49
Din Dinotokan Diyos Ay Mansilbi En Sisya
(49:1-18)
1 Dengngen yo nan ibagak, dakayo ay ipogaw sin addawi ay il-ili. Idi daanak pay laeng maianak, pinili ya dinotokan Diyos sak-en ay mansilbi en sisya. Wadaak sin eges inak yan nginadananas sak-en.
2 Inmay-ayowan yan nanbalinena din kalik ay kaman nanbinas-il di tadem na ay kampilan ay insisiket na ono napalid ay pana ay naisasagana ay maosal.
3 Kananan sak-en, “Israel, sik-a din baak ay kaidaydayawak.”
4 Ngem kanak, “Nan-oblaak ngem magay silbin din boway ko. Inpakat ko din amin ay pigsak ngem magay nantongpalana. Ngem olay mo siya di, italek ko din oblak en Diyos et sisya di mangidawat si gon-gonak.”
5 Inamag Diyos sak-en sin eges inak ta mansilbiak ay mangitaoli sin polin Jacob ta mansagong dan sisya. Si Diyos di mangidawat si bikas ya dayaw ko.
6 Kanana, “Wada di nabanbanol ay ipaoblak en sik-a ay baak malaksig sin pangitaoliam sin makalasat ay polin Israel ta mansagong dan sak-en ya somiged kasin di kasasaad da. Panbalinek sik-a ay kaman silaw ay maningtinggaw sin nemnem di Gentil ta way iyat di amin ay ipogaw sin solin di daga ay maisalakan.”
7 Wada di inbagan din nasantoan ay Diyos ay mangsobot sin nasyon ay Israel. Kinwani na sin baa na ay linaslasoy ya inliliget di kaipoipogaw ya baan aben di tuturay, “Awni et ilaen din aari ya tuturay sik-a et pomika da ay mangipailas rispito da, asi da manyakog-ong ay mandayaw en sik-a. Maamag na tan sak-en si Yahweh ay namili en sik-a ay baak. Sak-en din nasantoan ay Diyos di Israelita ya matalekak ay manongpal sin inkarik.”
8 Siya abe na di kanan Diyos, “Dengngek din kararag mo sin timpo ay ninemnem ko ay maneg-ang en sik-a, ya badangak sik-a sin domatngan di kosto ay agew ay mangisalakanak en sik-a. Ay-ayowanak ya salaknibak sik-a, et babaen en sik-a makitolagak sin kaipoipogaw. Tolongak abes sik-a ta pasigedem kasin din nadadael ay ili ya ikeddeng mo din kosto ay akin oka sin daga ay nataynan ed wani.
9 Kanam to sin naibabalod ay wadas mabolinget, ‘Bomala kayos na ta mawayaan kayo.’ Kaman dan to karnero ay man-al-alab sin pandanan da et mawada di kanen da olay sin dontog ay magay gomabay.
10 Adi dan to mandagaang ono manbigaw. Adi da maatongan sin podot di dagem ya agew, tan din mangipango en daida et seg-angana et iturong nas daida sin kad-an di obbog.
11 Man-amagak to si annawa ay kalsada sin dontog et mawada di pandanan din ipogaw ko.
12 Ilaen yo, omali da ay mapo sin addawi. Mapo da sin amyanan ya ed Aswan sin abagatan ya siya abe sin diposan di agew.”
13 Manragsak kayo ay mankanta, dakayo ay daga ya dontog. Tan masmaseg-ang si Diyos sin maligligatan ay ipogaw na et liwliwaenan to si daida.
14 Ngem kanan din taga-Jerusalem, “Binaybay-an ya nilinglingan Diyos datako.”
15 Ngem kanan Diyos, “Ay linglingan ayan di ina di anak na ay mansossoso ono adi na seg-angan? Ngem olay mo linglingan da et adiak polos linglingan dakayo.
16 Adiak linglingan sik-a ay Jerusalem. Ilam, kamanak inkitikit din ngadan mo sin palad ko, et kanayon ay nenemnemek din alad mo.
17 Awni et omali di mangisaad kasin en sik-a ya komaan din namakas.
18 Manmokilang ka kod ta ilaem da nan ipogaw mo ay somaa et masinop da sin kad-am. Isapatak sin awak ko ay matmatago ay Diyos: Awni et it-ek mo din ipogaw mo ay kaman din pangit-it-ekan di mangasawa ay babai sin al-altin di awak na.”
19
20
21
22
23
24
25
26