26
Din Istay Dan Pamsean En Jeremias
(26:1-19,24)
1 Idi nanlogi ay manturay si Jehoyakim ay anak Josias ed Juda, waday inpaammon Diyos en Jeremias ay kanana,
2 “Pomika ka sin bel-ayan di Timplo ay beey ko ta ibagam amin ay inbilin kon sik-a sin amin ay ipogaw ed Juda ay en mandayaw isdi. Masapol ay maga di ilimed mo ay olay esay kali.
3 Siguro ay dengngen da et manbabawi da sin lawa ay am-amagen da. Mo say iyat da, adiak itoloy ay manosa en daida gapo sin basbasol da.
4 Ibagam en daida ay sak-en ay Diyos di nangibaga ay masapol ay tongpalen da din linteg ay inbilin ko en daida.
5 Masapol abe ay tongpalen da din kalin di baak ay mamadto. Namin ado ay waday inbaak en daida, ngem adi dan pinatpati.
6 Mo adi dan patien, bakasek to din Timplo ay nay ay kaman din inyat ko ed Shilo, et mo waday mamaos si ib-a na sin olay sino ay nasyon isnan daga, kanana, ‘Maamag koman sik-a di kaman din nanadaelan Diyos ed Jerusalem.’ ”
7 Dinngen din papadi, mamadto ya kaipoipogaw nan inbagan Jeremias sin Timplo.
8 Idi makdeng ay inbaga na amin din inbilin Diyos, kadepap dan sisya yan kanan da, “Masapol ay matey ka.
9 Apay nga inosal moy ngadan Diyos ay nangipadto ay manbalin si kaman ed Shilo din Timplo ay nay et madadael nan siyodad ya magay mantee?” Et inalibongbongan din kaipoipogaw si Jeremias sin Timplo.
10 Idi dinngen din oopisyal ed Juda di napasamak, binmala da sin palasyo et en da tinmokdo sin segpan di makwani en Baro ay Segpan di Timplo.
11 Idi siya di, kanan din papadi ya mamadto sin oopisyal ya kaipoipogaw, “Lebbeng na ay makeddengan ay matey nan ipogaw ay nay, tan nan-ipadto si maikontra isnan siyodad et dakayo ay mismo yan dinnge yo.”
12 Pag kanan Jeremias sin amin ay oopisyal ya ipogaw, “Si Diyos di nangibaan sak-en ay mangipadto sin dinnge yo ay maikontra sin Timplo ya isnan siyodad.
13 Isonga ed wani, balbaliwan yo koma din ogali yo ya am-amagen yo ta tongpalen yo din kalin Yahweh ay Diyos yo et ibabawi na din inkeddeng na ay dosa yo.
14 Mo pay sak-en, tengel yo din biyag ko, isonga amagen yo mo sino di nemnemen yo ay kosto para en sak-en.
15 Ngem sinay di nemnemen yo, dakayo ya din omili isnan siyodad: Mo pomse kayo, bomasol kayo ay manpese si magay basol na, tan si Diyos di nangibaan sak-en ay mangibagas na en dakayo.”
16 Idi siya di, kanan din oopisyal ya kaipoipogaw sin papadi ya mamadto, “Baken lemebbeng ay matey din ipogaw ay nay, tan din inpadto nan datako et napon Yahweh ay Diyos tako.”
17 Pag pomika di odom ay papangolo yan kanan da sin ipogaw ay nasisinop,
18 “Sin nanturayan Hezekias ed Juda, nan-ipadto si Mikias ay taga-Moreset yan kanana sin amin ay ipogaw, ‘Awni et mabakas ed Jerusalem. Maiwalang din amag di nadadael ay bebbeey et maalado di odom ay daga ay naisaadan di siyodad. Din bilig abe ay naisaadan di Timplo et mabeas.’
19 Ngem adi pinsen Ari Hezekias ya din ipogaw na si Mikias. Inmegyat si Hezekias en Diyos et nankedaw si seg-ang na, isonga inbabawin Diyos din panggep na ay manosa en daida. Ay layden yo ay datako met laeng di mangianap si mawadaan di ligat tako?”
20
21
22
23
24 Begew isnan inbaga da ya gapo abe ta insakit Ahikam ay anak Safan si Jeremias, adi naipolang sin omili ay mamse en sisya.
Din Nanakwangan Jeremias Si Pako
Sin maikap-at ay tawen ay nanturayan Jedekias ed Juda, inbilin Diyos ay man-amag si Jeremias si pako ta asi na iamag sin tenged na sin kad-an di palasyo. Pag kanan Jeremias sin oopisyal ay panakaawak di nandinmang ay il-ili ay en nakingalat en Ari Zedekias, “Awni et ipolang Diyos din il-ili yo en Ari Nebukadnezzar ed Babilonia et mansilbi kayo en sisya ya sin anak na ya siya abe sin apo na. Mo adi kayo manpaituray en sisya, dosaen Diyos dakayo et matey kayos gobat, betil ya sakit. Adi yo patpatien din kanan di mamadto, manpontos ya man-gengey mo kanan da en laton ay adi kayo mansilbi sin ari ed Babilonia, tan etek da di. Ngem mo manpaituray kayo en sisya, ipalobos Diyos ay mantee kayo sin bokod yo ay il-ili. Siya sa di kanan Diyos.”