11
1 Ked tuɏachonyu otyan chi mangkokopyak un isun chi maluɏachek si mangkokopyan Kristu.
Ha Man-abungusan Cha Byebyai Si Uɏucha Lu Manchetchetongchaʼn Manchayaw Kan Apudyus
(1Co. 14:33-36)
2 Chayawok chikayu ti pappasigyu isosomok sakon kan suysuɏutonyu cha losan un intudtuchuk kan chikayu.
3 Ngim awed bo osaʼn piok un maawatanyu otyan. Si Kristu awed chi kalobbongalaʼn mangituray kan cha losan un leɏaki, ked ha leɏaki, awed bo kalobbongalaʼn mangituray si asawala, ked si Apudyus awed bo kalobbongalaʼn mangituray kan Kristu.
4 Ked lu awed leɏaki un lakaabungus un malluwalu willu mangibyegbyega si ugud Apudyus si manchetchetnganyu, ibibiinla si Kristu un mangituray kan siya.
5 Ngim ha byebyai un achipun man-abungus lu malluwalu willu mangibyega si paibyegan Apudyus si manchetchetnganyu, ibibiinla si asawala. Ked siya isun chi byebyaiʼn laapulugen.
6 Ti lu achipun man-abungus chi byebyai, un-ulloy chi mampaapulug. Ngim gapu ta kabibiin lu mampaapulug chi byebyai, un-ulloy chi abungusala uɏula.
7 Ngim ha leɏaki, achipun otyan man-abungus, ti siya mangitullongan si paɏang ya kilachayaw Apudyus. Ngim ha byebyai, siya mangitullongan si kilapotog chi leɏaki.
8 Ti si langwaan Apudyus si tagu, chakampun si byebyai leɏpuwan chi leɏaki, ti ha leɏaki lampeɏpuwan chi byebyai.
9 Ya chakampun bo un killingwan Apudyus chi leɏaki gapu si byebyai, ngim killingwala byebyai gapu si leɏaki.
10 Ked gapu kan cha angheles, masapuɏʼn man-abungus chi byebyai un mangipaila si kalobbongan chi leɏaki un mangituray kan siya.
11 Ngim ulay kamatchi, ha biyeg taku kan Apu Jesus, ha byebyai masapuɏla leɏaki ked ha leɏaki masapuɏla bo byebyai.
12 Ti ulay lu leɏaki lampeɏpuwan chi byebyai si chamu, byebyai mangiyalak si leɏaki si sala. Ked si Apudyus chi lampeɏpuwan cha losan.
13 Chikayu mansomsomok, bibiɏu kamman chi byebyai un malluwalu kan Apudyus si manchetchetnganyu un lappun abungus chi uɏula?
14 Ked gangayla bo kan cha losan un tagu, un lawwik lu anchu-anchu buuk chi leɏaki,
15 ngim ustu kan cha byebyai ti siya bumeɏasangancha. Ti ha buukla, laatod kan siya un abungus chi uɏula.
16 Ngim lu awed sumupling si allaʼn imbyegak, ibyegak kan chikayu lappun ugali taku un katchi, ulay bo cha mamati un pin-a manchetchetong si cha kaili-ili.
Mipanggop Si Malomsomkan Kan Apu Jesus
17 Lu mipanggop bo si ibilinku kan chikayu, achipun makwa un ichayawku chikayu, ti lu pin-a kayu manchetchetong un manchayaw kan Apudyus, chakampun si bumaɏuwanyu, lu achi lumawinganyu.
18 Ti chingngeɏk un lu manchetchetong kayu un manchayaw kan Apudyus, man-asisupling kayu un lappun timpuyugyu. Ked isun chi tuttuwaok.
19 Ngim gagangayla un pin-ata man-asisupling, ti kamatchi main-an chi kilaustuʼn chi pammatin cha uchum.
20 Ngim lu manchetchetong kayuʼn mangan si Malomsomkan si latoyan Apu Jesu Kristu, chakampun un Malomsomkanyuʼn ustu panggopyu,
21 ti massugenyu. Ti lu mangan kayu, umun-ula cha uchum mambusug un achipun kayu man-iilluway, ked labibittin cha uchum ti lappun killancha. Ked mabuuk bo cha uchum.
22 Puggey un kamatlat cha pin-ayu koon? Ha lappun kamman byeɏoyyu si mangalanyu ya umilumanyu? Willu am-amsiwonyu cha tagun Apudyus ya ibibiinyu cha lappun mabyelincha? Simma lamlamaonyu un ibyegak kan chikayu mipanggop si alla? Ha chayawok chikayu? Achipun makwa!
23 Si Apu takuʼn Jesu Kristu langitudtuchu kan sakon si hachiʼn intudtuchuk kan chikayu un koonyu otyan. Ti si langalancha si hachiʼn labi un chaampun si Jesus miyibit, illaɏala tilapay
24 ot lanyaman kan Apudyus. Pilispis-igla ot kalala, “Allaya long-egku un michatun para kan chikayu. Kalonyu ta malomsomkanyu kan sakon.”
25 Ked siya bo killingwala si lagamputancha langalan, un illaɏala bo latatasan byeyas, ot kalala, “Ha allaʼn byeyas, siya baruʼn tuɏeg Apudyus kan cha tagula, ked ha chaɏak lu matoyak, siya maluttuwaan si hachiʼn tuɏeg. Ked kacha ilumonyu, koonyu ta malomsomkanyu kan sakon.”
26 Ked susulud, kacha kalonyu tilapay ya ilumonyu allaʼn byeyas, ipakaammuyu latoyan Apu Jesu Kristu inggala si mangulilala.
27 Ked lu awed tagu si mamabyaɏang un makakan ya makailum un chakampun si ibiinla long-eg Apu Jesus si latoyala ya libukbukan chi chaɏala, makabyasuɏ si long-eg ya chaɏan Apu Jesus.
28 Ked kacha osa masapuɏʼn ulaola usigon chi somsomokla asiyot makakan ya makailum si Malomsomkan si latoyan Jesus.
29 Ta lu achipunla somsomkon chi kilapotog chi long-eg Jesus ked lakakan ya lakailum si Malomsomkan, makabyasuɏ ked ochesala machusaala kan Apudyus.
30 Ked hachi gapu un achu cha lasakit ya lakapsut kan chikayu ya siya bo latoyan cha uchum.
31 Ngim lu ulaon taku yan usigon chi somsomok taku ta pumeɏkas taku, asi taku ot makakan, achipun Apudyus chitaku chusaon.
32 Ngim lu kuison chitaku kan Apudyus ya idchen chitaku si mansomsomkan taku, koola hachi taplu achipun taku mipati si machusaan cha achipun mamati.
33 Ked susulud, lu manchetchetong kayu un mangan si Malomsomkanyu kan Apu Jesu Kristu, masapuɏʼn man-asiuway kayu.
34 Ked lu awed labitin, umula otyan mangan ud uwacha ta achin Apudyus chikayu kuison lu machagup kayu manchetchetong. Ked lu mipanggop si uchum un ibyegak kan chikayu, asik ibyega lu umaliyak utlat.