11
Din Inbagan Zofar
(11:1-15)
1 Nankali abe si Zofar ay taga-Naama yan kanana,
2 “Ay siya mo magay manongbat issan ad-ado ay kali? Ay maibilang di ipogaw ay nalinteg mo paad-adoenan kali na?
3 Ay kanam en paginkem dakami sin ad-ado ay kalim ya maga di mamagbaga en sik-a sin panglaslasoyam en Diyos?
4 Kanam en tet-ewa din ibagbagam ya nalinis ka sin pangiilaan Diyos.
5 Ngem mo mankali koma si Diyos ta songbatan daka,
6 ta ipaammo na di laing ay naligat ay maawatan di ipogaw, maammoam ay nalaglag-an pay laeng din dosa ay indawat nan sik-a mo din basol mo.
7 “Ay maawatam di naoneg ay banag maipanggep en Diyos ya maawatam ay kosto din panakabalina?
8 Din ammon Diyos et nangatngato mo ed daya ya naon-oneg mo din kad-an di natey. Ay siya mo makad-as ka ono maawatam?
9 Din kinangaton Diyos et dakdake mo nan daga ya annawa mo din baybay.
10 “Mo depapen ya ibalod nas sik-a ono idarum daka sin pangokoman, maga polos di makalapped en sisya.
11 Ammo na di kinasikap di ipogaw ya il-ilaena din basol da et adi na liw-an.
12 Mabalin ay lomaing di naong-ong ay ipogaw mo maianak ay naamo din atap ay animal.
13 Isonga pasigedem san nemnem mo ta mankararag ka en Diyos.
14 Mo dokogam din lawa ay ogalim ya adi kan ipalobos ay mantee di basol sin beey mo,
15 magay panbainam ya pan-egyatam ay somango sin kaipoipogaw.”
16
17
18
19
20