31
Din Nangipapilitan Job Ay Magay Nanbasolana
1 “Inkarik ay adiak manemnem di lawa mo ilaek di esa ay balasang.
2 Sino ngin di gon-gona ay idawat Diyos ed langit ay Manakabalin Amin?
3 Ay baken ayan ligat di ipalak-am na sin mangam-amag si lawa?
4 Ammon met Diyos din am-amagek tan il-ilaena amin ay gonay ko.
5 “Isapatak ay adiak nakitimtimpoyog si makaetek ya maga polos di in-etekak.
6 Olay timbangen Diyos sak-en sin kosto ay timbangana et maila na ay maga di maipabasol en sak-en.
7 Mo nasangawak sin kosto ay danan ono nan-gamgamak si inilak ono namansaan si basol nan takkay ko,
8 olay madadael din molak ono odom ay ipogaw di mangan sin apit ko.
9 “Mo inarem ko di asawan di tinokmang ko ta sinsin-ed ko sin segpan da,
10 olay mansilbi si asawak si odom ay ipogaw ono daagen di odom ay lalaki.
11 Tan nadagsen di ay basol et lebbeng na ay madosaak sin sangoanan di linteg.
12 Kaman mabidang ay apoy ay dadlon manadael en sak-en ya siya abe sin sanikwak.
13 “Mo waday bag-en ko ay nanriri en sak-en yan adiak pinatgan din kalintegana,
14 into pay di ibagak mo somangoak en Diyos sin pangokomana?
15 Si Diyos di namke en sak-en sin eges en inak yan si Diyos met laeng di nangamag abe sin babag-en ko.
16 “Adiak inpaidam di badang ko sin nabiteg ya adiak inpalobos ay komaseseg-ang di biyag din nankalalasang.
17 Adiak met binaybay-an din naolila ay mandagdagaang yan sak-en anggoy di mangmangan.
18 Tan manipod ed idi, kanayon ay idawdawat ko din masapol da.
19 Mo waday inilak ay nabiteg ay adi makalako si bado na,
20 indawtak si bado ay napo sin dotdot di karnerok ta say adi maskaw et palalo di iyamana.
21 Mo waday sinowitik ko ay olila gapo ta ammok ay mangabakak sin pangokoman,
22 olay magotlo nan takkay ko ta maisian sin padangak.
23 Ngem adiak maamag di kaman nidi tan emegyatak sin domosaan Diyos ya gapo sin kinangato na.
24 “Polos met ay adiak nantalek sin kinabaknang ko
25 ya adiak malaydan sin ad-adoy sanikwak.
26-27 Adiak inongoan din takkay ko ay mangdayaw sin agew ay napigsa di silaw na ya din bowan ay mapteng di kailaana. Adiak polos nasolisog ay nandayaw en daida.
28 Mo say inyat ko koma, makeddenganak koma ay matey, tan bakenak napodno en Diyos ay wadad ngato.
29 “Adiak maragsakan sin domteng ay ligat ya lawa ay pasamak sin biyag di mangililiget en sak-en.
30 Adiak inkarkararag di kateyan da tan mo say iyat ko et bomasolak.
31 Ammon di amin ay mansilsilbi en sak-en ay maga di sinangailik ay nandagaang.
32 Adiak binay-an ay maseyep da sin kalsada din nanbibiyahi mo adi et sinangailik daida.
33 Bakenak met kaman din odom ay ilimed da di basol da.
34 Adiak in-giginek ya adiak aben nanpopokok anggoy sin beey ko, tan adiak egyatan di mabalin ay ibagan di ipogaw ono lomaslasoyan di aag-ik.
35 “Wada koma di mannge en sak-en, tan isapatak ay dadlon tet-ewa din am-in ay inbagak. Sapay koma ta somongbat si Diyos ay Manakabalin Amin. Mo maisolat koma din pamabasol di kalaban ko ta maipaila en sak-en,
36 malaydanak ay mangitakap sin badok ono mangibedbed ta ilaen di kaipoipogaw.
37 Adiak mabain ay somango en Diyos ta ipaammok en sisya amin ay inamag ko.
38 “Mo pinnos ko koma din daga ay molmolaak,
39 ono kinan ko di apit ay adiak binayadan ya say begew ay nateyan di akin oka,
40 olay say gomabay di logam ya pagat sin dagak imbis ay bakakew ya sabog.” Say nakdengan di inbagan Job.