke huꞋya hu-haviya hu-ma-tenesaya kehena Anumaya KotiꞋa hama-vi-gegahie.
37 Hu-mainesana keleti Anumaya KotiꞋa kagaifena ‘Havi kavala ohunane.’ huno hu-ga-tegahianagi hu-mainesana keleti ‘Kefo ya hu-mainane.’ huno hu-ga-tegahie.”
NagoꞋa veaꞋmoꞋya “TokiyaꞋage avame yana hugeta agamano.” huꞋya hu-mainae.
38 NagoꞋa kahegi kema havilinaya anagaꞋene Falasia vayaꞋene Yisasife mage huꞋya hae “Huma-ve-nelina kanomogae tokiya avame yana tavelio.” huꞋya hae.
39 Hageno YisasiꞋa mage huno hama-paiye “Ma kanafima mainaya veaꞋmoꞋya tusiya huꞋya havi veaꞋne mainae. Anumaya Kotina amakaveꞋno hu-tenaya veaꞋne mainae. ‘TokiyaꞋage avame yana tavelio.’ hutama nehayanagi alu avame yana Anumaya KotiꞋa otamamigahigi nagoke avame yake tama-ve-ligahie. Nayoma mainea Anumaya Koti aune kanoa YonaꞋma hu-mainea avame yamaꞋage tama-ve-ligahue.
40 Yonana ala noyamemoꞋa asaga huno nakaigeno tagufa (3) kegeꞋene felugaene aipafinaga mainea kava huꞋna ikapinagati emainoa kanoa vayaꞋmo natenea kanomoꞋna he-vai-natesageꞋna tagufa (3) kegeꞋene felugaene mopafinaga maigahue.
41 Ninive kumate mainaya veaꞋmogamina YonaꞋa Anumaya Koti kea hama-paigeꞋya kefo yaꞋamihena amaipa aiyahae hu-mainagi haviho menia Yonana agase-mainea kanoa ma mainegetama tamakaya kefo yatamihena tamaipa ai-yahae nohae. Tamaipa ai-yahae nohayafe Anumaya KotiꞋa kaiyekema hu-lama-tesia kanamoꞋa nayoma Ninive kumate mainaya veaꞋmoꞋya hetiꞋya menia ma kanafima mainaya veaꞋmoꞋya kefo yama hu-mainaya yafena hu-falote hu-lama-tegahae.
42 Nagola alu haupalegati emainea sauve aꞋmoꞋa mopamona atupaleti eno Solomonina kanale agu agesaene kanomo kea me havigahe emaine. Emaineanagi haviho Solomonina agase-mainea kanoa ma mainegetama tamakaya agai kea nohaviye. Nohaviyafe Anumaya KotiꞋa kaiyekema hu-lama-tesia yupa ani aꞋmoꞋa hetino menia ma kanafima mainetama kefo yama nehutama agai kema nohaviya yafena hu-falote hu-lama-tegahie.”
Kefo AvamuꞋa eteno emaine.
43 Nagola Kefo AvamuꞋmoꞋa vaya aguꞋafi haino maineleti ataleno viaꞋyamo hau hu-mainea kopinaga mo vaiyatete huno mai-faluma hisia kumafena ati yegeteana mai-falu hisia kumala oꞋagene.
44 OꞋageno “HagoteꞋna maigeꞋna emainoa agu nopi eteꞋna umaigahue.” huno huteno mogeana ani agu nopina vayala omaigeno ago sese huno kanale ya hu-malenegeno moge-maine.
45 Mogeteno eteno viaꞋyamo seveniꞋa (7) kefo yaꞋamimoꞋma agase-mainaya Kefo AvamuꞋyaga momavaleno egeꞋya ani agu nopi hai-faleꞋya mainageno hagoteno ani kanomoꞋa nagoke Kefo AvamuꞋmo agu nopina mainegeno haviya huno maineanagino menia kasagoꞋya Kefo AvamuꞋmo agu nopina haiꞋya maigeno tusiꞋa kefo yatafa huno maine. Ani kavala menima mainetama kefo yama nehaya veaꞋmogatama hu-lama-tegahie huno hu-maine.
Yisasina itaꞋamoꞋene aganaꞋamoꞋyaenena taꞋya mainae?
46 YisasiꞋa mani kea veaꞋmogamina hama-nepaigeꞋya itaꞋamoꞋene aganaꞋamoꞋyaene “Kea me hapaisune.” huꞋya kumatega emainae.
47 Emainageno nago kanomoꞋa Yisasife mage huno me hapaiye “ItakamoꞋene kaganakamoꞋyaene kea kaha-paigahe kumate me hetiꞋya mainae.” huno hie.
48 Higeno YisasiꞋa mage huno hie “ItaꞋnimoꞋene naganaꞋnimoꞋyaenena taꞋya mainae?” huno havi-ge.
49 Havigeteno agaiꞋaenema tokaeꞋya nemaiya anagatega ayana hagaꞋyu huno mage huno hie “Ageho itaꞋnimoꞋya naganaꞋnimoꞋya ma mainae.
50 Ikapinagama mainea Nenafana haiya kava huꞋya avayama ali hipoꞋya nehaya veaꞋmoꞋya nagaila itaꞋnimoꞋya naganaꞋnimoꞋya nasaꞋnimoꞋya mainae.” huno hu-maine.