26
Din Gon-gonan Di Managtongpal
(26:1-13)
1 Inbilin Diyos en Moses ay ibaga na sin Israelita, “Naey di kanan Diyos. ‘Adi kayo man-amag si sinan didiyos. Adi kayo aben mantood ya mantikitik si bato ta say dayawen yo.
2 Say tongpalen yo pay et din bilbilin ko maipanggep sin agew ay pan-ibbayan ya nasantoan ay fifiesta ya patgen yo din Tolda ay Panpappailaak. Sak-en si Yahweh ay Diyos yo ay nangibagas na.
3 “ ‘Mo tongtongpalen yo din linteg ya bilbilin ko,
4 ibaak din odan sin kosto ay timpo ta manlames din mola ya kaiw sin daga yo.
5 Omad-ado di apiten yo et man-an-ani kayo pay laeng sin timpon di panagbobolas si obas ya siya abe ay manbolbolas kayo pay laeng sin timpon di panagbabangkag. Wada am-in di makan ay masapol yo et maga di pandandanagan yo ay manbibiyag sin daga yo.
6 “ ‘Siya abe ay panturayek di talna sin ili yo, et maseyep kayo ay maga di pan-egyatan yo tan kaanek din maangat ay aanimal sin kad-an yo ya maga abe di en mangobat en dakayo.
7 Iso na abe dedan ay mo waday en yo gobaten, atikoen ya peslen yos daida.
8 Tan mo san lilima en dakayo et abaken da di sin-gasot ya di sin-gasot yan abaken day sinpo ay libo.
9 Bindisyonak abe si dakayo et omad-ado ya mabonat kayo et siya abe ay tongpalek din intolag ko en dakayo.
10 Ad-adon to di apiten yo et omanay si esay tawen ya mansobsobra pay et iwasit yo di odom ay baak ta waday pangipenpenan yo sin baro ay apiten yo.
11 Makibeeyak en dakayo et adiak polos taynan si dakayo,
12 mo adi et kadkadwaek dakayo si kanayon. Sak-en di bigbigen yo ay Diyos yo yan si dakayo di ipogaw ko.
13 Sak-en si Yahweh ay Diyos yo ay nangibela en dakayo ed Egipto ta adi kayon maibabag-en si oway, et dinadael ko din panakabalin da ay kaman mangitatamed en dakayo ta say maiwayaan kayo ya makaan di panbainan yo.’ ”
Din Dosan Di Adi Managtongpal
(26:14-20,46)
14-15 “Siya abe ay kanan Diyos, ‘Mo sigaan yo ay tongpalen din linteg ya bilin ko ya labsingen yo abe din intolag ko,
16 dosaek si dakayo babaen si adi kaagasan ay sakit ya podot ay gomodab ya omin-inot ay pomse. Mo man-esek kayo abe yan sayang, tan din mangobat en dakayo di mangan sin lames da.
17 Iso na abe ay pandokogak si dakayo ta say din mangililiget ya mangobat en dakayo di mangabak ya mangituray en dakayo. Palalo abe di egyat yo, et tomagtag kayo olay mo magay mangatiko en dakayo.
18 “ ‘Et mo makdeng am-in dadi ay ligat yan adi yo pay laeng patien sak-en, dosaek si dakayo si mamin pito di dagsena begew sin basbasol yo.
19 Siya abe ay kaanek di begew ay palalo di panlaslastogan yo. Panbalinek ed langit ay kaman landok ta magay odan ya din lota si kaman gambang ta maga di tomobo si mola,
20 et mo man-obla kayo, owat maabos di pigsa yo, tan adi gomabay di molmola sin daga yo ya olay abe din kakaiw yan adi da manlames.’ ”
21
22
23
24
25
26
27
28
29
30
31
32
33
34
35
36
37
38
39
40
41
42
43
44
45
46 Siya dana di bilin ya linteg ay inbagan Diyos en Moses sin kawada na ed dontog ay Sinai ta ibaga na abe sin Israelita.