6
Mipanggop Si Sabyechuʼn Man-illongan
(Mat. 12:1-8; Mrk. 2:23-28)
1 Si osaʼn Sabyechu un man-illongan cha Judio, langoy cha Jesus kan cha disipulusla si pappayaw un lamuɏ-an si wheat un isun chi pagoy. Ot lalidtidchaɏancha pun, pummutingcha disipulusla si wheat ot kilutimancha ta kaloncha.
2 Ot kalan cha uchum un Pariseo un langitullong, “Payuggey koon chi katchi un mipalit si lintog taku lu Sabyechu?”
3 Ot silongbyatan Jesus chicha, un kalala, “Achipunyu kamman bilasa kingwan David ya cha kakadwala si labitilancha?
4 Lilumlok si David si byeɏoy Apudyus ot illaɏala tilapay un lichatun kan Apudyus, un ipalit chi lintog un kalon cha tagu ti abus cha papachi mangan. Killanla ot illidchela cha kakadwala ot killancha bo.”
5 Ot inyalungus Jesus imbyega, “Sakon un Alak chi Tagu alla kalobbongak un mangibyega lu silu makwa si Sabyechuʼn man-illongan.”
Ha Leɏakiʼn Lasikod Chi Imala
(Mat. 12:9-14; Mrk. 3:1-6)
6 Si osaʼn Sabyechu, lilumlok kasin si Jesus si sinagogan cha Judio, ot lantudtuchu. Illinggew chi leɏakiʼn lasikod chi machuwalan un imala.
7 Illinggew bo cha uchum un mimistulun chi lintog ya Pariseo, mansingisingitcha si mangichiɏumancha kan Jesus, ot tamtamchagencha lu palin-awaola chi lasakit si Sabyechuʼn man-illongan.
8 Ngim ammun Jesus chi somsomokcha, ot kalala si leɏakiʼn lasikod, “Umalika u sumiked si allaʼn sangwalan.” Ot ummoy chi leɏaki.
9 Ot kalan Jesus kan chicha losan, “Imusok u kan chikayu, himma ipalubus chi lintog taku un makwa si Sabyechu? Koon taku bibiɏu willu lawwing? Taguwon taku tagu willu patoyon taku?”
10 Lilangɏangala pun chicha losan, kalala si leɏaki, “Uyachom chi imam.” Ot iluyedla ot bummaɏu imala.
11 Ngim amod chi sangan cha Pariseo ya mimistulun chi lintog ot lan-uuguchencha lu silu kooncha kan Jesus.
Ha Lanchutukan Jesus Kan Cha Lasawaɏan Si Chuwa Un Apostolesla
(Mat. 10:1-4; Mrk. 3:13-19)
12 Lagamput pun, lalagecha si Jesus un ummoy lalluwalu si tagudtud, ot lilabilaʼn lalluwalu kan Apudyus.
13 Labigat pun, ilayagela cha disipulusla ot chilutukala cha lasawaɏan si chuwa ot ngadlola chicha apostoles.
14 Ha ngachencha: si Simon un lingachalala Peter ya suludla un Andrew, cha James kan John, Philip kan Bartholomew,
15 ya Matthew, Thomas, James un alak Alphaeus, Simon un kalanchaʼn Mangisasakkit si ilila,
16 Judas un alak James, ya Judas Iscariot un siya langiyibit kan Jesus.
Ha Lantudtuchuwan Jesus Ya Lamalin-awaala Si Sakit
(Mat. 4:23-25)
17 Lan-osog pun cha Jesus ya cha apostolesla un lampeɏpu si tagudtud, summikedcha si tummalapala ti illinggew cha lachagup un achuʼn disipulusla ya cha amod un taguʼn lampeɏpuʼd Judea ya Jerusalem ya kaili-ili ud Tyre ya Sidon un adchaliyan si byeybyey.
18 Ha panggopcha, ummalicha manchongeɏ si ugud Jesus ya mampalin-awa si sakitcha. Ot inggew bo cha uchum un taguʼn laaɏan, ot pileɏyawla cha aɏan un inggew kan chicha.
19 Losan cha tagu ummaguyut ta appachencha siya, ti alla kilabyelinla un lu appachencha siya, mapalin-awa chi sakitcha.
Cha Pian Un Tagu Ya Kachegchegu Un Tagu
(Mat. 5:1-12)
20 Oli pun lansagung si Jesus kan cha disipulusla ot kalalaʼn lantudtuchu,
“Pian kayu un kakapus un mamati kan Apudyus si sala,
ti mipati kayu si Mampangatan Apudyus!
21 Pian kayu un mabibittin si sala, ti maplok kayu.
Pian kayu un man-ibi-ibin si sala, ti lagalas kayu.
22 Pian kayu lu sangaon cha tagu chikayu ya issancha chikayu ya
mangig-iggaan chikayu si ugud ya kalancha un lawwik kayu
gapu kan Sakon un Alak chi Tagu.
23 “Lu katchi makwa kan chikayu, matetteɏok kayu ya malachok kayu si galasyu
ti chakeɏ gunggulayu ud langit. Ha kooncha kan chikayu,
isun bo chi kingwan cha aappucha kan cha propeta si awi.
24 Ngim kadchegu kayuʼn byabyaklang si sala, ti
mampatingga galasyu utla pita un gunggulayu.
25 Kadchegu kayuʼn mamassug si sala, ti maliklayu amod
un bitin si umaliʼn eɏgew.
Kadchegu kayuʼn sinyoyokyok si sala, ti sinlalangchu kayu ya
sin-iibin kayu si umaliʼn eɏgew.
26 Tuttuwaʼn kadchegu kayu lu chaychayawon cha losan un tagu chikayu,
ti katchi bo killingwan cha aappucha mipanggop kan cha silan propeta.”
Ha Koonyu Si Kabusuɏyu
(Mat. 5:38-48; 7:12)
27 Intuɏuy Jesus un lan-ugud, un kalala, “Ibyegak kan chikayuʼn manchochongngeɏ, masapuɏʼn ayatonyu cha kabusuɏyu. Ya koonyu bibiɏu kan cha mansasanga kan chikayu.
28 Cha taguʼn mangeɏaweg kan chikayu, chawatonyu kachegun Apudyus kan chicha. Ked iluwaluwanyu cha manguy-uyung kan chikayu.
29 Lu awed mallipak si apingyu, palipakyu bo bisak. Lu awed mangaɏa si takpin chi silupyu ti masapuɏla, idchonyu bo mikadwan takpin chi silupyu.
30 Idchonyu lu awed mangkochew kan chikayu, ked lu awed mangaɏa si kukkuwayu achiyu ipaiyulin.
31 Koonyu kan cha tagu pionyuʼn kooncha kan chikayu.
32 “Lu abus cha tagu un memeɏyed kan chikayu cha memeɏyechenyu, achipun kayu maidchen si gunggula. Ti katchi bo koon cha malagbyasuɏ un meɏyedcha kan cha meɏyed kan chicha.
33 Ked lu abus cha mangwa si bibiɏu kan chikayu cha mangwaanyu si bibiɏu, achipun kayu maidchen si gunggula. Ti katchi bo koon cha malagbyasuɏ.
34 Ked lu abus cha ammuyuʼn mangiyulin si buluchoncha cha pabuluchenyu, achipun kayu maidchen si gunggula. Ti katchi bo koon cha malagbyasuɏ un paiyulincha pabuludcha kan cha chogachaʼn malagbyasuɏ.
35 Ngim chikayu, masapuɏʼn ayatonyu cha kabusuɏyu ya koonyu bibiɏu kan chicha. Pabuluchenyu cha mambulud kan chikayu, ulay lu achipun cha iyulin. Ti lu koonyu katchi, chakeɏ gunggulayu, ked mibilang kayu alak Apudyus un Kangatuwan. Ti kacheguwan Apudyus cha achipun manyaman ya cha lawwik un tagu.
36 Masapuɏʼn malagchegu kayu ti malagchegu bo si Apudyus un Amayu.”
Achiyu Kuison Cha Uchum Un Tagu
(Mat. 7:1-5; Jas. 4:11-12)
37 Ot intuɏuy Jesus un lantudtuchu un kalala, “Achiyu kuison cha uchum un tagu ta achipun bo Apudyus kuison chikayu. Achiyu kodchongan cha uchum, ta achipun Apudyus kodchongan chikayu. Pakawalonyu cha asintataguyu ta pakawalon bò Apudyus chikayu.
38 Mangatod kayu kan cha uchum un tagu ked idchen chikayu bo kan Apudyus, ad-achu idchola kan chikayu lu ha illidchonyu, ti masaweɏ inggala achipun kayu makàon. Ked ha kaachun cha idchonyu kan cha asintataguyu, siya bo kaachun chi idchon Apudyus kan chikayu.”
39 Ot lan-alig si Jesus kan chicha un kalala, “Achipun makwan ipuyut chi lakuɏap cha chogalaʼn lakuɏap, ti kapilitan un miɏus-ubcha si abut.
40 Ya lappun iswila un langatngatu lu mistulula. Ngim lu gamputola iswilala, miyisu si mistulula.”
41 Ot lan-alig kasin si Jesus un kalala, “Puggey un mitullongyu siɏun-ik si atan chi suludyu ngim achipunyu maila sitap si atayu?
42 Ot ha kalam kamman un, ‘Cho, sulud kaalok chi siɏun-ik si atam,’ ked alla sitap si atam? Kama kayuʼd tuttuwa! Masapuɏʼn ulaonyu kaalon chi sitap si atayu, ta pumillong chi tullongyuʼn mangaan si siɏun-ik si atan chi suludyu.”
Ha Mangammuwan Si Kilatatagun Chi Tagu
(Mat. 7:16-20; 12:33-35)
43 Kasin lan-alig si Jesus, un kalala, “Lappun bibiɏù kayu un mamunga si lawwik ya lappun lawwik un kayù mamunga si bibiɏu.
44 Ti maammuwan chi kilabiɏun chi kayu si mambubungala. Achipun makwaʼn mamunga eɏagen si apɏas willu achipun makwaʼn mamunga sagakat si kuliwat.
45 Katchi bo tagu, ha bibiɏuʼn tagu, bibiɏu koola ti bibiɏu somsomokla. Ngim ha lawwik un tagu, lawwik bo koola ti lawwik chi somsomokla. Ti ha awed si somsomok chi tagu, siya bo lumoswa si tupokla.”
Cha Chuwaʼn Mampaud Si Byeɏoy
(Mat. 7:24-27; Jas. 1:19-27)
46 Intuɏuy Jesus un lan-ugud, “Payuggey kalan kan sakon ‘Apu, Apu,’ ngim achipunyu koon chi ibyegak kan chikayu?
47 Lu silu umali kan sakon ya manchongeɏ si ibyegak ya koola, katla miyaligela.
48 Miyalig si taguʼn lampaud si byeɏoyla. Lambyaung si lachaɏom si pita inggalad inchesala byetu ot hachi langisaachela si byeɏoyla. Lummitap pun, tilodchak chi chelum chi byeɏoy ot achipun likuɏus ti mangkoscheɏ lisaachela.
49 Ngim ha taguʼn manchongeɏ si ugudku ya achipunla koon, miyalig si taguʼn lampaud si byeɏoyla un insaedla si leglegen. Lummitap pun, likuɏus chi byeɏoy.”