6
1 Lu mipanggop kan cha musassuʼn mamati, masapuɏʼn potgonchaʼn ustu-ustu cha simmusassu kan chicha taplu lappun machillawan Apudyus ya allaʼn itudtuchu taku.
2 Lu mamati simmusassu kan chicha, masapuɏʼn achipuncha am-amsiwon ti mansusuludcha gapu si pammati. Ngim masapuɏʼn mangkawachichaʼn ustu gapu ta siyaʼd mangapit si kawachicha cha susuludchaʼn mamati un ay-ayatoncha.
Mipanggop Si Sabyaliʼn Tudtuchu Ya Kilabyaklang
(Jas. 5:1-6)
Timothy, masapuɏʼn itudtuchum ya ilawegluʼn ustu-ustu cha alla.
3 Lu silu mantudtuchu si sabyaliʼn tudtuchu un achipun mitimbuɏuy si ustu-ustuʼn ugud Apu takuʼn Jesu Kristu ya laapudyusan un tudtuchu,
4 lasayaw ya lappun ammula kamatchiʼn tagu. Siyad lagalasola makaisi-isik ya makasubo-subog kan cha ugud un lappun simbila. Ha illoswala man-iillapos, susubog, mangkikilliyap ya lawwing un somsomok kan cha biɏuncha.
5 Ya pasig susubog cha pin-acha koon kan cha taguʼn liluus lummawing chi somsomokcha ya laliwatancha katuttuwaan. Ti ha somsomokcha mipanggop si pammati, ked siya bumaklangancha.
6 Ngim sabyali kilabyaklang chi tuttuwaʼn mamati kan Apudyus, ti tuttuwan byaklang taku lu maplok taku si awed kan chitaku.
7 Ti lappun intagaked taku si liyalakan taku utla lubung kan lappun bò iyawit taku lu matoy taku.
8 Ked lu awed umalay un kalon taku ya umalay un silup taku, maplok taku otyan.
9 Ngim cha taguʼn pionchaʼn bumaklang, lalaka masulisugencha ya achu milus-ubyencha un koonchaʼn tilitingang ya lawwik un pion chi long-egcha, ked siya mayam-alancha ya mibyelluwancha.
10 Ti ha kilaagum si pilak ked siya puun cha losan un lawwing. Awed cha uchum un gapu si kilaagumcha, lan-awichencha pammaticha kan Apudyus, ked hachi gapula un singkawed chi malak-amchaʼn ligat.
Ipapatim Un Mangwa Si Pion Apudyus
11 Ngim sika Timothy, tagu chika kan Apudyus ked masapuɏʼn man-awichem losan cha alla, ked ha koom ipupuutluʼn mangwa si ustu ya laapudyusan un biyeg. Pakoscheɏom chi pammatim, ayatlu, kilaattomlu ya kilaaluslu kan cha asintatagum.
12 Ipapatim un mangisiked si pammatim un isun chi makatodtodchakka, ked magunggulaanka si mallalayun un biyeg un siya langayagen Apudyus kan sika ta ipakaammum chi katuttuwaan si sangwalan cha achuʼn tagu.
13 Bililok sika si sangwalan Apudyus un mangatod si biyeg kan cha losan ya si Jesu Kristu un lantistigu si katuttuwaan si sangwalan Pontius Pilate. Ha ibyegak kan sika:
14 Masapuɏʼn tuttuwaom cha losan un bilin Apudyus ya ilam ta awed mikawas si itudtuchum willu awed ipabyasuɏcha kan sika inggala si mangulilan Apu takuʼn Jesu Kristu.
15 Ta lu chumtong chi ustuʼn timpula ipeɏang Apudyus si Jesu Kristu utla pita. Si Apudyus abus chi kangatuwan ya mallakabyelin un manturay. Siya Arin cha losan un aari ya Apun cha losan un ap-apu.
16 Siya abus chi achipun matoy si ing-inggala ya lappun tagu si makaachali kan siya. Lalipud si chamchamu, lappun tagù langitullong kan siya ya lappun bò makaitullong kan siya. Ked siya machaychayaw si ing-inggala ti lappun miyisuwan chi kilabyelinla! Amen.
17 Timothy, bililom cha byabyaklang utla lubung ta achicha is-iskeɏ ya achicha mallamlama si kilabyaklangcha un sin-akitan chi maumasala. Ngim si Apudyus chi mallamlamaancha, un mangato-atod kan cha losan un kasapuɏan taku ta gumalasan taku.
18 Ya ibyegam kan chicha ta kooncha bibiɏu. Masapuɏʼn labyaklangcha si bibiɏuʼn kopya ya mallaaycha ya masapuɏʼn mangàatodcha kan cha uchum un tagu.
19 Lu katchi kooncha, ud langit chi mitepolan cha mallalayun un bilaklangcha un mampakchot chi misaachela si umaliʼn eɏgew ti hachi mataguwan un mallalayun ya siya gettok un biyeg.
20 Timothy, masapuɏʼn ayyuwalam cha losan un impiyeɏn Apudyus kan sika. Ya achim chongɏon cha man-ugu-ugud un lappun simbin chi pin-acha man-is-isikan un kalanchaʼn lalaingcha kalu ngim tilutuli cha hachi.
21 Awed cha uchum un lan-awichencha pammaticha gapu ta kalanchaʼn lalaingcha kalu.
Sapay otyan ta kumachegu si Apudyus kan chikayu losan.