22
Lan-uuguchen Cha Mamatoy Kan Jesus
(Mat. 26:1-5; Mrk. 14:1-2; Jhn. 11:45-53)
1 Ot chanchali timpun chi Piyastaʼn Lallausan un siya mangalancha si tilapay un lappun yeastla.
2 Mansingi-singit cha ap-apun cha papachi ya mimistulun chi lintog, si in-ilonchaʼn mamatoy kan Jesus un lappun mangagammu, ti ummogyatcha kan cha tagu.
Ha Langiyibitan Judas Kan Jesus
(Mat. 26:14-16; Mrk. 14:10-11)
3 Oli pun lilumlok si Satalas kan Judas un ngadlon cha Iscariot, osa kan cha simpuɏu ya chuwaʼn disipulus Jesus.
4 Ummoy Judas intuɏeg kan cha ap-apun cha papachi ya cha kapitan chi guwechan chi templo lu silu in-ilolaʼn mangiyibit kan Jesus.
5 Latetteɏokcha ot lantutuyegchaʼn byayachencha siya.
6 Inteun Judas ot lugiyalaʼn mansingit si wayalaʼn mangiyibit kan Jesus un achipun cha tagu maammuwan.
Ha Alungus Chi Langkakakalan Cha Jesus Ya Cha Disipulusla
(Mat. 26:17-30; Mrk. 14:12-26; Jhn. 13:21-30; 1Co. 11:23-25)
7 Laeɏgewan ked, gummatong chi eɏgew un piyastan mangalan cha Judio si tilapay un lappun yeastla. Siya bo mampeɏtiyancha si ayyubun chi keɏlilu un maichatun si Piyastaʼn Lallausan.
8 Ot imbuun Jesus cha Peter kan John, un kalala, “Ingkayu iyala mangalan taku si salaʼn Piyastan Lallausan.”
9 Ilimuscha kan siya, “Udma ingkami mangiyalaan?”
10 Ot kalala kan chicha, “Lu lumlok kayuʼd Jerusalem, abtonyu osaʼn leɏaki un mambubukud si maaammutuʼn chelum. Tun-uchonyu siya si byeɏoy un ayala.
11 Ibyegayu si simbyeɏoy, ‘Kalan chi Mistulu, udma awechen chi kuwetun mangalanmi kan cha disipulusku si allaʼn Piyastaʼn Lallausan?’
12 Ked ipailala chakeɏʼn langingngatuʼn kuwetu ya wechewed cha losan un masapuɏ. Udchi mangisagalaanyu si mangalan taku.”
13 Ot ummoycha ot inchesancha losan un imbyegan Jesus kan chicha, ot inyalacha mangalancha si Piyastaʼn Lallausan.
14 Gummatong pu ustuʼn uras, lakaamuy si Jesus kan cha disipulusla un mangan.
15 Ot kalala kan chicha, “Piok gey un makakan kan chikayu si allaʼn Piyastaʼn Lallausan sakbyey un malligatak.
16 Ti ibyegak kan chikayu un achipulak kasin makakan si Piyastaʼn Lallausan inggala matungpeɏ miyaligela ud langit chi Mampangatan Apudyus.”
17 Oli pun illaɏan Jesus chi sintasaʼn byeyas ot lanyaman kan Apudyus ot kalala, “Aɏanyu alla ked mambyenbyensanyu ilumon.
18 Ti ibyegak kan chikayu, malipud si salaoy chakpun umilum kasin si byeyas inggala gumatong chi Mampangatan Apudyus.”
19 Ot illaɏala bo tilapay ot lanyaman kan Apudyus, ot pilispis-igla ot illidchola kan chicha, un kalala, “Allaya long-egku un michatun para kan chikayu. Koonyu alla ta malomsomkanyu kan sakon.”
20 Lagamputcha pun langan, illaɏala sintasaʼn byeyas un kalala, “Ha allan byeyas, siya barun tuɏeg Apudyus kan chikayu, un lameɏkaan si chaɏak, un mibukbuk para kan chikayu.
21 “Ngim itullongyu! Awed utla kan chitaku chi osaʼn mangiyibit kan sakon.
22 Matoy chi Alak chi Tagu ti siya ingkodchong Apudyus, ngim kadchegu chi taguʼn mangiyibit kan siya!”
23 Oli pun lan-asi-imuscha lu silu kan chicha chi mangwa si katchi.
Ha Taguʼn Ibilang Jesus Un Langatu
24 Lansusubog cha disipulus Jesus lu silu kan chicha mibilang un kangatuwan.
25 Ot kalan Jesus kan chicha, “Cha turay utla pita, amod chi mammamanchecha kan cha iturayancha. Ked alla kalobbongancha kan chicha ked ichayawcha long-egcha un chicha kalu ga tumuɏutuɏung kan cha tagu.
26 Ngim chakampun otyan si kamatchi kan chikayu, ti lu silu piolaʼn langatu kan chikayu, masapuɏʼn ipakumbyabyala long-egla un isun chi kabyabyaan un bubùulon. Ked ha pangat kan chikayu, masapuɏʼn mambyalin isun chi kabyabyaan un bubùulon.
27 Silu langatngatu si kasomsomkanyu, ha umamuy mangan si lamisaan willu ha mansimbi kan siya? Ha summangun mangan? Ngim sakon, awechak kan chikayu un isun chi mansimbi.
28 “Bubuɏun, tuttuwaʼn ilan-alusanyu cha ligligatku.
29 Isun chi langidchen Amak kan sakon si kalobbongak un manturay, katchi bo mangidchek kan chikayu si kalobbonganyuʼn manturay.
30 Ta makakan kayu ya makailum kayu kan sakon si manturayak, ked umamuy kayu un mangituray kan cha simpuɏu ya chuwaʼn tribun Israel.”
Ha Langibyeg-an Jesus Si Mamuklitan Peter Kan Siya
(Mat. 26:31-35; Mrk. 14:27-31; Jhn. 13:36-38)
31 Oli pun kalan Jesus kan Peter, “Simon, Simon, Chongɏom ked! Chilawat Satalas chi wayala un mamachas kan chikayu losan, ta itullongla lu silu masagat kan chikayu un isun chi mantopa si pagoy ta matan-in chi chugi ya bilayu.
32 Ngim iluwaluwak sika, Simon, ta achipun maabyak chi pammatim kan sakon. Ked lu kasinka mansagung kan sakon, pakoscheɏom chi pammatin cha bubuɏunlu.”
33 Ngim kalan Peter, “Apu, sisasagalaak un mibyaɏud ya makakatoy kan sika.”
34 Kalan Jesus, “Ibyegak kan sika, Peter, sakbyey un malullakuk chi kawitan si salaʼn labi, mamitluwom sakon puklitan.”
Ha Awiton Cha Umoy Mantudtuchu
35 Oli pun kalan Jesus kan cha disipulusla, “Si langibuulak kan chikayu un lappun inyawityu si pilak, pasiking ya sancheɏyu, awed kamman langkuɏanganyu?”
Kalancha, “Lappun.”
36 Ngim si sala, kalan Jesus, “Lu silu awed pilakla masapuɏʼn iyawitla, ya masapuɏʼn mampasiking bo. Ked lu silu lappun pachinla, ingilala silupla ya ngummilà pachinla.
37 Ti ibyegak kan chikayu un masapuɏʼn matungpeɏ kan sakon chi kalan chi liigilin ugud Apudyus, ‘Liibilang kan cha tulisan.’ Tuttuwaʼn chanchali katungpaɏan chi liigili mipanggop kan sakon.”
38 Kalan cha disipulusla, “Apu, Ilam! Alliya chuwaʼn pachin.”
Kalan Jesus, “Umalay lait!”
Ha Lalluwaluwan Jesus Ud Bilig Olivo
(Mat. 26:36-46; Mrk. 14:32-42)
39 Ummoyon si Jesus ot ummoy ud Bilig Olivo, litun-ud cha disipulusla kan siya ti siya sigud un pin-ala koon.
40 Gummatongcha pun, kalan Jesus kan chicha, “Malluwalu kayu ta achi kayu masulisug.”
41 Oli pun ilachayuwala chicha si kaachayun chi ipit-ung un byetu. Ot lampalintuming un malluwalu.
42 Kalala, “Ama, lu piom, ilisim sakon si allaʼn ligat un sangsanguwok. Ngim chakampun un ha piok chi matungpeɏ, ngim ha piom chi matungpeɏ.”
43 Oli pun lampaila kan siya osaʼn anghel un lampeɏpuʼd langit ot pilakoscheɏla siya.
44 Ot laam-amod laasusu somsomok Jesus ot impapatilaʼn lalluwalu, ot ha lingotla isun chi chaɏaʼn mantodtodtod si pita.
45 Lagamput pun lalluwalu, langulin si inggewan cha disipulusla ot inchesala chichaʼn lasusuyop ti amod chi sigeb somsomokcha.
46 Kalala kan chicha, “Pakayuggey lasusuyop? Bumangon kayu ya malluwalu kayu ta achi kayu masulisug.”
Ha Lalokmaancha Kan Jesus
(Mat. 26:47-56; Mrk. 14:43-50; Jhn. 18:3-11)
47 Sissiyan man-ugu-ugud si Jesus, lasalawang cha amod un taguʼn impangpangun Judas, osa kan cha simpuɏu ya chuwaʼn disipulusla. Ummachali kan Jesus ta kikisola.
48 Ngim kalan Jesus, “Judas, lambyalilom ibit chi kikis un sinyeɏn chi ayatlu kan Sakon un Alak chi Tagu?”
49 Intullong pun cha disipulus un lituntun-ud kan Jesus chi makmakwa kan siya, kalancha, “Apu, makabillakeg kami?”
50 Ot ha osa kan chicha, liliwasla machuwalan un ingan chi musassun chi kangatuwan un pachi.
51 Ngim kalan Jesus, “Agey lait.” Ot illaɏala ingan labyakeg ot impeogla.
52 Ot kalan Jesus kan cha ap-apun cha papachi ya cha kapitan chi guwechan chi templo ya cha pallakayon cha Judio un umoy manchokma kan siya, “Ha masapuɏ kamman un mampapadchin kayu ya mampapang-ok kayuʼn umoy manchokma kan sakon? Ha tulisalak kamman?
53 Ileɏgew un awechak kan chikayu si templo ot achipulak chilokmaan. Ngim sala timpun chi manturayan chi lawwing, siya mipalubusanyu un mangwa si pionyuʼn koon.”
Pilitlun Peter Piluklitan si Jesus
(Mat. 26:57-58, 69-75; Mrk. 14:53-54, 66-72; Jhn. 18:15-18, 25-27)
54 Chilokmaanchà Jesus ot illiyoycha si byeɏoy chi kangatuwan un pachi. Lituntun-ud si Peter un bummabyattawa.
55 Lan-apuy cha tagu si man-alichuwancha si gawan chi paway chi byeɏoy ot ummoy lakaalichu si Peter kan chicha.
56 Intullong pun chi osaʼn byebyaiʼn bubùulon si Peter, intotokkeɏla siya ot kalala, “Laoy bo osaʼn biɏun Jesus!”
57 Ngim piluklitan Peter, un kalala, “Byebyai, lappun ammuk kan siya!”
58 Ummooli pun akit immatulan chi osaʼn leɏaki siya ot kalala, “Sika osa kan chicha.” Ngim kalan Peter, “Leɏaki, Chakampun un kadwak chicha!”
59 Lummaus pu lasin-uras, impatut chi osaʼn leɏaki kalan un, “Lappun chuwachuwalan biɏun Jesus chi allaʼn tagu ti iGalilee siya!”
60 Ngim kalan bo Peter, “Lappun ammuk si ug-ugguchom!” Ot si man-ugu-uguchen Peter, lalullakuk chi kawitan.
61 Lantuwili si Jesus ot itotokkeɏla si Peter. Ot simsimmok Peter chi imbyegan chi Apu kan siya un kalala, “Sakbyey un malullakuk chi kawitan si salaʼn labi, mamitluwom sakon puklitan.”
62 Ummoyon si Peter ot lan-ibi-ibin.
Ilam-amsiwcha Si Jesus Ya Silansantukancha
(Mat. 26:67-68; Mrk. 14:65)
63 Ilam-amsiw cha langguwecha si Jesus ya silansantukancha siya.
64 Bilungutcha atala ot ilimuscha kan siya, “Pugtuwam lu silu lalantuk kan sika?”
65 Achu cha imbyegbyegachaʼn mangam-amsiw ya mangikiteg kan siya.
Ha Lipasanguwan Jesus Kan Cha Kukunsiseɏ
(Mat. 26:59-66; Mrk. 14:55-64; Jhn. 18:19-24)
66 Alla pun un mabigat, lachagup cha pallakayon cha Judio, cha ap-apun cha papachi ya mimistulun chi lintog, ot impasangucha si Jesus kan cha kukunsiseɏ.
67 Kalan cha, “Ibyegam u kan chikami lu sika si Kristu?”
Ot silongbyatan Jesus chicha, “Lu ibyegak kan chikayu, achipunyu patiyon.
68 Ked lu man-imusak kan chikayu, achipunyu songbyatan.
69 Ngim lu magamput chi allaʼn makwa kan sakon, Sakon un Alak chi Tagu, umamuyak si machuwalan Apudyus un mallakabyelin.”
70 Kalan cha losan, “Chipay, Alak Chika kan Apudyus?”
Silongbyatala chicha, “Siya kalanyu.”
71 Oli pun kalancha, “Simma kasin taku sington si byasuɏla, ti chingngeɏ taku cha imbyegala.”