9
Imbuun Jesus Cha Lasawaɏan Si Chuwaʼn Disipulusla
(Mat. 10:5-15; Mrk. 6:7-13)
1 Si osaʼn eɏgew, ilayagen Jesus cha lasawaɏan si chuwaʼn disipulusla ot illidchela chicha si kilabyelin ya kalobbongan un mameɏyaw kan cha aɏan ya mampalin-awa kan cha masakit.
2 Ot imbuunla chicha ta umoycha ibyegbyega chi Mampangatan Apudyus ya mampalin-awa kan cha lasakit.
3 Kalala kan chicha, “Achi kayu mangiyawit si ulay silu lu mambyaat kayu: sekud, pasiking, makan, pilak ya silup un mansukatyu.
4 Ked lu awed mammangili kan chikayu, iinggew kayu si byeɏoyla inggala telanyu hachiʼn ili.
5 Ked lu gumatong kayu si iliʼn achipun chikayu mangiliyon, telanyu ked pukpukanyu tapuk si ikiyu ta mangagammuwanchaʼn kigedcha si machusaancha.”
6 Ot ummoyoncha ot ummoycha gilakgakay cha ili-ili un langibyegbyega si Bibiɏuʼn Chameg kan cha tagu ya lampalin-awa kan cha lasakit.
Machanchalagen Si Herod
(Mat. 14:1-12; Mrk. 6:14-29)
7 Chingngeɏʼn pun Ari Herod ud Galilee cha losan un laklakwa, ked amod chi lanchachalegla, ti kangkalan cha uchum un tagu un siya si John un Mambubunyeg un ummuli latagu.
8 Kalan bo cha uchum, siya si Elijah. Ked kalan bo cha uchum un siya ked osaʼn propeta si awi un ummuli latagu.
9 Ngim kalan Herod, “Impasiwatku si John, simman lin laita ibyegbyegacha?” Ked piolaʼn itullong si Jesus.
Ha Lamakalan Jesus Si Cha Limallibuʼn Tagu
(Mat. 14:13-21; Mrk. 6:30-44; Jhn. 6:1-14)
10 Langulin pun cha apostoles un imbuun Jesus, imbyegacha kan siya cha losan un killingwacha. Ot ilayagen Jesus chicha ta umoycha tumalin si osaʼn ili ud Bethsaida.
11 Ngim laammuwan pun cha tagu ummoyan Jesus, tilun-udcha siya. Ot ilawatla chicha, tiludtuchuwala chicha mipanggop si Mampangatan Apudyus ya pilalin-awala cha lasakit.
12 Lummachema pun, ummoy cha disipulus Jesus kan siya ot kalancha, “Peɏyawom cha amod un tagu ta umoycha kan cha adchaliyan un ili ya tattaɏun ta mansingitcha si kaloncha ya umiyalancha ti alla taku si lugeɏ un lappun tagù bilumɏoy.”
13 Ngim kalan Jesus kan chicha, “Chikayu mamakan kan chicha.” Ot kalan cha disipulusla kan siya, “Abus chi lima un tilapay ya chuwa un ikan si awed. Piom un ingkami ngumila si ipakan kan cha taguʼn alla?”
14 Lasuɏuk si limallibu cha leɏakiʼn inggew, achipun mibilang cha byebyai ya cha aalak.
Kalan Jesus kan cha disipulusla, “Paamuyonyu cha tagu ya up-uppulonyu chicha si sillilimampuɏu.”
15 Ot kingwacha, ya ummamuy cha losan.
16 Ot illaɏan Jesus chi limaʼn tilapay ya chuwaʼn ikan. Lantanged ud langit ot lanyaman kan Apudyus. Pilispis-igla tilapay ya ikan, ot iggalan mangatod kan cha disipulusla ta iwaɏascha kan cha tagu.
17 Langan cha losan ot latlat-opcha. Ot chilagup cha disipulusla cha lasaweɏ ot laplu lasawaɏan si chuwaʼn langaya.
Ha Imbyegan Peter Mipanggop Kan Jesus
(Mat. 16:13-19; Mrk. 8:27-30)
18 Si osaʼn eɏgew un lalluwaluwan Jesus un ossaan, inggew cha disipulusla kan siya ot ilimusla kan chicha, “Himma ibyegan cha tagu si kilatataguk?”
19 Kalan cha uchum, “Sika si John un Mambubunyeg. Kalan cha uchum un sika si Elijah, ked cha uchum, kalancha un sika osaʼn propeta si awi un ummuli latagu.”
20 “Chikayu ngay,” kalan Jesus, “Himma maibyegayu kan sakon?” Summongbyat si Peter, “Sika si Kristu un ingkarin Apudyus un umali.”
Ha Langibyeg-an Jesus Mipanggop Si Matoyala
(Mat. 16:21-23; Mrk. 8:31-33)
21 Bililin Jesus chicha ta achipuncha ibyegbyega kan cha tagu.
22 Ot imbyegala kan chicha, “Sakon un Alak chi Tagu ked masapuɏʼn mapaligatalak ya issalak kan cha pallakayon cha Judio, cha ap-apun cha papachi ya cha mimistulun chi lintog. Ked mapatoyak, ngim lu lumaus chi tiɏuʼn eɏgew, umuliyak matagu.”
Ha Kopyan Chi Mitun-ud Kan Jesus
(Mat. 16:24-28; Mrk. 8:34--9:1)
23 Ot kalala kan chicha losan, “Lu silu simpion un mitun-ud kan sakon, masapuɏ un ichuyala long-egla ked alusala ligat ulay siya matoyala ked tun-uchola sakon.
24 Ti ha taguʼn piolaʼn taguwon chi biyegla, ked mataɏakla mit laing. Ngim ha taguʼn mangkasutala biyegla gapu kan sakon, matatagu ing-inggala.
25 Simma magaleb chi tagu lu mangkuwala losan un awed si lubung, ngim mataɏakla biyegla ked ibyellun Apudyus ud impiyeɏlu? Lappun magalebla.
26 Lu silu mabiin un mangisiked kan sakon ya ha ugudku, Sakon un Alak chi Tagu mabiilak bo un mangisiked kan siya lu mangulilak un mangipaila si kilachayawku ya kilachayaw Ama ya cha lasantuwan un angheles.
27 Ibyegak kan chikayu chi katuttuwaan, awed cha uchum kan chikayu si sala un achipun cha matoy inggala mailacha Mampangatan Apudyus.”
Ha Langipain-an Jesus Si Kilachayawla
(Mat. 17:1-8; Mrk. 9:2-8)
28 Lummaus pu waɏuʼn eɏgew si langibyeg-an Jesus si cha laoy, ilayagela cha Peter, James kan John ot lalagecha cha si bilig ta umoycha malluwalu.
29 Malluwaluwalu pun si Jesus, summabyali tullong chi lupala ya lan-ipuputilak chi silupla un malilisiling.
30 Ot lummoswa cha chuwaʼn leɏaki, cha Moses kan Elijah ot makaug-uggudcha kan Jesus.
31 Malilisiling bo silupcha. Ha ilug-uggudcha mipanggop chi matoyan Jesus ud Jerusalem un malungpaɏala si losan un pion Apudyus.
32 Lasusuyop cha Peter un mambubuɏun. Ngim lapalos pun, bummangoncha ot lailacha kilachayaw Jesus ya cha chuwaʼn leɏakiʼn summisiked si cheegla.
33 Ummoyon pun cha chuwaʼn leɏaki, kalan Peter kan Jesus, “Apu, bibiɏu ta awed kami utla. Mangwa kami si tiɏuʼn sigey, mangkuwam osa, mangkuwan Moses osa ya mangkuwan Elijah bo osa.” Imbyegala hachi ti lappun mapuutla si uguchola.
34 Si man-ugu-uguchen Peter, kakma lummoswa libuu ot tilalikchungala chicha ot ummogyatcha.
35 Ot ladngeɏcha ginga un lampeɏpu si libuu, un kalala, “Allaya Alakkuʼn chilutukak. Chongɏonyu siya.”
36 Lagamput ka hachiʼn gumminga, ummabus si Jesus. Lappun langibyegbyeg-ancha disipulusla si intullongcha inggala lagamput laoy lakwa.
Ha Lameɏyawan Jesus Si Aɏan Un Inggew Si Osaʼn Leɏaki
(Mat. 17:14-18; Mrk. 9:14-29)
37 Labigat pun, lan-osog si Jesus ya cha tiɏuʼn disipulusla ot liyabot cha amod un tagu kan Jesus.
38 Lapalakuy chi osaʼn leɏaki kan cha amod un tagu un kalala, “Mistulu, kacheguwalak u ta itullonglu u alakku, un ossaan.
39 Lu lumlok ka aɏan kan siya, lapalakuy ya kumingkinteɏeg siya ya mantetebuteb chi tupokla. Patunged chi aɏan paligatan siya ked achipunla telan siya.
40 Kalan amala, langkadkacheguwak kan cha disipuluslu ta peɏyawon cha aɏan kan siya ngim achipuncha makapeɏyaw.”
41 Summongbyat si Jesus un kalala, “Chikayu un tagu si sala patunged kayu, chimma pammatiyu? Atoma iliinggewak kan chikayu ya langan-alusak kan chikayu?” Ot kalan Jesus si aman chi leɏaki, “Igetonglu alaklu utla.”
42 Ummachali pu alak kan Jesus, impat-ug chi aɏan siya si pita ot pilakinteɏegla siya. Ngim ilomeɏan Jesus chi aɏan ya pileɏyawla ot lummin-awa alak. Ot impuɏang Jesus siya kan amala.
43 Ot laslaschaaw cha losan un taguʼn langitullong si kilabyelin Apudyus.
Kasin Jesus Imbyega Chi Mipanggop Si Matoyala
(Mat. 17:22-23; Mrk. 9:30-32)
Laslaschaaw cha tagu si losan un killingwan Jesus, kalala kan cha disipulusla,
44 “Somsomkonyu chi allaʼn ibyegak kan chikayu, Sakon un Alak chi Tagu ked mipuɏangak si kabyalilan cha tagu.”
45 Ngim achipun cha laawatan chi piolaʼn uguchon ti lailimod kan chicha ta achipuncha maawatan ya ummogyatchaʼn mangimus kan siya mipanggop si hachi.
Ha Maibilang Un Kangatuwan
(Mat. 18:1-5; Mrk. 9:33-37)
46 Inggew chi lan-is-isikan cha disipulusla lu silu kangatuwan kan chicha.
47 Ngim ammun Jesus chi somsomokcha, ot langaɏa si alak ot pilasikedla si cheegla.
48 Ot kalala kan chicha, “Lu silu mangipotog si osaʼn taguʼn isun chi allaʼn alak gapu kan sakon, potgola bo sakon. Ked lu silu mangipotog kan sakon, potgola bo si amak un langibuun kan sakon. Lu silu kabyabyaan kan chikayu losan, siya kangatuwan.”
Ha Chakampun Un Kabusuɏ Taku Ked Biɏun Taku
(Mrk. 9:38-40)
49 Kalan John kan Jesus, “Apu, illilami taguʼn pin-a mampeɏyaw kan cha aɏan un us-useɏola ngachenlu ked impalitmi siya ti chakampun un biɏun taku.”
50 Ngim kalan Jesus kan chicha, “Achiyu ipalit siya. Lu silu achipun mallawing kan chitaku ked biɏun taku.”
Cha Tagu Si Osaʼn Iliʼd Samaria
51 Chanchali timpuʼn mangulilan Jesus ud langit, simsimmoklaʼn umoy ud Jerusalem.
52 Ot ilun-ulala imbuun cha uchum un bubùulola si osaʼn ili ud Samaria ta umoycha iyala cha tagu si gumatngala.
53 Ngim cha tagu si hachiʼn ili, achipuncha ilawat si Jesus ti lasisitan umoy ud Jerusalem.
54 Chingngeɏn pun cha James kan John chi lakwa, kalancha kan Jesus, “Apu, piom un ichawatmi kan Apudyus ta odchagola apuy kan chicha ta masgobcha?”
55 Ngim lansagung si Jesus ot ilomeɏala chicha.
56 Ot ummoycha si sabyali un ili.
Ha Kilaligat Chi Mitun-ud Kan Jesus
(Mat. 8:19-22)
57 Malidtidchaɏancha pun, inggew chi osaʼn leɏakiʼn kalala kan Jesus, “Mitun-uchak kan sika ulay chilu ayam.”
58 Summongbyat si Jesus un kalala, “Cha mutit allat chi lungug un igewcha, ked cha sissiwit allat bo sukbutchaʼn inggewancha, ngim Sakon un Alak chi Tagu lappun byeɏoyku un inyak masuɏpan.”
59 Kalala bo si osa, “Tun-ucholak.” Ngim kalan chi hachiʼn tagu, “Apu, inyakon yan ta inyak ilobon si amak.”
60 Ngim kalan Jesus kan siya, “Mangamung cha lalattoy un mangimbon kan cha isuchaʼn latoy si ispiritu. Ngim sika, ingka ipapuut ibyegbyega Mampangatan Apudyus.”
61 Ot kalan bo chi osa, “Apu, tun-uchok sika, ngim inyak yan ipakacha kan cha kabyeɏoyku.”
62 Ngim kalan Jesus kan siya, “Ha taguʼn mallugi un mitun-ud kan sakon ya lantuwituwili, lappun simbila si Mampangatan Apudyus.”