5
Pamagbaga Ta Addawian Di Makikamkamalala Ay Babai
1 Anak ko, estem ay dengngen din pamagbagak ay pangaam si sirib
2 ta kanayon ay naannad ka ya madnge sin kalim ay nanemneman ka.
3 Tan din kalin di makikamkamalala ay babai et mam-is ay kaman anig ya nalamlamoyot mo lana,
4 ngem sin odi na, maiarig din babai ay sana si manpait ay kedet ya matadem ay kampilan ay nanbinas-il di tadem na.
5 Din panturongan di siki na et pese, tan din pandanana et manturong sin kad-an di natey.
6 Adi na on-onodan din danan ay manturong si biyag. Nasangaw sisya ay manlikeliked sin nakillokillo ay danan, ngem adi na ammo.
7 Isonga ed wani, dengngem din ibagak yan adi kan liwliw-an.
8 Addawiam din kaman nidi ay babai. Adi ka polos somag-en sin pantew di beey na.
9 Tan mo somag-en ka, posen di odom din dayaw mo yan pilit ay idawat mo si ipogaw ay magay seg-ang na din ginon-od mo sin pigay tawen di biyag mo.
10 Alaen di mangili din kinabaknang mo ay inligligatam.
11 Sin odi na, manbayeweng ka tan enggay komapsot din awak mo.
12 Et kanam, “Apay nga sinigaak ay maitdoan ya mabagbagaan?
13 Apay nga adiak dedan inkaskaso din omit-itdo?
14 Ed wani, sangsangoek di kaibabainak sin sangoanan di natopog ay kaipoipogaw.”
15 Say inomem anggoy din danom ay mapo sin bobon mo.
16 Baken ka koman kaman ginawang ay mabalin ay pan-inoman di olay sino ay babai.
17 Din bobon mo et paran sik-a anggoy ay adi makibingay di odom.
18 Mabindisyonan koma din obbog mo. Maragsakan ka koma sin inasawam manipod sin kabarom.
19 Napintas sisya yan mapteng ay boyaen din gonay na ay kaman ogsa. Maragsakan ka koma sin soso na yan kanayon koma ay mapnemapnek ka sin layad na.
20 Anak ko, apay nga maawis ka sin asawan di odom ta say maragsakan ka sin soso na?
21 Tan si Diyos et iilaena am-in ay am-amagen ya em-emeyan di ipogaw.
22 Din basol di mangam-amag si lawa et kaman tagdey ay mangna en sisya.
23 Matey sisya gapo ta adi makaitpe sin awak na, malitaw gapo sin palalo ay kinaong-ong na.