☰ John 11
11
Ha Latoyan Lazarus
1 Inggew chi leɏakiʼn lasakit un mangngachen Lazarus ud Bethany, un ilin cha Mary kan Martha un suludla. 2 Si Mary hachiʼn langisiit si mambyangun apɏus si ikin Jesus ot pilulasala si buukla.
3 Ot lambuun cha Mary kan suludlaʼn Martha si umoy mangibyega kan Jesus, “Apu, lasakit chi biɏunluʼn ay-ayatom.” 4 Chingngeɏn pun Jesus, kalala, “Achipun Lazarus ikatoy chi sakitla. Ngim makwa alla ta michayaw si Apudyus ya siya bo mipachayawan chi Alak Apudyus.”
5 Ay-ayaton Jesus cha mansusulud un: si Mary, Martha ya si Lazarus. 6 Chingngeɏn pun Jesus un lasakit si Lazarus, illinggew yan si iliʼn inggewala si chuwaʼn eɏgew. 7 Oli pun kalala kan cha disipulusla, “Intaku kasin ud Judea.”
8 “Mistulu,” insongbyat cha disipulusla, “Apu, si lummaus un eɏgew amas cha Judio bintukon sika ked piom boʼn kasin mangulin udchi?”
9 Kalan Jesus, “Chakampun kamman si simpuɏu ya chuwaʼn uras chi osaʼn eɏgew? Ked lu malidtidchaɏan chi tagu si eɏgew, achipun misabyangtu ti mailala chi chaɏan. 10 Ngim lu labi malidchaɏalala, misabyangtu ti manggikbot ya lappun silaw.”
11 Imbyegan pun Jesus chi hachi, inyutupla kalan un, “Lasusuyop chi biɏun takuʼn Lazarus ngim inyak byangolon siya.”
12 Ot kalan cha disipulusla, “Apu, lu lasusuyop siya, lumin-awa mit laing.” 13 Ha pion Jesus un ibyega ked latoy si Lazarus ngim kalancha lu lasusuyop un tuttuwa.
14 Oli pun impakaawat Jesus kan chichaʼn, “Latoy si Lazarus. 15 Ngim gapu kan chikayu, matetteɏokak ti mippulak udchi, ta mamati kayu. Intaku si awechela.”
16 Ot kalan Thomas un ngadloncha Kapin kan cha kadwalaʼn disipulus, “Intaku losan ta makakatoy taku kan siya.”
Si Jesus Chi Malagu Si Matoy Ya Mangtod Si Biyeg
17 Gummatong pun cha Jesus ud Bethany, laammuwalaʼn mikapat eɏgew chi langimbolancha kan Lazarus. 18 Ha iliʼd Bethany, ked umoy si tiɏun kilamitro kaachayulad Jerusalem. 19 Achu cha Judioʼn ummoy lamebyeaw kan cha Martha ya Mary.
20 Chingngeɏn ked Martha un allat un ased si Jesus, ummoyla ilabot siya. Ngim latelan si Mary ud uwacha. 21 Ot kalan Martha kan Jesus, “Apu, lu awedka otyan utla, achipun latoy chi suludku! 22 Ngim ammuk un ulay si sala, idchon Apudyus lu silu chawatom kan siya.”
23 Ot kalan Jesus kan siya, “Umuli matagu kasin chi suludlu.”
24 Ot kalan Martha kan siya, “Ammuk un umuli matagu kasin lu alungus chi eɏgew.”
25 Ot kalan Jesus kan siya, “Sakon chi malagu kasin si tagu ya sakon bo mangatod si biyeg un mallalayun. Lu silu mamati kan sakon, ulay lu matoy, matagu siya kasin. 26 Ked cha hachiʼn matattagu ya mamati kan sakon, achipuncha pulus matoy. Ha patiyom laoy?”
27 Summongbyat si Martha, “O Apu, mamatiyak un sika si Kristu un Alak Apudyus un ummali utla lubung.”
Ha Lan-ibin Si Jesus
28 Imbyegan ked Martha hachi, ummoy ud uwacha ot ilayagela si Mary un suludla ot inyaggakawla kalan, “Allat chi Mistulu ked impaayeg chika.” 29 Chingngeɏn ked Mary, lelibbyat ot ummoyla ilabot si Jesus. 30 Chaampun michuum si Jesus si ili, ngim sissiya si lugeɏ un langabtan Martha kan siya. 31 Ot litun-ud cha tagu un inggew si byeɏoy un pin-a mamebyeaw kan cha Mary si intullongchaʼn lelibbyat ya lummawa. Kalancha lu umoy man-alluwoy si lobon.
32 Gummatong ked si Mary si inggewan Jesus, lampalintuming si sangwalan Jesus ot kalala, “Apu, lu awedka otyan utla, achipun latoy chi suludku!”
33 Intullong pun Jesus un man-ibi-ibin si Mary ya cha Judioʼn lituntun-ud kan siya, kummachegu ot lasesechung chi somsomokla. 34 Ot ilimusla kan chicha, “Chimma langilobolanyu kan siya?”
Kalancha kan siya, “Umalika ta itullonglu, Apu.”
35 Oli pun lan-ibin si Jesus.
36 Ot kalan cha Judio, “Itullongyu ked, amod chi man-aayatla kan Lazarus!”
37 Ngim kalan cha uchum kan chicha, “Pilatullongla cha lakuɏap, ot achipunla otyan bo intuluk si Lazarus un latoy.”
Tilagun Jesus Si Lazarus
38 Ot lasesechung bo kasin chi somsomok Jesus si ummachali si lobon. Hachiʼn lobon ked gongeb un loombyen si byetu. 39 Kalan Jesus, “Kaalonyu byetu.”
Ngim kalan Martha un sulud chi latoy, “Apu, bummangtit si sala, ti mikapat eɏgew chi liimbolala!”
40 Kalan Jesus kan siya, “Chakampun kamman si imbyegak kan sika un lu mamatika, mitullonglu michayawan Apudyus?” 41 Oli pun kilaancha byetu. Ot lantanged si Jesus ot kalala, “Ama, manyamalak ti chingngeɏm sakon. 42 Ked ammuk un pasiglu chochongɏon sakon, ngim ibyegak alla gapu kan cha taguʼn allà utla ta mamaticha un imbuunlu sakon.”
43 Imbyegala ked hachi, impokawla kalan un, “Lazarus, lumawaka!” 44 Lummawa si Lazarus. Labyabyacheɏ si luput cha imala inggala si ikila ya labussung bo lupala si panyu. Kalan Jesus kan chicha, “Ubyachenyu chi liputiput kan siya.”
Pilanggop Cha Judioʼn Patoyon Si Jesus
(Mat. 26:1-5; Mrk. 14:1-2; Luk. 22:1-2)
45 Achu cha taguʼn ummoy lamebyeaw kan Mary chi langitullong si killingwan Jesus, ot lamaticha kan siya. 46 Ngim ummoy cha uchum kan chicha kan cha Pariseo ot imbyegacha killingwan Jesus.
47 Ot cha ap-apun cha papachi ya cha Pariseo impaayegcha cha kukunsiseɏ ot kalancha, “Simma koon taku? Ti achu cha lakaskaschaaw un pin-an chi taguʼn alla killingwa! 48 Lu ipayan taku siya un katlat, losan cha tagu mamati kan siya ked umali cha turay un iRome ked yam-aloncha templo ya ili taku!”
49 Ngim si Caiaphas un kangatuwan un pachi si hachiʼn tawon, kalala, “Lappun akit ammuyu! 50 Masapuɏʼn maawatanyu un un-ulloy lu matoy chi ossaan un tagu ta mataguwan cha kaachuwan un Judio.” 51 Chakampun si lampeɏpu si uwalaʼn somsomok chi ilugudla, ngim gapu ta siya chi kangatuwan un pachi si hachiʼn tawon, impadtula chi matoyan Jesus ta matagu cha kailiyalaʼn Judio. 52 Ya chakampun si abus cha Judio ngim chagupola bo man-ossaalon cha losan un aalak Apudyus un liwatak si cha ili-ili. 53 Malipud si hachiʼn eɏgew, lantutuɏagen cha papangat cha Judio in-ilonchaʼn mangtoy kan Jesus.
54 Siya gapula un achipun cha Jesus lampappaila kan cha achun taguʼd Judea, ngim ummoyon cha udchi ot ummoycha ud Ephraim, osaʼn ili un adchaliyan si lugeɏ un lappun ummili. Ot udchi illinggew kan cha disipulus.
55 Chanchali Piyastan Lallausan. Ot summang-at cha achuʼn tagu ud Jerusalem un lampeɏpuʼd cha ili-ili ta umoycha koon chi kopyachaʼn Judio un manchiɏus si byasbyasuɏcha sakbyey un mallugi piyasta. 56 Ot singsingngitcha si Jesus ot lachagupcha pun si templo, lan-iillimuscha un kalancha, “Simma kalanyu? Ha umali lin makapiyasta?” 57 Ot imbilin cha ap-apun cha papachi ya cha Pariseo un lu awed sin-ammu si awechen Jesus, ipakaammucha otyan kan chicha ta chokmaancha siya.
☰