7
Din Panagdayaw Ay Magay Silbi Na
(7:1-15,22-28)
1-3 Inbaan Diyos si Jeremias ay emey sin segpan di Timplo ay senggepan di ipogaw ay taga-Juda ay en mandaydayaw. Inbilina ay en pomika isdi ta ipaammo na din kali na. Kanan Jeremias, “Siya na di inbagan Yahweh ay Kangatoan ay Turay en datako ay Israelita: Balbaliwan yo din panagbiyag yo ya din ogali yo ta say adiak pakaanen dakayo isnan ili ay nay.
4 Adi yo patpatien din ipidwapidwa da ay kanan en, ‘Laton ay adi tako maan-ano, tan sinay din Timplon Diyos,’ tan baken tet-ewa di.
5 “Tet-ewa koma ay balbaliwan yo din biyag yo ya ogali yo ta kostokosto di iyat yo si esa ya esa.
6 Adi yo palpaligaten din mangili, olila ya balo. Adi kayo manpespese si magay basol na sin ili ay nay. Adi kayo aben mandaydayaw si didiyosen tan say kadadaelan yo.
7 Mo say iyat yo di, makiteteeak en dakayo si eng-enggana isnan ili ay indawat ko ed idi sin aap-o yo.
8 “Ngem nay ay mantalek kayo si baken tet-ewa ay kali ay magay silbi na.
9 Mangakew kayo, manpese ya makikamalala kayo. Man-etek kayo ay mansapata. Man-idaton kayon Baal ya mandayaw kayo si didiyosen ay adi yo am-ammo.
10 Asi kayo pay omali sin Timplok ay kaidaydayawak yan kanan yo en adi kayo maan-ano et mabalin ay itoltoloy yo din kaliliget ko ay am-amagen yo.
11 Ay din pannemnem yo sin Timplok yan liyang ay pantean di tollisan? Sak-en et iilaek din maam-amag.
12 “Emey kayo ed wani ed Shilo ay pinilik ay pandaydayawan da en sak-en ed idi ta ilaen yo di napasamak sin lugar ay doy gapo sin basol ay inam-amag di ipogaw ko ay Israelita.
13 Namin ado ay nakikaliak en dakayo, ngem adi yo inkaskaso. Ay-ayagak dakayo, ngem adi kayo somongsongbat. Isonga ed wani, gapo ta say inamag yo amin dana,
14 amagek di kaman din inyat ko ed Shilo sin Timplok ay pantaltalkan yo ya isnan lugar ay indawat kon dakayo ya sin aam-a yo.
15 Pakaanek abes dakayo sin sangoanak ay kaman din inyat ko sin aag-i yo ay polin Efraim.”
16
17
18
19
20
21
22 Kanan aben Diyos en Jeremias, “Idi inkaan ko ed Egipto din aam-a yo, magay inbagak ono inbilin ko maipanggep sin daton ay mapooan ono olay sino ay kalasin di daton.
23 Ngem inbilin ko en daida ay tongpalen das sak-en ta sak-en di Diyos da ya daida di ipogaw ko. Inbagak en daida ay onodan da din panagbiyag ay inbilin ko ta somiged di biyag da.
24 Ngem tineteweng da et adi da tinongpal. Say tinongpal da din makenteg ay nemnem da, isonga adi sinmiged di biyag da mo adi et linmawlawa.
25 Manipod sin kinmaanan di aam-a yo ed Egipto engganad wani, kanayon ay way inbaak ay mamadto en daida.
26 Ngem adi da inkaskaso et inpakekenteg da din nemnem da. Nasepsep di inamag da mo din inyat di aap-o da.
27 Isonga mo ibagam dana et adi da dengngen, kaliam et adi dan somongbat.
28 Ibagam ngarud ay daida di nasyon ay adi manongtongpal en Yahweh ay Diyos da ya adi manmannge sin pamagbaga na. Enggay maga polos di tet-ewa ay inbaga da.”
Kanan aben Diyos, “Kadodogis sin pangilak din inam-amag di taga-Juda, tan insaad da di sinan didiyos sin Timplok yan indaton da din mismo ay an-ak da ay mapooan sin Tanap ay Ben-Hinnom. Isonga mangadanan to din tanap ay doy si Tanap ay Namsean Das Ad-ado. Kolang di daga ay pangiponponan da sin natey, et maiwalawalang di bangkay da. Maiwalang abe din tong-an di ipogaw ay natey ed idi, tan kaanen di kagobat da sin naiponponan da.”
Palalo ay mansakit di nemnem Jeremias begew sin lawa ay panagbiyag di kakailiana ya din dosa ay ipalak-am Diyos en daida. Gapo ta dinokogan das Diyos ya din linteg na, pansisianen das daida ay iey si odom ay il-ili et maga di pamosposan da mo adi et din seg-ang Diyos anggoy, et say ipanemnem Jeremias en daida. (7:29–9:22)
29
30
31
32
33
34