22
1 Din dayaw di esay ipogaw et nabanbanol mo palata ya balitok.
2 Siya na di nan-iisoan di babaknang ya nabiteg: pinarsuan Diyos daida am-in.
3 Din naannad yan maila na di domteng ay problima et lisiana, ngem din magay ammo na yan dalasodos, isonga lak-amena di ligat.
4 Din gon-gonan di napakombaba ya mangipateg en Diyos et kinabaknang, dayaw ya ando ay biyag.
5 Din mamanol sin biyag na et addawiana din danan di laway nemnem da, tan ad-ado isdi di tombek ya tagdey.
6 Itdoam din an-ak mo sin kabibiyag ay onodan da koma, et mo madakdake da, ipapasnek da ay onodan.
7 Iturayan di baknang din nabiteg yan manbalin abe ay bag-en di man-iotang din man-otang.
8 Olay sino ay mangimola si baken kosto et problima di apitena, et pag somaldeng di mamaligatanas odom begew sin bonget na.
9 Bindisyonan Diyos din managseg-ang ay mangibingay si makan sin nabiteg.
10 Mo pakaanen yo din makalasoy, somaldeng di ibaw, adi pankikinaawatan, ya oyaw.
11 Gayyem di ari din nalinis di nemnem na ya omiparagsak di kali na.
12 Ilaen Diyos ta mapaneknekan din tet-ewa, ngem dadaelena din planon di maetek ya nasikap.
13 Kanan din nasadot ay manpambal, “Emegyatak ay en man-obla tan waday layon ay omisida.”
14 Din kalin di manakikamalala ay babai yan kaman malosong ay bito. Mo pabongetem si Diyos et mag-as ka isdi.
15 Naisisigod di kinaong-ong di amin ay anak, ngem no soplitem, mabalin ay mabalbaliwan.
16 Mo paligatem di nabiteg ta waday iyat mo ay bomaknang, bomiteg ka pay dedan. Siya abe mo isagotam di baknang.
Tolonpo Ay Pamagbagan Di Masirib
17 Nay di pamagbagan di masirib. Estem ay dengngen nan itdok en sik-a.
18 Maragsakan kan to mo igtom dana sin nemnem mo ya kabaelam ay ibaga.
19 Itdok dana en sik-a ed wani ay agew ta mantalek ka en Diyos.
20 Insolat ko nan tolonpo ay pamagbaga ay pakagon-odan si sirib.
21 Say pangammoam si tet-ewa ya kosto ay isongbat mo sin nan-ibaa en sik-a.
22 Adi ka paligaten di nabiteg gapo anggoy ta magay kabaelan da, ya adi kan sowitiken sin pangokoman,
23 tan si Diyos di mangikalintegan en daida et peslena din mamaligat en daida.
24 Adi kan makigayyem sin mabonget ay ipogaw,
25 tan maalinan ka en daida et kaman kan nakna si tagdey.
26 Adi kan itakder di otang di odom ay ipogaw,
27 tan mo magay ibayad mo, alaen da din mismo ay kaseyseyepam.
28 Adi kan etanen din sigod ay beddeng ay in-amag di aap-o yo.
29 Mo nalaing ka ay man-obla, baken nababa ay ipogaw di pansilbiam mo adi et mansilbi ka sin ari.