Ha Ummulaʼn Suɏat Paul
Kan
Timothy
1
1 Sakon si Paul un apostoles Jesu Kristu. Chilutukalak kan Apudyus un Malagu kan chitaku ya si Jesu Kristu un puun chi lamlama taku.
2 Liya suɏatku kan sika Timothy un imbilangkuʼn tuttuwaʼn alakku gapu si pammatim.
Iluwaluk kan Apudyus un Ama taku ya si Jesu Kristu un Apu taku ta kacheguwan chika, tuɏungan chika ya mallin-awaoncha somsomoklu.
Awed Cha Mantudtuchu Si Tuntulli
(2Pe. 2; Jud. 8-13)
3 Timothy, achim liwatan chi imbyegak kan sika si ummoyak ud Macedonia. Chawatok un iinggewka utlat Ephesus ta byegaam cha uchum un tagu utlat ta iyageychaʼn mantudtuchu si tilutuliʼn tudtuchu.
4 Byegaam bo chicha ta achicha aattingigon cha tilutuliʼn ul-ullit un lakwa si awi ya kapuun cha chachakkeɏchaʼn lampeɏpuwancha. Lappun simbin cha hachi ti mangwacha si oomɏan. Lappun mituɏungla si kawachin Apudyus un makwa mipagapu si pammati.
5 Ha panggopkuʼn mangibyega kan cha alla kan sika, taplu cha mamati utlat man-asiay-ayatcha, un ha man-aayatcha mampeɏpu si mampeɏkas ya bibiɏuʼn somsomok ya gettok un pammati kan Apudyus.
6 Cha hachiʼn mantudtuchu si tuntulli, lan-awichencha pammaticha ya makaisi-isikcha un lappun puut chi pin-acha uguchon.
7 Pionchaʼn mantudtuchu si lintog un illidchon Apudyus kan Moses, ngim achipuncha maawatan cha pin-acha uguchon ya mas-omcha un chicha kamaʼd katuttuwa.
Ha Useɏn Chi Lintog
8 Ammu taku un bibiɏu lintog lu ustu mangiyuseɏan chi tagu.
9 Ammu taku bo un ha lakwaan chi lintog, chakampun un para kan cha taguʼn bibiɏu, ngim lakwa lintog para kan cha taguʼn achipun tumungpeɏ si lintog, cha sumusupling, cha lappun pammaticha kan Apudyus ya cha malagbyasuɏ, cha mangam-amsiw kan Apudyus ya cha mangipotpotog si lawwing ya cha kapapatoy un pilatoycha cha amacha ya ilacha ya uchum un tagu.
10 Ya lakwa bo lintog para kan cha kachechegchegas, cha mantitillalung mangasawa si asilleɏakicha ya asimbyebyaicha, cha malluku si asintatagucha, cha latuli, cha mangisapata si tilutuli, ya cha losan un taguʼn sumusupling si ustuʼn tudtuchu.
11 Ha ustuʼn tudtuchu ked mitimbuɏuy si Bibiɏuʼn Chameg mipanggop kan Apudyus un kangatuwan ya machaychayaw, ked siya impiyeɏla kan sakon.
Ha Lanyamalan Paul Kan Apudyus
(Act. 8:3; 9:3-19)
12 Manyamalak kan Jesu Kristu un Apu taku un langatod si koscheɏk un mangwa kan cha impiyeɏla kan sakon, ti imbilangla sakon un osaʼn mantegochen ya chilutukalak un mansimbi kan siya.
13 Ked ulay lu lawwing cha pin-ak ilugud mipanggop kan siya si sin-eɏgew kan pilaligatak ya pilabiilak cha mamati kan Kristu. Ngim kilacheguwalak kan Apudyus ti achipulak lamati kan Kristu ya lappun ammuk kan cha pin-ak killingwa.
14 Ngim amod chi manchechegun Apu taku kan sakon ti illidchela sakon si pammatik ya ayat un mangay-ayat si asintataguk ti litimpuyugak kan Jesu Kristu.
15 Awed chi osaʼn libyega un tuttuwaon otyan cha losan un tagu, un kalala, “Ummali si Kristu Jesus utla pita ta taguwola cha malagbyasuɏ.” Ked sakon chi osaʼn patunged malagbyasuɏ.
16 Ngim kilacheguwalak kan Apudyus ti sakon chi osaʼn mangipain-an Kristu Jesus si kilaalusla ulay kan cha patunged malagbyasuɏ, ta siya mansampaɏan cha losan un mamati kan siya ta maidchencha si mallalayun un biyeg.
17 Siyad ipotpotog taku ya chaychayawon taku si Apudyus si ing-inggala ti lappun alungusla. Siya Ari si ing-inggala, Ari un matattagu si ing-inggala un achipun matoy, achipun maila, ya siya abus un Apudyus. Amen!
Ha Impiyeɏn Paul Un Kawachi Kan Timothy
18 Allaya bilin un ipiyeɏk kan sika Timothy un alakku, gapu ta imbyegan cha langagammu kan Apudyus mipanggop kan sika un mantegochen un mantudtuchu si ugudla. Ha imbyegacha, hachi otyan chi malegeg si somsomoklu ti sala makagubyatam si lawwing.
19 Igettoklu pammatim ya koom losan cha ammun chi somsomoklu un pion Apudyus. Ti awed cha uchum un langiyagey si ammuchaʼn ustu ked siya layam-alan chi pammaticha.
20 Isun chi lakwa kan cha Himeneus ya Alexander, ked impuɏangku chicha kan Satalas ta mansomsomkancha ta achicha man-ang-angawan si Apudyus.