11
Din Layad Diyos Sin Ipogaw Na Ay Nanokdokog En Sisya
(11:1-9)
1 Kanan Diyos, “Idi anak pay laeng din nasyon ay Israel, inpailak din layad ko. Inpangok din anak ko ay nay ay komaan ed Egipto.
2 Ngem sin nangayagak en daida, nasepsep et ay inmaddawi dan sak-en yan nan-idatdaton das animal ya insinso sin didiyosen ay makwani en Baal.
3 Sak-en ay mismo di nangitakkay ya nangitdo sin Israelita ay mandan, ngem adi da ammo ay sak-en di nangay-ayowan en daida.
4 Sin nangipangoak en daida, inpailak din seg-ang ya layad ko. Maiarigak si ipogaw ay mangipapaing si moyang sin tamil na. Nanyakog-ongak ay namakan en daida.
5 “Mantaoli dan to ed Egipto et iturayan di taga-Assyria si daida, tan sigaan da ay mantaolin sak-en.
6 Mawada di gobat sin siyodad da et daddaelen din kalaban da din segpan di siyodad ya peslen das daida. Mapasamak na tan say pinati da di lawa ay pamagbaga.
7 Talaga ay ipapati da ay manokog en sak-en. Olay mo pigay iyat din mamadto ay mamagbaga en daida ta mantaoli da en sak-en ay Kangatoan ay Diyos, adi da pay dedan bomigbig.
8 “Israel, ay maitoled ko aya ay mangipolang en sik-a sin kagobat mo? Ay maitoled ko aya ay mamaybay-an en sik-a? Ay siya mo mabalin ko ay daddaelen sik-a ay kaman ed Adma ya Zeboiim? Nay ay manbabawiak. Adiak baw maamag gapo sin palalo ay seg-ang ko.
9 Adiak manpaabak sin palalo ay bonget ko ya adiak kasin daddaelen ed Israel, tan Diyosak dedan ay baken ipogaw. Nasantoanak ay wada en dakayo et adiak omali ay mangipaila si bonget ko.”
10
11
12